დაისახეთ მიზნები განცხადების ეფექტურობის ასამაღლებლად

იანვარი არ არის ერთადერთი თვე, რომელშიც ბიზნესის განვითარება შეიძლება დაისახოთ მიზნად. პროგრესის რეგულარულად შემოწმება და სტრატეგიის საჭიროებისამებრ შეცვლა მთელი წლის განმავლობაში წარმატების საწინდარია.

მასპინძლობის ხელსაწყოებისა და რესურსების მეშვეობით მარტივად შეგიძლიათ გააკონტროლოთ განცხადების ეფექტურობა, შეიტყოთ, რომელი ვარიანტებია ეფექტური სხვა მასპინძლებისთვის და დაისახოთ მიზნები სასურველი შედეგების მისაღწევად.

პროგრესის შეფასების გარეშე რთულია, გაიგოთ, რა ამართლებს. გამოიყენეთ მასპინძლობის მართვის პანელი საჭირო ინფორმაციის შესაგროვებლად, კერძოდ:

• ჯავშნებისა და შემოსავლის ანალიზისთვის
• სტუმრებისგან მიღებული მიმოხილვების გასაცნობად
• ადგილობრივ სამოგზაურო ტენდენციებში გასარკვევად

მასპინძლობის მართვის პანელის სექციაში „ანალიტიკა“ თავმოყრილია ძირითადი მაჩვენებლები, როგორიცაა თქვენი ყოველთვიური შემოსავალი, დაჯავშნილი ღამეების რაოდენობა, სტუმრებისგან მიღებული მიმოხილვები და საერთო შეფასება. იქვე გთავაზობთ შესაძლებლობების ცენტრს, რომელშიც შეგიძლიათ გაეცნოთ ადგილობრივ სამოგზაურო ტენდენციებს (მაგალითად, ინფორმაციას იმის შესახებ, თუ რა ტიპის საცხოვრებლებსა და საყოფაცხოვრებო პირობებს ეძებენ სტუმრები ყველაზე ხშირად).

ციფრების ანალიზის პარალელურად დაფიქრდით, მაქსიმალურად ითვალისწინებს თუ არა მიმდინარე სამოგზაურო ტენდენციებსა და სეზონურობას (პიკის პერიოდებს) თქვენ მიერ განსაზღვრული საფასო პოლიტიკა და ხელმისაწვდომობა კალენდარში. ამას გარდა, შეგიძლიათ დაიხმაროთ სტუმრებისგან მიღებული გამოხმაურება.

„სტუმრებს მოუსმინეთ“, — გირჩევთ სუპერმასპინძელი ელეინი ბალეარის კუნძულებიდან (ესპანეთი) და დასძენს: „ისინი ბევრი რამის გაუმჯობესებაში დაგეხმარებიან, რაც, თავის მხრივ, უფრო მაღალი ფასის დაწესების შესაძლებლობას მოგცემთ“.

მონაცემებს უფრო დეტალურად რომ გაეცნოთ, გაააქტიურეთ პროფესიული ხელსაწყოები ეფექტურობის პანელზე წვდომისთვის (გადართვას ნებისმიერ დროს შეძლებთ ანგარიშის პარამეტრებიდან).

ეს პროფესიული ხელსაწყოები საშუალებას გაძლევთ, გააკონტროლოთ განცხადებების ეფექტურობა გასული წლის განმავლობაში (მაგალითად, შეიტყოთ, როგორი იყო დაკავებულობის მაჩვენებელი, საშუალო ფასი ერთ ღამეზე, ნახვების რაოდენობა და არა მხოლოდ). ამას გარდა, შეგიძლიათ ერთმანეთს შეადაროთ თქვენი და სხვა მსგავსი განცხადებების მაჩვენებლები, მიღებული ინფორმაცია კი მასპინძლობის ყველაზე ეფექტური სტრატეგიის განსაზღვრაში დაიხმაროთ.

მას შემდეგ, რაც დაადგენთ, რა შეიძლება დაგეხმაროთ განცხადების ეფექტურობის გაუმჯობესებაში, ალბათ დაგაინტერესებთ, როგორ შეიტანოთ ცვლილებები. ნულიდან დაწყების ნაცვლად, შეგიძლიათ სხვა წარმატებული მასპინძლების გამოცდილებით იხელმძღვანელოთ.

რესურსების ცენტრში გთავაზობთ სუპერმასპინძლების რჩევებს ისეთი საკითხების შესახებ როგორიცაა ბიზნესგეგმის შემუშავება და ბიუჯეტში საყოფაცხოვრებო პირობების გათვალისწინება. მასპინძლობის დონის ასამაღლებლად შეგიძლიათ ჩვენი სრული გზამკვლევიც დაიხმაროთ.

ამას გარდა, გაერთიანების ცენტრში შეგიძლიათ თქვენთვის საინტერესო პოსტები მოიძიოთ და სხვა მასპინძლების მოსაზრებებს გაეცნოთ. მაგალითად, თუ ფინანსების მართვის მეთოდები გაინტერესებთ, ამ პოსტში გაეცნობით, რა მიდგომას ირჩევს ენი, სუპერმასპინძელი ნიუ-იორკიდან.

„ჩემი უპირველესი მიზანია, რომ, საშუალოდ, დღიური შემოსავალი ერთი დღის ხარჯს აღემატებოდეს“, წერს ენი და დასძენს: „შუალედურ ჯამებს ელექტრონულ ცხრილში აღვრიცხავ. ბოლო ორი წელი მომგებიანი იყო. მსურს, ასე გავაგრძელო“.

მთელი ინფორმაციის შეგროვების შემდეგ დროა, მიმდინარე წლის მიზნები დაისახოთ. იფიქრეთ, რა უფრო საყურადღებოა და როგორ დაიწყოთ წარმატებისკენ სვლა.

მაგალითისთვის ქვემოთ გთავაზობთ რამდენიმე მიზანს და მათი მიღწევის ხერხებს:

1. მეტი ჯავშნისა და შემოსავლის მიღება
სწორ საფასო პოლიტიკას ერთი ცდით ვერ შეიმუშავებთ. თქვენს ფინანსურ მიზნებს რომ მიაღწიოთ და სტუმრებიც დააინტერესოთ, სცადეთ, მაგალითად, შინაური ცხოველების გადასახადის დაწესება ან გრძელვადიან ჯავშნებზე ფასდაკლებების შეთავაზება.

წარმატებული მასპინძლობისთვის მნიშვნელოვანია, განცხადება განახლებული გქონდეთ. გაითვალისწინეთ ადგილობრივი სამოგზაურო ტენდენციები სეზონურობასთან ერთად (პიკის და მაღალი/დაბალი მოთხოვნის სეზონები) და შესაბამისად განსაზღვრეთ ხელმისაწვდომობა კალენდარში.

სუპერმასპინძელი ენდრიუ ბერლინიდან გირჩევთ, რომ საუკეთესო სტრატეგიის შემუშავების პროცესში მოთმინება გამოიჩინოთ და სტუმრების კმაყოფილებაზე კონცენტრირდეთ. „არაერთი Airbnb საცხოვრებელი მთელი წლის განმავლობაში სრულად იჯავშნება, თუმცა ამის მისაღწევად საჭიროა ტენდენციების სწორი ანალიზი და მიმოხილვებიდან დადებითი რეპუტაციის მოპოვება, რასაც, როგორც წესი, მთელი ერთი წელი სჭირდება“, — აღნიშნავს ის.

2. უკეთესი მიმოხილვების მიღება
სტუმრებს რომ სათანადო მოლოდინი შეუქმნათ, აღწერეთ საცხოვრებელი საუკეთესოდ და წარმოაჩინეთ სტუმრებისთვის სასურველი საყოფაცხოვრებო პირობები, როგორიცაა სწრაფი ინტერნეტ‑კავშირი და სამზარეულო საჭირო მარაგით. არ დაგავიწყდეთ, დაამატოთ საცხოვრებლის მაღალი ხარისხის ფოტოები.

“, ამბობს ენდრიუ და დასძენს: „მთავარია, სურათი თვალისმომჭრელი ფერებით სავსე და მკაფიო იყოს, მასზე გამოსახული ობიექტი კი მცირე ფორმატშიც სრულად ჩანდეს)“.

სტუმრებისთვის სისუფთავეც უაღრესად მნიშვნელოვანია. საცხოვრებლის უზადო სისუფთავე დადებით მიმოხილვებში აისახება. სტუმრებმა თავი მშვიდად რომ იგრძნონ, აცნობეთ მათ, როგორ ზრუნავთ საცხოვრებლის დასუფთავებასა და სანიტარიული წესით დამუშავებაზე.

3. მასპინძლობის პროცესის გამარტივება
რეგულარული ამოცანების შესრულების უფრო ეფექტური ხერხების პოვნა მასპინძლობის გამარტივებასა და მიზნების მიღწევაში დაგეხმარებათ. სცადეთ მზა პასუხებისა და დაგეგმილი შეტყობინებების გამოყენება სტუმრებთან კომუნიკაციის პროცესის ავტომატიზაციისთვის.

დროის დაზოგვაში, ასევე, დაგეხმარებათ დაბინავების პროცედურის გამარტივება, დასუფთავების პროცედურის ოპტიმიზაცია და სახლის მკაფიო წესების შედგენა. „სახლის წესები სამართლებრივ დოკუმენტს არ უნდა ჰგავდეს, ასე მათ არავინ წაიკითხავს“, — ამბობს რენატა, სუპერმასპინძელი რიო‑დე‑ჟანეიროდან.

მასპინძლობის კუთხით რა მიზნებიც არ უნდა გქონდეთ, ჩვენ მუდამ მზად ვართ, რომ მათ მიღწევაში დაგეხმაროთ და ეს წელი თქვენთვის საუკეთესო წლად ვაქციოთ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.