შემომავალი შეტყობინებების ჩანართის გაუმჯობესებები სტუმრებთან კომუნიკაციის სამართავად
რედაქტორის შენიშვნა: სტატია გამოქვეყნდა Airbnb‑ს 2023 წლის ზაფხულის განახლების ფარგლებში. ინფორმაცია, შესაძლოა, შეცვლილიყო მისი გამოქვეყნების შემდეგ. შეიტყვეთ ვრცლად ჩვენი პროდუქტის უახლესი ვერსიის შესახებ.
წარმატებული მასპინძლობისთვის საჭიროა სტუმრებთან ეფექტური კომუნიკაცია, რაც ზოგჯერ დიდ დროს მოითხოვს. სწორედ ამიტომ, კომუნიკაციის გასამარტივებლად, მალე წარმოგიდგენთ ორ ახალ ფუნქციას: შეტყობინებათა წაკითხვის დადასტურებასა და ახალ მზა პასუხებს.
შეტყობინებათა წაკითხვის დადასტურება
მასპინძლებისგან მიღებული გამოხმაურებიდან შევიტყვეთ, რომ გსურდათ, გცოდნოდათ, წაიკითხა თუ არა სტუმარმა თქვენ მიერ გაგზავნილი შეტყობინებები. სწორედ ამ მიზნით, შეტყობინებათა წაკითხვის დადასტურების ფუნქცია შევიმუშავეთ.
როგორც კი თქვენ ან სტუმარი Airbnb‑ს აპის მეშვეობით მოწერილ შეტყობინებას გაეცნობით, მიმოწერაში ბოლო შეტყობინება შესაბამისად აღინიშნება.
ნაგულისხმევად, შეტყობინებათა წაკითხვის დადასტურების ფუნქცია გააქტიურებული იქნება Airbnb‑ს ყველა მომხმარებლისთვის ივნისის დასაწყისში. მის გამოსართავად უნდა გადახვიდეთ ანგარიშის პარამეტრების „კონფიდენციალურობისა და გაზიარების“ სექციაზე.
ახალი მზა პასუხები
მზა პასუხებისა და დაგეგმილი შეტყობინებების ფუნქციები უკვე ისედაც გეხმარებათ დროის დაზოგვაში, თუმცა ამიერიდან საშუალება გექნებათ, დაამატოთ მათ საინფორმაციო ბარათი, რომელიც გადაიყვანს სტუმრებს საცხოვრებლიდან გასვლის ახალ ინსტრუქციაზე.
ამასთან, ზედმეტი დრო რომ არ დახარჯოთ, პირდაპირ სექციაში „შემომავალი“ შემოგთავაზებთ შესაბამის მინიშნებებს. ახლავე აგიხსნით, რას ვგულისხმობთ.
თუ, მაგალითად, სტუმარი მოგწერთ და საცხოვრებლიდან გასვლის შესახებ იკითხავს რამეს, ავტომატურად შემოგთავაზებთ, გაუგზავნოთ მას მზა პასუხი, რომელიც შეიცავს საცხოვრებლიდან გასვლის ინსტრუქციის ბმულს.
თუ საცხოვრებლიდან გასვლის ინსტრუქცია ჯერ არ მოგიმზადებიათ, ავტომატურადვე შემოგთავაზებთ მის შექმნას, რომ შემდეგ მზა პასუხის სახით გაუზიაროთ ხოლმე ის სტუმრებს.
სექცია „შემომავლის“ ეს ახალი ფუნქციები შემოთავაზებულია Airbnb‑ს 2023 წლის ზაფხულის განახლების ფარგლებში, რომელიც მასპინძელთათვის 25 სიახლეს მოიცავს. მოითხოვეთ ადრეული წვდომა, რომ დღესვე დაიწყოთ ახალი ხელსაწყოებით სარგებლობა.