სტუმრების შეტყობინებებზე სწრაფი გამოხმაურების მნიშვნელობა

ყველაზე წარმატებული მასპინძლები სტუმრების შეტყობინებებს მათი მიღებისთანავე პასუხობენ. თუ გამოხმაურების სიხშირის მაღალი მაჩვენებელი გექნებათ, თქვენი განცხადება სტუმრების ძიების შედეგებში უფრო მოწინავე პოზიციებზე აღმოჩნდება.

სწრაფი რეაგირება განსაკუთრებით მნიშვნელოვანია ჯავშნის გაფორმებამდე, როცა სტუმრებს საკმარისი ინფორმაცია არ აქვთ. ასევე, შეეცადეთ, სტუმრებს მალე გამოეხმაუროთ საცხოვრებელში შესვლისა და სტუმრობის დასრულების პერიოდებში. მასპინძლებს, რომლებიც სტუმრებს ელვისებური სისწრაფით პასუხობენ, რამდენიმე რჩევის გაზიარება ვთხოვეთ.

„იზრუნეთ, რომ ყოველთვის გააქტიურებული გქონდეთ Airbnb‑ს აპის, SMS‑ისა და ელფოსტის მეშვეობით გაფრთხილებების მიღება. ამგვარად მობილურიდანვე შეიტყობთ ახალი შეტყობინების მიღების შესახებ“, — ამბობს ომარი, სუპერმასპინძელი მეხიკოდან (მექსიკა).

ამის შემდეგ, პასუხების ავტომატიზაციისთვის, Airbnb‑ს ხელსაწყოების გამოყენებას შეძლებთ. კეთს, მასპინძელს ოლბანიდან (ავსტრალია), მოსწონს მზა პასუხების გამოყენება. „ისინი დროის დაზოგვაში მეხმარება, რადგან ერთი და იმავე ტექსტების ხელახლა აკრეფა აღარ მჭირდება“, — ამბობს ის.

დაგეგმილი შეტყობინებებიც მოსახერხებელია, განსაკუთრებით — შესვლისა და გასვლის პერიოდებში. კეშავი, მრჩეველ მასპინძელთა საბჭოს წევრი ნიუ‑დელიდან (ინდოეთი), ყოველი ახალი სტუმრის დაბინავებამდე 24 საათით ადრე გზავნის დაგეგმილ შეტყობინებას, რომელშიც თავმოყრილია საცხოვრებელში შესვლის ინსტრუქცია და დაბინავებასთან დაკავშირებული სხვა ინფორმაცია.

„თუ სტუმარი აგვიანებს, მას დამატებით შეტყობინებას ვუგზავნი და ვეკითხები, დამატებითი ინფორმაცია ხომ არ სჭირდება. იქვე ხელახლა ვუგზავნი დაბინავების ინსტრუქციას იმ შემთხვევისთვის, თუ ის საცხოვრებელს ვერ აგნებს“, — აღნიშნავს კეშავი.

გამოხმაურების სიხშირე ასახავს, ბოლო 30 დღის მანძილზე სტუმრებისგან მიღებული პირველი შეტყობინებების რამდენ პროცენტს უპასუხეთ 24 საათის განმავლობაში.

• აღნიშნული მოიცავს როგორც დაჯავშნასთან დაკავშირებით ახალ დაინტერესებებზე გამოხმაურებას, ისე დაჯავშნის მოთხოვნების დაკმაყოფილებას, წინასწარ დადასტურებას ან უარყოფას.

• თუ პასუხის გაცემისთვის 24 საათზე მეტი დაგჭირდებათ, გამოხმაურების სიხშირის საერთო მაჩვენებელი შემცირდება, ხოლო გამოხმაურების დროის — გაიზრდება.

Airbnb ანგარიშით მუდმივი სარგებლობა და სტუმრების შეტყობინებებზე სწრაფი გამოხმაურება მასპინძლობის განუყოფელი ნაწილია. აღნიშნული დაგეხმარებათ გამოხმაურების სიხშირის მაჩვენებლის გაუმჯობესებაში, თქვენი განცხადება კი ძიების შედეგებში უფრო მაღალ პოზიციებზე მოხვდება.