შესაფერისია თუ არა ჩემი საცხოვრებელი Airbnb‑სთვის?

შესაძლოა, ფიქრობდეთ, რომ Airbnb‑ზე პოპულარობით ვერ ისარგებლებს თავისუფალი საძინებელი ან იალქნიანი ნავი, სინამდვილეში კი სტუმრებს მრავალი ტიპის საცხოვრებლები მოსწონთ: უნიკალურიც და მოკრძალებულიც.

რა ვარიანტის შეთავაზებასაც არ უნდა აპირებდეთ სტუმრებისთვის, მთავარია, მასში მოაწყოთ მყუდრო ადგილი დასაძინებლად — ისეთი, როგორიც თავად მოგეწონებოდათ. ამასთან, განცხადებაშიც დეტალურად უნდა აღწეროთ, რა გამოარჩევს თქვენ მიერ შეთავაზებულ საცხოვრებელს.

როგორც მინიმუმ, სტუმრებს სჭირდებათ სუფთა, კომფორტული საძინებელი სივრცე და სააბაზანო. რაც შეეხება სამზარეულოს, ის Airbnb‑ზე განთავსებულ ყველა საცხოვრებელს არ აქვს, თუმცა თუ მისი შეთავაზება შეგიძლიათ, მნიშვნელოვანია, მიუთითოთ, სრული სამზარეულო იქნება თუ მინისამზარეულო.

Airbnb‑ს მეშვეობით მასპინძლობა შეუძლია ყველას, ვისაც თავისუფალი საცხოვრებელი სივრცე აქვს. „იდეალური“ საცხოვრებელი არ არსებობს: მთავარია, მისი აღწერილობა და ფოტოები ყველაფერს დაუფარავად და დეტალურად ასახავდეს, სტუმრებს სათანადო მოლოდინი რომ შეექმნათ. Airbnb‑ს მეშვეობით ყველა იპოვის მისთვის შესაფერის ვარიანტს, რადგან ზოგიერთს მხოლოდ ოთახი სჭირდება დასაძინებლად, ზოგი კი ლუქს‑კლასის საცხოვრებელს ეძებს.

Airbnb‑ზე სტუმრების ყურადღების მიქცევა შეუძლია ნებისმიერი ტიპის საცხოვრებელს — იქნება ეს კერძო სახლი, აპარტამენტი თუ ერთი ოთახი კორპუსის ბინაში. ზოგიერთ ვარიანტს უნიკალურობის ნიშნით გამოვყოფთ კიდეც. ასეთია, მაგალითად, სახლები ხეზე, კარვები, მიკროსახლები, ფერმერული საცხოვრებლები თუ ავტოფურგონები.

თქვენ საშუალება გექნებათ, მიუთითოთ, რომ, მაგალითად, საცხოვრებელი მთლიანად სტუმრების განკარგულებაში იქნება ან მათ ცალკე შესასვლელი ექნებათ იზოლირებულ ფლიგელში, ანდაც აღნიშნოთ, რომ, ვთქვათ, საძინებელ სივრცეს, სამზარეულოს ან ტუალეტს გამოიყენებენ სხვებიც (მაგალითად, თქვენი ოჯახის წევრები, თანამობინადრეები ან სხვა სტუმრები). თქვენი გადასაწყვეტია, საცხოვრებელ სივრცეს მთლიანად სტუმრებს დაუთმობთ თუ იქ თქვენს ნივთებსაც დატოვებთ. მთავარია, დაიცვათ სისუფთავე და სათანადო ინფორმაცია მიაწოდოთ სტუმრობის მსურველებს.

დანიელი, მასპინძელი სან‑ფრანცისკოდან, აღნიშნავს, რომ ის ყოველთვის გულახდილად აზიარებს ინფორმაციას საცხოვრებლის შესახებ. „ის, თუ რას უყვებით სტუმრებს საცხოვრებელთან დაკავშირებით და რეალურად რა დახვდებათ, თანხვედრაში უნდა იყოს“, — ამბობს ის და დასძენს: „ჯობს, ზედმეტად შელამაზებულად არ აღწეროთ საცხოვრებელი და მან სტუმრების მოლოდინს გადააჭარბოს, ვიდრე პირიქით“.

თუ სტუმრებს საზიარო სივრცეში შინაური ცხოველები დახვდებათ, როგორც მინიმუმ, აღნიშნეთ ამის შესახებ საცხოვრებლის აღწერილობაში. უკეთესი იქნება, თუ თქვენი ფუმფულა ძაღლის ან მბზინავბეწვიანი კატის ფოტოებს Airbnb‑ზე ატვირთავთ და წარწერაში მიუთითებთ, რომ სტუმრებს, შესაძლოა, მათთან შეხება ჰქონდეთ.

ერთი ფოტო ათას სიტყვას ჯობს, თანაც ზოგიერთი სტუმარი აღწერილობას ბოლომდე არც კითხულობს ჯავშნის გაფორმებამდე. თუ საცხოვრებელს რაიმე უნიკალური თავისებურება აქვს, გირჩევთ, ჯავშნის გაფორმების პროცესში დააზუსტოთ სტუმრობის მსურველთან, გაეცნო თუ არა ის განცხადებას სრულად.

არ არის აუცილებელი, სტუმრებისთვის შეთავაზებული საცხოვრებელი მდიდრულ სასახლეს ჰგავდეს. თუ მისაღებ ფასს დააწესებთ, ბევრი სტუმარი მოკრძალებული პირობებითაც კმაყოფილი დარჩება. მასპინძლობის საწყის ეტაპზე გირჩევთ, სამიზნე ფასზე ოდნავ დაბალი ფასი შეარჩიოთ. ამგვარად მეტ სტუმარს დააინტერესებთ, რამდენიმე შესანიშნავი მიმოხილვის მიღების შემდეგ კი შეძლებთ, თქვენი მიზნების შესაბამისად, ფასიც გაზარდოთ.

დაიხმარეთ ჩვენი გზამკვლევი ეფექტური განცხადების შესაქმნელად

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.