საფასო პოლიტიკის დასახვა

ფასი ერთ‑ერთი ძირითადი ფაქტორია, რომლის მიხედვითაც სტუმრობის მსურველები საცხოვრებელს არჩევენ. აქედან გამომდინარე, რამდენად არაჩვეულებრივ საცხოვრებელსაც არ უნდა სთავაზობდეთ მათ, თუ ახლომახლო მსგავსი ვარიანტები უფრო იაფი ღირს, დიდი ალბათობით, ჯავშნებს ხელიდან გაუშვებთ.

საცხოვრებლები, რომლებზე დაწესებული ფასებიც ოთხჯერ შეიცვალა 2022 წელს, 30%‑ზე მეტი ღამით დაიჯავშნა იმ ვარიანტებთან შედარებით, რომელთა ფასებიც არ შეცვლილა.* გთავაზობთ რამდენიმე რჩევას, რომლებიც თქვენთვის მოსახერხებელი საფასო პოლიტიკის არჩევაში დაგეხმარებათ.

გამოიყენეთ კალენდარი, რომ შეადაროთ რუკაზე ასახული ახლომდებარე საცხოვრებლების საშუალო ფასი თქვენ მიერ დაწესებულს. სურვილისამებრ, შეგიძლიათ აირჩიოთ დაჯავშნილი ან დაუჯავშნელი საცხოვრებლების ჩვენება.

რუკის გამოყენებით ფასების შესადარებლად:

• აირჩიეთ ნებისმიერი ცალკეული თარიღი ან მაქსიმუმ 31 ღამისგან შემდგარი დიაპაზონი.

• შეხებით ან დაწკაპუნებით აირჩიეთ თქვენ მიერ ერთ ღამეზე დაწესებული ფასი, შემდეგ კი ღილაკი, რომელზეც მოცემულია მდებარეობის ნიშნული ტექსტით „მსგავსი საცხოვრებლები“ და ფასების დიაპაზონი.

რუკაზე აღნიშნული იქნება თითოეული (როგორც დაჯავშნილი, ისე დაუჯავშნელი) საცხოვრებლის საშუალო ფასი არჩეული თარიღებისთვის. საცხოვრებლების მსგავსებას განაპირობებს სხვადასხვა ფაქტორი, მაგალითად, მდებარეობა, ფართობი, თავისებურებები, საყოფაცხოვრებო პირობები, შეფასებები, მიმოხილვები და ის, თუ სხვა რომელ ვარიანტებს ეცნობიან სტუმრობის მსურველები თქვენი განცხადების პარალელურად.

სტუმრების მიერ გადასახდელი თანხის გარკვევა, შესაძლოა, დაგეხმაროთ სტუმრებისთვის ხელსაყრელი ფასის დაწესებასა და შემოსავლის კუთხით თქვენი მიზნების მიღწევაში. ჯამური ფასი მოიცავს ერთი ღამის ფასსა და თქვენ მიერ დაწესებულ დამატებით გადასახადებს (მაგ., დასუფთავებისთვის, დამატებითი სტუმრებისა თუ შინაური ცხოველებისთვის), ასევე, Airbnb‑ს მომსახურების გადასახადებსა და ოფიციალურ მოსაკრებლებს.

რაც უფრო კონკურენტუნარიანი ფასები გექნებათ დაწესებული, მით უფრო დიდი ალბათობით იქნება თქვენი განცხადება სხვებისგან გამორჩეული და ის უკეთეს პოზიციებზე მოხვდება ძიების შედეგებში. ალგორითმი პრიორიტეტს ანიჭებს როგორც საცხოვრებლის ჯამურ ფასს, ისე მის ხარისხს ადგილობრივ დონეზე სხვა მსგავს ვარიანტებთან შედარებით.

ზოგიერთი ხარჯი, რომელსაც ფასის განსაზღვრისას ითვალისწინებთ, შესაძლოა, პოტენციური სტუმრებისთვის ნაკლებად აშკარა იყოს. თუ მათ სთავაზობთ რაიმე განსაკუთრებულს — მაგალითად, სრულ საუზმეს, ხელით დამზადებულ სააბაზანო საშუალებებს ან სტრიმინგული სერვისების დიდ არჩევანს — აუცილებლად აღნიშნეთ ამის შესახებ საცხოვრებლის აღწერილობაში, რომ სტუმრობის მსურველებს საცხოვრებელზე სათანადო წარმოდგენა შეექმნათ.

ფასდაკლებებისა და პრომოაქციების დაწესება დაგეხმარებათ, კონკრეტულ შემთხვევებში ფასები შეამციროთ იმგვარად, რომ ერთ ღამეზე თქვენ მიერ განსაზღვრული სტანდარტული ფასის შეცვლა არ მოგიწიოთ. აღნიშნული ხელსაწყოები გამოგადგებათ სხვადასხვა სიტუაციაში, მაგალითად, როცა პირველი სტუმრების ან გრძელი ვადით სტუმრობის მსურველების დაინტერესება გსურთ.

• ახალი განცხადებები: ახალგანთავსებულ საცხოვრებელზე 20%‑იანი ფასდაკლების დაწესება დაგეხმარებათ პირველი სამი ჯავშნის მიღებაში. Airbnb‑ს მონაცემების მიხედვით, მასპინძლები, რომლებიც აღნიშნულ ფასდაკლებას სტუმრებს სთავაზობენ განცხადების ამოქმედებიდან 30 დღის განმავლობაში, უფრო სწრაფად იღებენ პირველ ჯავშანს.

• გრძელვადიანი ჯავშნები: საცხოვრებლები, რომელთა შემთხვევაშიც გათვალისწინებულია ფასდაკლებები მინიმუმ ერთი კვირით ან თვით სტუმრობაზე, როგორც წესი, უფრო დიდი ხნით იჯავშნება, რაც თქვენთვის ნაკლებ საზრუნავს ნიშნავს სტუმრების ცვლის კუთხით. 2022 წლის განმავლობაში Airbnb‑ს მეშვეობით დაჯავშნილი ღამეების დაახლოებით 46% მოდიოდა მინიმუმ ერთკვირიან ჯავშნებზე.

ფასდაკლებებისა და პრომოაქციების დაწესება შესაძლებელია მასპინძლობისთვის განკუთვნილი კალენდრიდან.

*ეფუძნება მსოფლიო მასშტაბით (ჩინეთის, ბელარუსის, რუსეთისა და უკრაინის გარდა) განთავსებული იმ საცხოვრებლების მონაცემებს, რომელთა შემთხვევაშიც, 2022 წლის იანვრიდან დეკემბრამდე პერიოდში, დასაჯავშნად ხელმისაწვდომი იყო მინიმუმ ერთი ღამე, ხოლო გონივრული ფასწარმოქმნა ჩართული არ ყოფილა. დაჯავშნილი ღამეების რაოდენობა დამოკიდებულია სხვა ფაქტორებიც.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.