Airbnb‑ს მეშვეობით მასპინძლობის დაწყება

მასპინძლობაზე ფიქრობთ, მაგრამ არ იცით, როგორ დააინტერესოთ სტუმრები და მათ კომფორტული პირობები შეუქმნათ? ეს საკითხი მხოლოდ თქვენ არ გაღელვებთ. Airbnb‑ს მეშვეობით მასპინძლობა სახალისოა: თქვენ არა მხოლოდ ახალი ადამიანების გაცნობისა და მათთან ურთიერთობის საშუალება გექნებათ, არამედ დამატებით შემოსავალსაც მიიღებთ, თუმცა, ბუნებრივია, საწყის ეტაპზე ბევრი შეკითხვა გექნებათ.

ამ სტატიაში მოგიყვებით, რა გჭირდებათ მასპინძლობის დასაწყებად.

Airbnb‑ს შემთხვევაში, ზედმეტად პატარა თუ თავისებური საცხოვრებლის ცნება არ არსებობს. სტუმრობის მსურველი ნებისმიერი ტიპის საცხოვრებლისთვის მოიძებნება — მთავარია, სტუმრებს მის შესახებ მკაფიო წარმოდგენა შეუქმნათ: გულწრფელად და ზუსტად აღწერეთ თქვენ მიერ სტუმრებისთვის შეთავაზებული ვარიანტის თავისებურებები, მაგალითად, აღნიშნეთ, რომ კარის ღიობები ვიწროა, ანდა რომ კიბე ძველია და ჭრაჭუნობს.

„ერთი თეორია მაქვს, რომლის მიხედვითაც სტუმრები, როგორც წესი, ძალიან ჰგვანან თავიანთ მასპინძლებს“, — გვიზიარებს ჯეიკი, სუპერმასპინძელი ბიგ‑ბერიდან (კალიფორნია), და დასძენს: „თითოეულ საცხოვრებელში მასპინძლის ინდივიდუალურობა იგრძნობა და ის სწორედ იმავე გემოვნებისა თუ ცხოვრების წესის მქონე სტუმრებს იზიდავს“.

ძველი აფიშების ეკლექტიკური კოლექცია გაქვთ? უამრავი წიგნი ხელოვნების ისტორიის შესახებ? აჩვენეთ ისინი სტუმრებს! დაამატეთ დეტალები, რომლებიც ინდივიდუალურობას შესძენს საცხოვრებელს, განცხადებას კი სხვებისგან გამორჩეულად აქცევს.

განცხადების განთავსება სრულიად უფასოა. მომსახურების გადასახადს Airbnb მხოლოდ დადასტურებული ჯავშნებიდან იღებს. როგორც წესი, მისი ოდენობა შეადგენს ჯავშნის შუალედური ღირებულების 3%‑ს და ის ფარავს Airbnb‑ს ხარჯებს (მომხმარებელთა სადღეღამისო მხარდაჭერას, მასპინძელთა დაცვის პროგრამებსა და სხვას).

მაქსიმალურად ვცდილობთ, განცხადების განთავსების პროცესი შეძლებისდაგვარად გაგიმარტივოთ — ამჟამად მხოლოდ 10 ნაბიჯის შესრულება გჭირდებათ. ამასთან, თუ რაიმე შეკითხვა გექნებათ, გახსოვდეთ, რომ ჩვენ მუდამ მზად ვართ თქვენ დასახმარებლად და სხვა მასპინძლებისგანაც შეგიძლიათ რჩევების მიღება.

„ზოგიერთ რეგიონში შეგიძლიათ დაიხმაროთ ბრენდის ელჩი სუპერმასპინძელი. მეც ამ სტატუსით ვეხმარები ახალბედებს“, — ამბობს მაგალი, სუპერმასპინძელი ისტ‑უენატჩიდან (ვაშინგტონი), და დასძენს: „გვსურს, ყველამ დაუბრკოლებლად შეძლოს მასპინძლობის დაწყება“.

თქვენ თავად წყვეტთ, როდის და რა სიხშირით უმასპინძლოთ სტუმრებს Airbnb‑ს მეშვეობით. კალენდრისა და დაჯავშნის პარამეტრების მეშვეობით შეგიძლიათ ხელით დაბლოკოთ თარიღები, როცა საცხოვრებელი მიუწვდომელია, ასევე, განსაზღვროთ შესვლის/გასვლის კონკრეტული საათები, დააწესოთ სტუმრობის მინიმალური ან მაქსიმალური ხანგრძლივობა და სხვა.

„წინასწარვე გადავწყვიტეთ, რომ საცხოვრებლის დაჯავშნა მინიმუმ სამი დღით ყოფილიყო შესაძლებელი“, — ამბობს ლუსი, მასპინძელი აღმოსავლეთ სასექსიდან (ინგლისი), და დასძენს: „ამ შემთხვევაში, ნაკლებად მოგვიწევდა მისი მომზადება ახალი სტუმრებისთვის და არსებული სტუმრებისთვის მეტი ყურადღების მიქცევის საშუალება გვექნებოდა“.

ფასი მხოლოდ თქვენი გადასაწყვეტია. საფასო პოლიტიკის შემუშავებისას გაითვალისწინეთ სხვა ადგილობრივი მასპინძლების ტარიფები, ასევე, წელიწადის დრო და საყოფაცხოვრებო პირობები, რომლებსაც სტუმრებს სთავაზობთ. ყოველივე ეს დაგეხმარებათ ოპტიმალური ფასის პოვნაში.

გახსოვდეთ, რომ მასპინძლობისას თქვენ გვერდით ვართ. Airbnb მასპინძლებს სთავაზობს სხვადასხვა ტიპის მხარდაჭერას. თქვენთვის, მაგალითად, ხელმისაწვდომია:

• რესურსების ცენტრი
• გაერთიანების ცენტრი
• მასპინძელთა კლუბები

მნიშვნელობა არ აქვს, რა ტიპის საცხოვრებლის შეთავაზება გსურთ სტუმრებისთვის, Airbnb‑ს გაერთიანების კარი თქვენთვის ღიაა. „Airbnb‑ს შემთხვევაში, ყველაზე საინტერესო ის არის, რომ ყველანი განსხვავებული ვართ და განსხვავებულ ვარიანტებს ვთავაზობთ სტუმრებს“, — ამბობს მაგალი და დასძენს: „წარმატებულ მასპინძლობას გისურვებთ!“.

ამ სტატიაში მოხსენიებული და ვიდეორგოლში მონაწილე მასპინძლები არ არიან Airbnb‑ს თანამშრომლები და არც Airbnb‑ს მითითებებს ასრულებენ. მათ თავად გამოთქვეს სურვილი, რომ Airbnb‑სთან თანამშრომლობით შეექმნათ ვიდეორგოლი, რომელშიც თავიანთ აზრს დააფიქსირებდნენ. გაზიარებული მოსაზრებები და ცხოვრებისეული ისტორიები ასახავს მათ და არა Airbnb‑ს ოფიციალურ პოზიციას.