თქვენი განცხადების პოპულარიზაციის ახალი ხერხები

დაუვიწყარი მოგზაურობები ხშირად გარემოს შეცვლის უბრალო სურვილით იწყება. იდეალური დროის, მიმართულებისა და გეგმის მოსაფიქრებლად მოგზაურები ხშირად იდეებს ინტერნეტში ეძებენ. სწორედ ამიტომ, სტუმრებს Airbnb‑ზე სასურველი ვარიანტების შერჩევის სრულიად ახალ ხერხს ვთავაზობთ.

Airbnb‑ს 2022 წლის ზაფხულის განახლება ბოლო ათწლეულში ყველაზე დიდი ცვლილებაა Airbnb‑ზე. სრულიად ახალ დიზაინში განცხადებები დახარისხებულია 56 Airbnb კატეგორიის მიხედვით. აღნიშნულის მეშვეობით სტუმრები მარტივად იპოვიან და დაჯავშნიან საცხოვრებლებს, რომელთა არსებობის შესახებ ადრე არც კი იცოდნენ. ამასთან, ამოქმედდა ინოვაციური ფუნქცია, სახელად „გაყოფილი სტუმრობები“, რომლის ალგორითმიც საცხოვრებლის ორ ვარიანტს არჩევს დიდი ხნით სტუმრობისთვის.

მასპინძლებმა ეს გასაოცარი ფუნქციები თავიანთ სასარგებლოდ რომ გამოიყენონ, აუცილებელია, განცხადებაში ჰქონდეთ სრული და უახლესი ინფორმაცია, განახლებული ხელმისაწვდომობა და მაღალი ხარისხის ფოტოები.

რასაც არ უნდა სთავაზობდეთ სტუმრებს — საზიარო ოთახს, ცალკე ოთახს თუ საცხოვრებელს მთლიანად — Airbnb‑ს განახლებული ინტერფეისის მეშვეობით მეტი სტუმარი იპოვის მას ჯერ კიდევ სამოგზაურო გეგმების დაწყობისას.

სტუმრობის მსურველებს განცხადების პოვნაში დაეხმარება:

• Airbnb კატეგორიები. აპის ყოველი გახსნისას სტუმრები ეცნობიან ახლო მომავალში ხელმისაწვდომ, მყისიერად დასაჯავშნ შესანიშნავ საცხოვრებლებს.
• გაყოფილი სტუმრობები. შვიდი ან მეტი ღამი ხანგრძლივობის არჩევის შემთხვევაში, ძიების შედეგებში ამიერიდან სტუმრებს ვთავაზობთ, რომ ორ საცხოვრებელს შორის გადაანაწილონ სტუმრობა.
• უფრო მოქნილი პირობები. საცხოვრებლების ძიება შესაძლებელია დაუზუსტებელი თარიღებისა და მდებარეობის მიხედვით, იმ ფუნქციების გამოყენებით, რომლებიც გასულ წელს ავამოქმედეთ. ასევე, შესაძლებელია ძიება კონკრეტული საჭიროებების მიხედვით.

Airbnb‑ს გახსნისას სტუმრებს გვერდის ზედა ნაწილში ვთავაზობთ სხვადასხვა კატეგორიას — კოლექციებს, რომლებიც თავს უყრის უნიკალური სტილის, მდებარეობისა და ახლომახლო აქტივობების მიხედვით შერჩეულ საცხოვრებლებს. კატეგორიებში წარმოდგენილია საცხოვრებლები ისეთი თავისებურებებით, როგორიცაა შესანიშნავი ხედები, დიდი სამზარეულოები, ტბასთან, ეროვნულ პარკთან სიახლოვე, გოლფისა თუ სერფინგისთვის განკუთვნილ ადგილებზე წვდომა და სხვა.

როცა სტუმრები საცხოვრებლებს კონკრეტული მიმართულებით ეძებენ, შედეგებს ადრინდელის მსგავსად იღებენ კატეგორიაში „ყველა საცხოვრებელი“. ამიერიდან მათ დამატებით კატეგორიებსაც შევთავაზებთ არჩეული მდებარეობის მიხედვით, რითაც ახლომდებარე თუ სხვა შესანიშნავი საცხოვრებლების აღმოჩენას გავუმარტივებთ.

ამას გარდა, განცხადებები შეიძლება განთავსდეს რამდენიმე კატეგორიაში. მაგალითად, თუ ტბის პირას შეთავაზებულ საცხოვრებელში დიდი სამზარეულოც არის, გეოგრაფიული მდებარეობის მიხედვით ნაჩვენები შედეგების გარდა, განცხადება შეიძლება მოხვდეს კატეგორიებში „ტბასთან“ და „დიდი სამზარეულოთი“.

ახალი ვარიანტებიდან ერთ‑ერთი ყველაზე გამორჩეული კატეგორიაა „დიზაინერული“, რომელშიც თავმოყრილია 20 000‑ზე მეტ საცხოვრებელი უნიკალური არქიტექტურითა და საუცხოო ინტერიერით. კატეგორიაში „დიზაინერული“ შეხვდებით ფრენკ ლოიდ რაიტის, ზაჰა ჰადიდისა და სხვა სახელგანთქმული არქიტექტორების პროექტებს, ასევე, ვარიანტებს, რომლებიც სხვადასხვა დიზაინერულ გამოცემაში მოხვდა და გამორჩეული სტილის საცხოვრებლებს, რომლებშიც მასპინძლების ინდივიდუალობა იგრძნობა.

სხვა Airbnb კატეგორიებია, მაგალითად, „შესანიშნავი ხედით“, „პლაჟთან“, „კემპინგისთვის“ „დიდი სამზარეულოთი“, „სოფლად“, „შემოქმედებითი“, „გოლფისთვის“, „ისტორიული“, „საკულტო ქალაქში“, „ეროვნულ პარკთან“, „სათხილამუროდ“, „სერფინგისთვის“, „ტროპიკებში“ და „ვენახში“.

ეს კატეგორიები ჯერ მხოლოდ საფუძველს უყრის ძიების ახალ მეთოდს, რომელიც სტუმრებს საშუალებას აძლევს, იმაზე მეტი საცხოვრებელი აღმოაჩინონ, ვიდრე ოდესმე. დროთა განმავლობაში საცხოვრებლების უნიკალური თავისებურებებისა და განსაკუთრებული მდებარეობების შესაბამის მეტ კატეგორიას წარმოგიდგენთ. გვჯერა, რომ თითოეული საცხოვრებლისა თუ მასპინძლისთვის შეიძლება მოიძებნოს კატეგორია.

თითოეულ კატეგორიაში საცხოვრებლები სპეციალურად ირჩევა. Airbnb‑ზე წარმოდგენილ მილიონობით მოქმედ განცხადებას აფასებს სპეციალური ალგორითმი, რომელიც აანალიზებს სათაურებს, აღწერილობებს, ფოტოებისთვის დართულ წარწერებსა და სტუმრების მიერ დატოვებულ მიმოხილვებს. შესაბამისად, მნიშვნელოვანია, რომ განცხადებაში მითითებული ინფორმაცია განახლებული და სრული იყოს.

სტუმრებს ინდივიდუალურად შეუძლიათ აირჩიონ მოქნილი პირობები საცხოვრებლებს შესარჩევად და დასაჯავშნად. „გაყოფილი სტუმრობების“ ფუნქცია მასპინძლებს საშუალებას აძლევს, რომ მათ მიერ შეთავაზებული საცხოვრებელი მეტი სტუმრის სამოგზაურო გეგმებში მოხვდეს.

ძიების შედეგებში „გაყოფილ სტუმრობებს“ ავტომატურად ვთავაზობთ სტუმრებს, რომლებიც საცხოვრებლებს ერთი კვირით ან მეტი ხნით სტუმრობისთვის ეძებენ. კატეგორიაში „ყველა საცხოვრებელი“ სტუმრებს შეუძლიათ იპოვონ ვარიანტები, რომლებიც სტუმრობის ორგან გადანაწილების საშუალებას იძლევა.

ადრე, როცა სტუმარი საცხოვრებელს ერთი თვით ეძებდა, თქვენ მიერ შეთავაზებული ვარიანტი კი მხოლოდ ორი კვირით იყო ხელმისაწვდომი იმ პერიოდში, თქვენი განცხადება ძიების შედეგებში არ მოხვდებოდა. ახლა ის შეიძლება სხვა მსგავს ვარიანტთან დავაწყვილოთ, სტუმრებს კი შევთავაზოთ, რომ ორ საცხოვრებელს შორის გადაანაწილონ სტუმრობა.

თითოეული „გაყოფილი სტუმრობის“ შემთხვევაში საცხოვრებლის ორი ვარიანტი შეირჩევა ძიებისას მითითებული მდებარეობის, ობიექტის ტიპისა და საყოფაცხოვრებო პირობების შესაბამისად. მაგალითად, თუ ოჯახი ეძებს მთლიანად შეთავაზებულ საცხოვრებელს ისეთი ადაპტირებული პირობებით, როგორიცაა უსაფეხურო შესასვლელი ან მინიმუმ 81 სმ სიგანის კარები, „გაყოფილი სტუმრობების“ ალგორითმი სწორედ ამ მოთხოვნების მიხედვით შეარჩევს საცხოვრებლის ორ ვარიანტს.

გაყოფილი სტუმრობის შემთხვევაში მასპინძლები დაჯავშნის მოთხოვნებს ცალ‑ცალკე იღებენ. როგორც ნებისმიერი სხვა ჯავშნის შემთხვევაში, თქვენთან დაჯავშნილი ღამეების რაოდენობაზე გავრცელდება თქვენ მიერ დადგენილი ფასი და სახლის წესები.

ახალი ფუნქციების მეშვეობით Airbnb ახლა უფრო მეტ ადამიანს აცნობს თქვენ მიერ შეთავაზებულ საცხოვრებელს, ვიდრე ოდესმე. გთავაზობთ განცხადებისადმი ყურადღების მიქცევის რამდენიმე ხერხს:

1. წარმოაჩინეთ საცხოვრებლის უნიკალურობა მაღალი ხარისხის ფოტოებით. დეტალური სურათები (პროფესიონალის მიერ  ან ტელეფონით გადაღებული) სტუმრების ყურადღების მიქცევაში დაგეხმარებათ.
2. გაეცანით საყოფაცხოვრებო პირობების სიას და შეამოწმეთ, ხომ არ არის რაიმე ახალი. მიუთითეთ ან განაახლეთ ყველაფერი, რასაც სტუმრებს საცხოვრებელში სთავაზობთ. განცხადება შესაბამის კატეგორიებში რომ მოხვდეს, ყურადღება მიაქციეთ სტუმრებისთვის სასურველ, პოპულარულ საყოფაცხოვრებო პირობებს.
3. შეამოწმეთ Wi‑Fi კავშირის სიჩქარე. საიმედო ინტერნეტკავშირის დადასტურების შემთხვევაში სტუმრებს ეცოდინებათ, რომ ონლაინ მუშაობასა და კომუნიკაციას შეძლებენ.
4. დაფიქრდით, ადაპტირებულია თუ არა თქვენ მიერ შეთავაზებული საცხოვრებელი ყველა მოგზაურისთვის. მრავალი სხვადასხვა საჭიროების მქონე სტუმრები რომ დააინტერესოთ, დაამატეთ ადაპტირებული პირობების (მაგალითად, უსაფეხურო შესასვლელებისა და ფართო კარების) ამსახველი ფოტოები და დეტალური ინფორმაცია.

განცხადების ყველა დეტალის განახლების მეშვეობით სტუმრობის მეტ მსურველს მოიცავთ. შესაძლოა, თქვენი საცხოვრებელი იყოს ზუსტად ის, რასაც ისინი ეძებენ.

*Airbnb‑ს შიდა კვლევის მონაცემების თანახმად, 14/04/2022‑ის მდგომარეობით.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.