ბიზნესგეგმის შემუშავება მასპინძლობისთვის

ნიკა და სარა რუსოს-კარაკაიანები სუპერმასპინძელი ცოლ-ქმარია (@nestrs) კოლუმბუსიდან (ოჰაიოს შტატი), რომლებმაც Airbnb‑ს მეშვეობით მასპინძლობა ძირითადი შემოსავლის წყაროდ აქციეს. 2012 წელს წყვილმა პირველი განცხადება გამოაქვეყნა Airbnb‑ზე — ეს ნიუ-იორკში მდებარე პატარა სარდაფი იყო. ამის შემდეგ, მასპინძლობა მათ საოცნებო საქმედ იქცა. ამას გარდა, სარა პოდკასტის „Thanks for Visiting“ („მადლობა სტუმრობისთვის“) თანაწამყვანია, რომელიც სასარგებლო ინფორმაციას უზიარებს როგორც გამოცდილ, ისე ახალბედა მასპინძლებს. აქ შეიტყობთ უამრავ რჩევას, თუ როგორ წამოიწყოთ ბიზნესი Airbnb‑ს მეშვეობით.

სარა: „ჩვენთვის ყველაფერი ნიუ-იორკში, კონკრეტულად კი ქუინზში დაიწყო. მსახიობი ვიყავი და, შეთავსებით, ბარებშიც ხშირად ვმუშაობდი“.

ნიკი: „მე კი სტაჟიორი ვიყავი მაგისტრის ხარისხით არქიტექტურაში და საკუთარი თავის გამოკვებასაც ძლივს ვახერხებდი...“

სარა: „ორივეს ძალიან გვინდოდა უძრავი ქონების ფლობა, მაგრამ არ ვიცოდით როგორ მიგვეღწია ამისთვის. ერთ დღესაც თვალი მოვკარი ამ სულ პატარა სახლს — ალბათ, უბანში ყველაზე პატარაც კი იყო, მაგრამ მისი საყიდელი თანხა არ გვქონდა. მტკიცედ გადავწყვიტე, როგორმე მეპოვა ამ სახლის შეძენის გზა“.

ნიკი: „სწორი ფინანსური რჩევებით, დანაზოგებითა და ოჯახის მხარდაჭერით სესხის აღება შევძელით“.

სარა: „ამ დროს გავიგე, რომ ჩემი მეგობარი საკუთარი ბინის ერთ ოთახს Airbnb‑ს მეშვეობით სტუმრებს სთავაზობდა, რაც მას ნიუ‑იორკში ქირის გადახდაში ეხმარებოდა. მაშინ ეს იდეა წარმოუდგენლად მომეჩვენა. მაშინ არცთუ ისე ბევრმა იცოდა Airbnb‑ს შესახებ. ძალიან დავინტერესდი და ნიკს მოვუყევი იმ შესაძლებლობების შესახებ, რომლებსაც ჩვენი საცხოვრებლის სტუმრებისთვის შეთავაზება მოგვიტანდა. ნიკი ყოყმანობდა, მაგრამ ეს ნაბიჯი საბოლოოდ მაინც გადავდგით და ჩვენი თავგადასავალიც დაიწყო“.

ნიკი: „ტუალეტებს ვწმენდდი და ამით ძალიან ბედნიერი ვიყავი, რადგან ეს ჩვენი იპოთეკის საფასურს იხდიდა. იმაზეც კი ვფიქრობდი, საქმიანობა უფრო მეტად როგორ გაგვეფართოებინა“.

სარა: „ადრე ლუქს-კლასის სასტუმროებში ვმუშაობდი და ეს გამოცდილება ძალიან გამომადგა. ნიუ-იორკში ოთხწლიანი მასპინძლობისა და სახლის მეპატრონეობის შემდეგ, კარზე დეველოპერმა მოგვიკაკუნა და ჩვენი საცხოვრებლის ავეჯთან ერთად შეძენის სურვილი გამოთქვა“.

ნიკი: „ბევრი ვიფიქრეთ, სასურველი დანიშნულებების სიაც შევადგინეთ, ქვეყნის გარშემო ვიმოგზაურეთ და ადგილობრივებს ვესაუბრეთ, საბოლოოდ კი კოლუმბუსში, ოჰაიოს შტატში, ამოვყავით თავი“.

სარა: „სტუმრების მასპინძლობა, უძრავი ქონების მართვა და მისი დიზაინი, უფრო მეტიც, ამ პროცესში შემოქმედებითი თავისუფლების ქონა — ეს ჩვენი ახდენილი ოცნებაა. სწორედ ამიტომ, დიდი სიამოვნებით ვეხმარებით სხვებს და ვუზიარებთ ჩვენს გამოცდილებას“.

სარა: „დაწყებამდე დაისახეთ მიზანი, რომლსაც არ გადაუხვევთ მაშინაც კი, როცა დარწმუნებული არ იქნებით, რა მიმართულებით წახვიდეთ ან რა გადაწყვეტილებები მიიღოთ. ეს დაგეხმარებათ სწორ გზაზე დადგომაში და გიკარნახებთ, როგორ მოაწყოთ თქვენი სივრცე“.

ნიკი: „მიზნის დასახვისას დაუსვით რამდენიმე შეკითხვა საკუთარ თავს:

• რა გაძლევთ მოტივაციას?
• რა ღირებულებები გაქვთ?
• როგორი საქმიანობა გსურთ?
• როგორია თქვენი ხედვა?
• რა ამოცანები გაქვთ?“

სარა: „ჩვენი მიზანია, გარდავქმნათ სივრცეები და ასე შევცვალოთ ადამიანების ცხოვრება. ვცდილობთ, ეს აზრი ყოველთვის გვქონდეს თავში“.

ნიკი: „პირველ რიგში, გამოიკვლიეთ თქვენი კონკურენტები. მოპოვებული ინფორმაცია დაგეხმარებათ, განსაზღვროთ, როგორი დიზაინი, ბრენდინგი და მარკეტინგი დაგჭირდებათ შეთავაზებული საცხოვრებლისთვის.

• იფიქრეთ თქვენს პოტენციურ სტუმრებზე. ვინ შეიძლება დაჯავშნოს თქვენ მიერ შეთავაზებული საცხოვრებელი? მაგალითად, კოლუმბუსი სტუდენტური ქალაქია, ამიტომ ჩვენი სივრცე მაქსიმალურად მოვარგეთ მათ მოსანახულებლად ჩამოსული მშობლების საჭიროებებს.
• შეაფასეთ შეთავაზებული საყოფაცხოვრებო პირობები. საცხოვრებელში შინაური ცხოველები დაიშვებიან? საპარკინგე ადგილი ან აუზი თუ გაქვთ? სივრცე უნიკალურადაა გაფორმებული? ყველაფერი, რაც თქვენს საცხოვრებელს გამოარჩევს, გაძლევთ საშუალებას, რომ სხვებთან შედარებით უფრო მაღალი ფასი დააწესოთ.
• დაიხმარეთ ინტერნეტი და გადახედეთ ახლომახლო შეთავაზებულ Airbnb განცხადებებს, სასტუმროებსა თუ საცხოვრებლებს მოკლევადიანი გაქირავებისთვის. როგორი სივრცეებია ხელმისაწვდომი და რა თანხის სანაცვლოდ? რამით ხომ არ გამოირჩევა თქვენ მიერ შეთავაზებული საცხოვრებელი მათ შორის?
• შეიმუშავეთ საფასო პოლიტიკა. დაკავებულობის მაჩვენებლების გასაზრდელად გამოიყენეთ Airbnb‑ს გონივრული ფასწარმოქმნის ხელსაწყო, რომლის საშუალებითაც შეძლებთ ავტომატურად ცვალოთ ტარიფები სამუშაო დღეებსა და შაბათ-კვირებს შორის.

სარა: „ბიუჯეტის შედგენა არცთუ ისე მიმზიდველი საქმეა, მაგრამ აუცილებელია. გირჩევთ, შეადგინოთ ელექტრონული ცხრილი და დააჯგუფოთ ხარჯები სამ კატეგორიად:

წინასწარი ხარჯები: საწყისი ინვესტიციები საცხოვრებელში. ეს შეიძლება იყოს სარემონტო სამუშაოები, დეკორი, ავეჯი და ფოტოგადაღება.

• არ დაგენანოთ თანხა დეკორისთვის. სულაც არ არის აუცილებელი, ძვირადღირებული ნივთები იყიდოთ ან ყველაფერი ლუქს-კლასის იყოს. მთავარია, მყუდრო სივრცე მოაწყოთ. მოიძიეთ ნივთები მეორად მაღაზიებში, ან ჩართეთ ფანტაზია და სტუმრების გულის მოგება განსხვავებული ფერებითა თუ სტილით სცადეთ.
• დამწყებ მასპინძლებს ყოველთვის ვურჩევთ, არ დაიშურონ თანხა კომფორტული მატრასების, ტახტებისა და თეთრეულის შესაძენად. სასტუმროს ნომერში შესვლისას პირველად ყველა საწოლს ამოწმებს, ამიტომ დახვდით სტუმრებს მომზადებული. ზოგჯერ 5‑ვარსკვლავიან მიმოხილვას მხოლოდ საწოლის გამო ვიღებთ, ეს კი დაკავებულობის მაჩვენებლის გაზრდაში გვეხმარება.

მიმდინარე ხარჯები: სტუმრის მიერ მოხმარებული ნივთები, რომელთა განახლებაც სულ დაგჭირდებათ. ესენია: პირადი ჰიგიენის ნივთები, ქაღალდის ხელსახოცები, ტუალეტის ქაღალდი, ბატარეები, ნათურები და სხვა.

• სტუმრებს დამატებით რაიმეს ხომ არ ახვედრებთ? მაგალითად, წყალს ან ყავას.
• შეადგინეთ საჭირო საყოფაცხოვრებო პირობების სია და ეცადეთ, ყველაფერი მისაღებ ფასში იყიდოთ.
• წინასწარ შეიძინეთ რამდენიმე თვის მარაგი და რაოდენობები ელექტრონულ ცხრილში აღრიცხეთ.
• გამოთვალეთ, წელიწადში რამდენჯერ დაგჭირდებათ ისეთი ნივთების ყიდვა, როგორიცაა, მაგალითად, თეთრეული. სტუმრებს ყოველთვის სუფთა, ლამაზი თეთრეული უნდა დაახვედროთ.

რემონტისა და მართვის ხარჯები: მოიცავს ყველაფერს, რაც საჭიროა, რომ თქვენი საცხოვრებელი უსაფრთხო, მყუდრო და კომფორტულ ადგილად იქცეს. ამ კატეგორიაში შედის გაზონისა და გარე სივრცეების მოწყობაც. სახლის საქმეებში დასახმარებლად დამლაგებელს დაიქირავებთ, თუ გუნდში თანამასპინძელს დაიმატებთ?

დაიანგარიშეთ ხარჯები და ეცადეთ, რეალისტური მიზნები დაისახოთ. თუ გეგმების განსახორციელებლად თანხა არ გყოფნით, წინასწარ დაიწყეთ თანხის დაზოგვა, რომ მოაწყოთ სივრცე, რომლითაც კმაყოფილი დარჩებით“.

სარა: „ეს ჩემი ერთ-ერთი საუკეთესო რჩევაა მასპინძლებისთვის: მოიწვიეთ რომელიმე გულწრფელი და პირდაპირი მეგობარი საცხოვრებელში. ყოველდღიურად თქვენს სივრცეს იმდენ დროს უთმობთ, რომ, შესაძლოა, მოგზაურისთვის საჭირო მარტივი წვრილმანები გამოგეპაროთ. ეს შეიძლება იყოს კბილის ჯაგრისი ან კბილის პასტა, ან, სულაც, მცირე ხარვეზი დიზაინში. მეგობრისგან სასარგებლო რჩევებს მიიღებთ ამ მოსაწყენ, თუმცა მნიშვნელოვან დეტალებთან დაკავშირებით. ჯობს, მეგობარმა მოგცეთ შენიშვნა, ვიდრე ჯავშნის მქონე სტუმარმა“.

ნიკი: „სტუმრებს პირადი ჰიგიენის ნივთებით სავსე კალათს ვახვედრებთ იმ შემთხვევისთვის, თუ რამე სახლში დარჩათ. ამ ბიზნესში წარმატების მისაღწევად სულ იმაზე უნდა იფიქროთ, რა სურთ სტუმრებს. რატომ ირჩევს უამრავი ადამიანი ნაცნობი ბრენდების სასტუმროებს? — რადგან იციან, რა დახვდებათ: ნომერი, რომელშიც თავს პირველ სტუმრებად იგრძნობენ, სუფთად დაკეცილი პირსახოცები და ყველა საჭირო პირობა, ისეთი დეტალების ჩათვლით, როგორიცაა ტელეფონის დამტენი საწოლთან ახლოს. სწორედ ასეთი მომსახურების დონე უნდა შესთავაზოთ სტუმრებს, რომ სულ მოუნდეთ თქვენთან დაბრუნება“.

ნიკი: „მასპინძლობა რთულია, მაგრამ მას შემდეგ, რაც Airbnb პირველად გამოჩნდა, ბევრი რამ შეიცვალა. ახლა გაცილებით მეტი ტექნოლოგია, ხელსაწყოები, რესურსები და მხარდაჭერაა ხელმისაწვდომი, რაც მასპინძლებს პროცესის ორგანიზებაში გვეხმარება და ცხოვრებას გვიმარტივებს“.

სარა: „დამწყებ მასპინძლებს ყოველთვის ვურჩევთ, მასპინძლობის პროცესი თავიდან ბოლომდე გამოცადონ: იქნება ეს პირველი ჯავშნის მიღება, სტუმრების დახვედრა, საცხოვრებლის დასუფთავება თუ მოწყობა. მას შემდეგ, რაც ყველა ნიუანსს კარგად გაითავისებთ, პროცესის ავტომატიზაცია სხვადასხვა ხერხებით შეგეძლებათ:

• ვებაპები: ეს არის აპები (მაგალითად, IFTTT), რომლებიც მოვლენების გაშვების დასაპროგრამებლად და ციფრული ხელსაწყოების ერთმანეთთან დასაკავშირებლად გამოიყენება. მაგალითად, როცა ჯავშნის დამადასტურებელ ელწერილს მიიღებთ, პროგრამა კალენდრის მეშვეობით ავტომატურ შეხსენებას გამოგზავნის თქვენთან, თქვენს პარტნიორთან ან დამლაგებელთან.
• გონიერი საკეტები: სტუმრები იღებენ უნიკალურ კოდს, რომელიც მხოლოდ მათი სტუმრობის განმავლობაში მოქმედებს. შესაბამისად, მათ შეუძლიათ საცხოვრებელში დამოუკიდებლად დაბინავდნენ და ჩვენი დახვედრა აუცილებელი აღარ არის. საკმარისია, სტუმრობის განმავლობაში დავეკონტაქტოთ.
• ორგანიზებული სიები: თითოეული საცხოვრებლისთვის, რომელსაც ვმართავ, კვარტალური საკონტროლო სია შევადგინე. ჩამონათვალში შედის აქტივობები, რომლებიც უსაფრთხოების უზრუნველსაყოფად და ტექნიკური მომსახურებისთვის დამჭირდება, მაგალითად, ქურის ფილტრებისა და ხანძარსაწინააღმდეგო სიგნალიზაციის ელემენტების შემოწმება, საწოლების ქვეშ გამოხვეტა და ა.შ.. ამობეჭდილ სიას გარდერობში ვკიდებ, რომ შემოწმებისას მის მიხედვით შევაფასო საცხოვრებლის მდგომარეობა მთელი წლისთვის“.

ნიკი: „Airbnb‑ს მეშვეობით ბიზნესის დაწყება დიდ შრომას მოითხოვს, მაგრამ გვსურს, ყველას დავანახოთ, რომ უძრავი ქონების ფლობა და მასპინძლობით ძირითადი შემოსავლის მიღება შესაძლებელია, თანაც  — არაერთი გზით“.

სარა: „როცა კარიერის შეცვლა მომიწია, მეშინოდა, რომ ვეღარ ვიპოვიდი საქმეს, რომელიც ისეთივე სიამოვნებას მომანიჭებდა, როგორც სცენაზე გამოსვლა, მაგრამ Airbnb‑მ გარდამტეხი მნიშვნელობა იქონია ჩვენს ცხოვრებაზე. რაც ყველაზე მთავარია, სრული შემოქმედებითი თავისუფლება გვაქვს და საკუთარი თავის უფროსები ვართ“.

ნიკი: „მოქნილი გრაფიკით ცხოვრება უფრო სასიამოვნოა. ვიმედოვნებთ, რომ თქვენც შეძლებთ Airbnb‑ს მეშვეობით საკუთარი ბიზნესის დაწყებას. თუ რჩევა დაგჭირდებათ, მოგვმართეთ“.

წარმატებულ მასპინძლობას გისურვებთ!
ნიკი და სარა, Nestrs