მზა პასუხების გამოყენება დროის დაზოგვის მიზნით

სტუმრები მასპინძლებს ხშირად ერთსა და იმავე შეკითხვებს უსვამენ: Wi‑Fi ქსელის პაროლი რა არის? ჰიდრომასაჟის აუზი როგორ ჩავრთო? რომელ რესტორანს მირჩევთ? 

საჭიროებისამებრ, „შეტყობინებების“ ჩანართიდან შეგიძლიათ შეადგინოთ მზა პასუხები, რომელთაც შემდეგ ხშირად დასმულ შეკითხვებზე პასუხების სწრაფად გასაცემად გამოიყენებთ.

მზა პასუხები გულისხმობს შეტყობინებების მოკლე შაბლონებს, რომლებიც სხვადასხვა თემას ეხება. ისინი წინასწარ უნდა შეიქმნას, რომ შემდეგ შესაძლებელი იყოს მათი გამოყენება სტუმართან მიმოწერისას. ამას გარდა, შეგიძლიათ შეტყობინებების გაგზავნის დაგეგმვა, რომ გარკვეული ინფორმაცია ავტომატურად გაზიარდეს კონკრეტულ მომენტებში, მაგალითად, დაბინავებამდე ერთი დღით ადრე.

მზა პასუხები დაგეხმარებათ სტუმრებთან უფრო ეფექტურ კომუნიკაციაში და ხელს შეგიწყობთ, გაამართლოთ მათი მოლოდინი. „შაბლონები დროის ნამდვილი ეკონომიაა“, — ამბობს სალი, მასპინძელი სნოკუალმიდან (ვაშინგტონი, აშშ), და დასძენს: „სტუმრების ოთხ შეკითხვას 10 წუთზე ნაკლებ დროში ვუპასუხებ“.

მიმოწერის პარამეტრებიდან მზა პასუხების შექმნა მარტივია. სურვილისამებრ, შეგიძლიათ, შექმნათ ახალი შაბლონები, ან აირჩიოთ თემა — მაგალითად, საცხოვრებლიდან გასვლის ინსტრუქცია, საცხოვრებლამდე მისასვლელი გზა ან Wi‑Fi ქსელის პაროლი — რომლის ჩასწორებაც გსურთ უკვე არსებულ შაბლონებში.

უმჯობესია, თუ მზა პასუხები იქნება მოკლე და მხოლოდ ერთ საკითხზე კონცენტრირებული. მაგალითად, დაბინავების ინსტრუქციის გასაზიარებლად შეგიძლიათ მოამზადოთ ცალკე მზა პასუხი, ხოლო სტუმრის ცნობარისთვის — ცალკე. იდეებისთვის ქვემოთ შეგიძლიათ გაეცნოთ მზა პასუხების მაგალითებს.

მზა პასუხებში ცვლადების გამოყენებით მათ პერსონალურ ელფერს შესძენთ. შეტყობინების გაგზავნისას ცვლადები ავტომატურად შეავსებს სხვადასხვა ტიპის ინფორმაციას ჯავშანთან, საცხოვრებელთან ან სტუმართან დაკავშირებით. მაგალითად, მიეთითება:

• სტუმრის სახელი
• შესვლის თარიღი
• შესვლის დრო
• განცხადების სახელი
• საცხოვრებლის მისამართი
• Wi‑Fi ქსელის პაროლი

ცვლადების უმეტესობის შემთხვევაში ინფორმაცია განცხადებაში მითითებული ცნობების საფუძველზე ივსება, ამიტომ იზრუნეთ მონაცემების სისრულესა და აქტუალობაზე. ცარიელი ცვლადების შემცველი შეტყობინება სწორად არ გაიგზავნება.

მზა პასუხების გამოყენება სტუმრებთან მიმოწერის ნებისმიერ ეტაპზე შეგიძლიათ. მზა პასუხებზე წვდომისთვის აირჩიეთ შეტყობინების აკრეფის გრაფასთან მოცემული ხატულა. ამას გარდა, შეგიძლიათ ისარგებლოთ ხელოვნური ინტელექტის მიერ მზა პასუხების შემოთავაზების ფუნქციით.

ხელოვნური ინტელექტი ცნობს, დაახლოებით რაზე არის საუბარი სტუმრებთან მიმოწერასა და მზა პასუხებში. ის ავტომატურად შემოგთავაზებთ, თქვენ მიერ უკვე შედგენილი მზა პასუხებიდან რომლის გამოყენება ჯობს ამა თუ იმ შეკითხვაზე პასუხის გასაცემად.

შემოთავაზებული მზა პასუხი მოცემული იქნება სტუმართან მიმოწერაში და მას მხოლოდ თქვენ დაინახავთ. მზა პასუხის გაგზავნამდე მისი ჩასწორების საშუალება გექნებათ.

გთავაზობთ ცვლადების შემცველი მზა პასუხების რამდენიმე მაგალითს. ცვლადების ჩასასმელად ისარგებლეთ ჩამოსაშლელი მენიუთი. ისინი არ იმუშავებს, თუ მათ ხელით აკრეფთ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.