მიმოხილვების მნიშვნელობის შესახებ

მიმოხილვები და შეფასებები ეხმარება სტუმრობის მსურველს, გადაწყვიტოს, რამდენად შესაფერისია მისთვის ესა თუ ის საცხოვრებელი. რაც უფრო უკეთესი მიმოხილვები თუ შეფასებები გექნებათ, მით უფრო დიდი ალბათობით მიიღებთ ჯავშნებს და გაზრდით შემოსავალს.

მასპინძელსა და სტუმარს, რომელმაც დაჯავშნა საცხოვრებელი, ერთმანეთის მიმოხილვისთვის სტუმრობის დასრულებიდან 14 დღე აქვთ. მიმოხილვები ქვეყნდება, როცა ორივე მხარე დაასრულებს მათ დაწერას, ან მიმოხილვის 14‑დღიანი პერიოდის ამოწურვის შემდეგ (გააჩნია, რომელი მოხდება უფრო ადრე).

სტუმრებისგან, შესაძლოა, რამდენიმე სახის გამოხმაურება მიიღოთ. კერძოდ:

• პირადი კომენტარი. ამ ტიპის გამოხმაურება არ დაერთვება თქვენს განცხადებას და არც შეფასებაზე აისახება.
• საჯარო მიმოხილვა. ამ ტიპის გამოხმაურება დაერთვება როგორც თქვენს განცხადებას, ისე პროფილს. თუ საჯარო მიმოხილვაზე პასუხის გაცემას გადაწყვეტთ, ისიც საჯაროდ გამოქვეყნდება სტუმრის მიერ დატოვებული მიმოხილვის ქვეშ.

ნაგულისხმევად, მოცემული იქნება უახლესი მიმოხილვები. ამას გარდა, სტუმრებს საშუალება აქვთ, მოიძიონ კონკრეტული ტექსტი მიმოხილვებში, ასევე, დაალაგონ ისინი სიახლის ან უმაღლესი/უდაბლესი შეფასების მიხედვით.

აღიქვით სტუმრებისგან მიღებული გამოხმაურება შემდგომი განვითარების შესაძლებლობად. გაეცანით თითოეულ მიმოხილვას, საჭიროებისამებრ კი გაეცით კონსტრუქციული პასუხი, რითაც აგრძნობინებთ სტუმრობის მსურველებს, რომ გამოხმაურებას სერიოზულად ეკიდებით.

სტუმრებს ვთხოვთ, 1‑დან 5‑მდე ვარსკვლავით შეაფასონ როგორც ზოგადი შთაბეჭდილებები სტუმრობასთან დაკავშირებით, ისე მისი 6 სხვადასხვა ასპექტი, რომლებიც მოცემულია კატეგორიების სახით. გაითვალისწინეთ, რომ საერთო შეფასება არ არის სხვადასხვა კატეგორიის მიხედვით მიღებული შეფასებების საშუალო მაჩვენებელი.

კატეგორიებს განეკუთვნება:

• დაბინავება. ფასდება ის, თუ რამდენად მარტივი იყო საცხოვრებლის პოვნა და შიგნით მოხვედრა.
• სისუფთავე. ფასდება ის, თუ რამდენად სუფთა იყო საცხოვრებელი სტუმრის დაბინავების მომენტში.
• სიზუსტე. ფასდება ის, თუ რამდენად შეესაბამებოდა საცხოვრებელი სტუმრის მოლოდინს განცხადებაში აღწერილის საფუძველზე.
• კომუნიკაცია. ფასდება ის, თუ რამდენად ეფექტური იყო მასპინძელთან კომუნიკაცია ჯავშნის გაფორმების მომენტიდან სტუმრობის დასრულებამდე.
• მდებარეობა. ფასდება ის, თუ რამდენად მოეწონა სტუმარს საცხოვრებლის მიმდებარე ტერიტორია და ზოგადად უბანი.
• ფასი/ხარისხი. ფასდება ის, თუ რამდენად შეესაბამებოდა ხარისხი ფასს.

მას შემდეგ, რაც სამი სტუმარი შეაფასებს თქვენ მიერ განთავსებულ საცხოვრებელს:

• თქვენი განცხადების სათაურთან (როგორც ძიების შედეგებში, ისე განცხადების გვერდზე) აისახება ვარსკვლავებით დაფიქსირებული საერთო შეფასება.
• სტუმრების მიერ დატოვებული მიმოხილვების ზემოთ მოცემული იქნება ვარსკვლავებით დაფიქსირებული საშუალო შეფასება სხვადასხვა კატეგორიაში.
• თითოეული სტუმრის დაწერილ მიმოხილვასთან აღნიშნული იქნება მის მიერ ვარსკვლავებით დაფიქსირებული საერთო შეფასება, რაც გამოხმაურების ტექსტს ერთგვარ კონტექსტში ჩასვამს.

შეფასებები Airbnb‑ს ეხმარება მოწინავე მასპინძლებისა თუ საცხოვრებლების პოვნასა და გამორჩევაში — მაგალითად, სუპერმასპინძლის ან „სტუმართა რჩეულის“ სტატუსის მინიჭებით.

სუპერმასპინძლებს განსაკუთრებული სტუმარ‑მასპინძლობის ისტორია გამოარჩევს. მათ უნდა შეინარჩუნონ მინიმუმ 4,8‑ვარსკვლავიანი საერთო შეფასება და სხვა კრიტერიუმებიც დააკმაყოფილონ.

სტუმართა რჩეულების სახით Airbnb‑ს პლატფორმაზე წარმოდგენილია სტუმრების ყველაზე საყვარელი 2 მილიონი საცხოვრებელი. ისინი შეირჩევა მრავალი ფაქტორის გათვალისწინებით, მათ შორისაა შესანიშნავი მიმოხილვები, 4,9 ვარსკვლავზე მაღალი საშუალო შეფასებები და მაღალი მაჩვენებლები ექვსივე კატეგორიაში.

სტუმრების მიმოხილვით მათ ერთგვარად შეახსენებთ, რომ თქვენც დაგიტოვონ მიმოხილვა. თქვენ მიერ დაწერილი მიმოხილვა დაერთვება იმ სტუმრის პროფილის გვერდს, რომელმაც გააფორმა ჯავშანი. ამას გარდა, ის აისახება იმ ადამიანების პროფილებშიც, რომლებიც დაფიქსირდნენ ჯავშანში. მიმოხილვის დროს გაითვალისწინეთ შემდეგი:

• გამოხატეთ მადლიერება. მარტივი შეტყობინებაც საკმარისია, მაგალითად, შემდეგი ტიპის: „გმადლობთ სტუმრობისთვის!“.
• აღნიშნეთ დეტალები. მაგალითად, შეგიძლიათ აღნიშნოთ შემდეგი: „სტუმარმა იდეალურად დაიცვა საცხოვრებლიდან გასვლის ინსტრუქცია“.
• გამოიჩინეთ პატივისცემა. უმჯობესია, თუ სათუთ საკითხებს სტუმრისთვის განკუთვნილ პირად კომენტარში შეეხებით.

სტუმრების შეფასებას გთხოვთ რამდენიმე კატეგორიის (კერძოდ, სისუფთავის, კომუნიკაციისა და სახლის წესების დაცვის) მიხედვით. თქვენ მიერ დატოვებული გამოხმაურება ხელს უწყობს სტუმრების მიერ იმ ძირითადი წესების დაცვის გაკონტროლებას, რომელთა მიხედვითაც ისინი უნდა გაუფრთხილდნენ საცხოვრებელს და დაიცვან სახლის წესები.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.