რჩევები პროგნოზირებადი გაუქმების შემთხვევების თავიდან აცილებასთან დაკავშირებით

ჯავშნის დადასტურების შემდეგ სტუმრები მოელიან, რომ ის არ შეიცვლება. მასპინძლების მხრიდან გაუქმების შემთხვევები უარყოფითად აისახება მათ სამოგზაურო გეგმებსა და ჩვენი გაერთიანებისადმი ნდობაზე, თავად მასპინძლებს კი, შესაძლოა, დაეკისროთ შესაბამისი გადასახადები ან სხვა სახის სანქციები.

გაეცანით რამდენიმე რჩევას ჯავშნების გაუქმების ისეთი შემთხვევებისთვის, რომელთა თავიდან არიდებაც შესაძლებელია.

აცნობეთ სტუმრებს, როდის შეძლებთ მათ მასპინძლობას.

• განბლოკეთ თარიღები სამი თვით ან მაქსიმუმ ორი წლით ადრე.
• დაბლოკეთ თარიღები, რომლებშიც მასპინძლობას ვერ შეძლებთ.
• რეგულარულად შეამოწმეთ, რომ კალენდარი ასახავს დასაჯავშნად ხელმისაწვდომობას.

დასაჯავშნად ხელმისაწვდომი თარიღების მუდმივი განახლება კალენდარში განსაკუთრებით მნიშვნელოვანია, თუ მომენტალურ დაჯავშნას იყენებთ. ამ ფუნქციის მეშვეობით, სტუმრობის მსურველებს მყისიერად შეუძლიათ საცხოვრებლის დაჯავშნა ხელმისაწვდომ თარიღებში, მოთხოვნაზე თქვენი პასუხის ლოდინის გარეშე.

ჯავშნის დადასტურების შემდეგ კალენდარში ავტომატურად იბლოკება შესაბამისი თარიღები. ყველა თარიღი, რომელშიც მასპინძლობას სხვა მიზეზების გამო ვერ ახერხებთ, ხელით უნდა დაბლოკოთ.

თუ საცხოვრებელი იმ თარიღებში დაგეჯავშნებათ, რომლებშიც ის მიუწვდომელია, შესაძლოა, გაუქმების გადასახადი ან სხვა სანქციები დაგეკისროთ.

პარამეტრები იყოფა ორ ჩანართად: ფასები და ხელმისაწვდომობა. ეს ხელსაწყოები დაგეხმარებათ, რომ სასურველ დროს სასურველი ჯავშნები მიიღოთ. მაგალითად, შეგიძლიათ:

• შეიმუშაოთ საფასო პოლიტიკა. ფასი მხოლოდ თქვენი გადასაწყვეტია, მის შეცვლას კი ნებისმიერ დროს შეძლებთ. ფასების დაწესების ხელსაწყოები საშუალებას გაძლევთ, შეადაროთ ახლომახლო მსგავსი საცხოვრებლების ფასები, შესთავაზოთ სტუმრებს ფასდაკლებები გრძელვადიან ჯავშნებზე და დააწესოთ ინდივიდუალური ფასები კონკრეტულ თარიღებზე (მაგ., შაბათ‑კვირასა და დღესასწაულებზე). ამას გარდა, შეგიძლიათ გონივრული ფასწარმოქმნის ჩართვა არსებული მოთხოვნის მიხედვით ფასების ავტომატური ცვლისთვის.
• დააყენოთ დაჯავშნის უპირატესი პარამეტრები. ხელმისაწვდომი პერიოდის მეშვეობით განსაზღვრეთ, რამდენი ხნით ადრე იყოს შესაძლებელი ჯავშნის გაფორმება (3‑დან 24 თვემდე). ასევე, შეგიძლიათ ჯავშნებისთვის ღამეების მინიმალური და მაქსიმალური რაოდენობის განსაზღვრა, დაბინავებამდე არაუგვიანეს შვიდი დღით ადრე შეტყობინების მოთხოვნა და ერთი‑ორი ღამის დაბლოკვა ჯავშნებს შორის, მომზადების დრო რომ დაგრჩეთ.
• დააკავშიროთ კალენდრები. დაასინქრონეთ პირადი და მასპინძლობისთვის განკუთვნილი სხვა კალენდრები (თუ საცხოვრებელი განთავსებული გაქვთ სხვა ვებსაიტებზეც) თქვენს Airbnb‑კალენდართან. ეს დაგეხმარებათ მასპინძლობასთან დაკავშირებული ამოცანების მართვასა და ორმაგი ჯავშნების თავიდან აცილებაში.

გვესმის, რომ შეიძლება დაგჭირდეთ ჯავშნის გაუქმება ისეთი გარემოებების გამო, რომლებიც თქვენს კონტროლს არ ექვემდებარება (მაგ., გაუთვალისწინებელი შეკეთების/რემონტის საჭიროების შემთხვევაში). თუ გაუქმება გიწევთ, აუცილებელია:

• გაეცნოთ ჩვენს წესებს. მასპინძლების მხრიდან გაუქმების წესები განმარტავს, რა გადასახადები თუ სხვა სანქციები მოჰყვება გაუქმებას და როდის შეიძლება არ დაგეკისროთ ისინი. შეკითხვების შემთხვევაში დაუკავშირდით Airbnb‑ს მხარდაჭერის გუნდს, სანამ ჯავშანს გააუქმებთ. ჯავშნების გაუქმება დაუშვებელია ისეთი მიზეზით, რომელიც წინააღმდეგობაშია Airbnb‑ს ანტიდისკრიმინაციულ პოლიტიკასთან ან ადაპტირებულობასთან დაკავშირებულ წესებთან.
• კარგა ხნით ადრე მიაწოდოთ ინფორმაცია სტუმრობის მსურველებს. რა მიზეზითაც არ უნდა გიწევდეთ ჯავშნის გაუქმება, საჭიროა, დროულად მიიღოთ გადაწყვეტილება. დაუშვებელია სტუმრებისთვის თხოვნა, რომ თავად გააუქმონ ჯავშნები.
• დაიცვათ ადგილობრივი წესები და რეგულაციები. გაეცანით ჩვენს სტატიებს კეთილსინდისიერი მასპინძლობის შესახებ, რომ უკეთ გაეცნოთ კანონებს, გადასახადებს, პრაქტიკულ მაგალითებსა და სხვა გასათვალისწინებელ საკითხებს თქვენს რეგიონში მასპინძლობასთან დაკავშირებით.

როდესაც მასპინძლები ჯავშანს აუქმებენ, სტუმრებს სხვა საცხოვრებლის პოვნაში ვეხმარებით.