რჩევები საცხოვრებელში წვეულებების გამართვის აღსაკვეთად

მასპინძლებისა და სტუმრების უსაფრთხოებაზე ზრუნვა Airbnb‑ს ერთ‑ერთი უმთავრესი პრიორიტეტია. Airbnb‑ზე განთავსებულ საცხოვრებლებში უწესრიგო ქცევის აღკვეთის მიზნით, ჩვენ ვკრძალავთ ისეთი წვეულებებისა და ღონისძიებების გამართვას, რომლებსაც სხვების შეწუხება შეუძლია (მათ განეკუთვნება ისეთი შეკრებებიც, რომლებზე დასწრებაც თავისუფალია).

2020 წლის აგვისტოში საერთაშორისო მასშტაბით წვეულებებისა და ღონისძიებების გამართვა ავკრძალეთ, რის შემდეგაც წვეულებებთან დაკავშირებით წლიდან წლამდე მომართვიანობის მაჩვენებელმა 44%‑ით იკლო. ამას გარდა, ამ სიახლეს დადებითად შეხვდნენ მასპინძლები, გაერთიანების ლიდერები და საჯარო მოხელეები.

ჩვენი სურვილია, თავს ყოველთვის მშვიდად გრძნობდეთ, იმის მიუხედავად, თუ რამდენად გამოცდილი მასპინძელი ხართ. სწორედ ამიტომ, გთავაზობთ 6 რჩევას, რომლებიც დაგეხმარებათ წვეულებებისა და მათთან დაკავშირებული ზოგიერთი რისკის თავიდან აცილებაში.

გირჩევთ, გაეცნოთ წვეულებებისა და ღონისძიებების გამართვის წესებს, რომ პრობლემები იქამდე აიცილოთ თავიდან, სანამ მათ წინაშე აღმოჩნდებით. მანამდე კი გიზიარებთ ძირითად ამონარიდებს:

• სხვების შემაწუხებელი წვეულები და ღონისძიებები, ასევე, შეკრებები, რომლებზე დასწრებაც თავისუფალია, აკრძალულია.
• ზოგიერთ ქვეყანასა და რეგიონში ჩვენ ვზღუდავთ გარკვეული ტიპის ჯავშნების გაფორმებას ადგილობრივ დონეზე. მაგალითად, როცა მთლიანად შეთავაზებული საცხოვრებლების დაჯავშნას აპირებენ 25 წლამდე ასაკის სტუმრები, რომლებსაც აქვთ უარყოფითი მიმოხილვები ან სამზე ნაკლები დადებითი მიმოხილვა.
• უახლოეს თვეებში ჩვენ გავაუქმებთ სტუმრების რაოდენობაზე დაწესებულ ლიმიტს (16 ადამიანი), რომელიც 2020 წელს ამოქმედდა, უმთავრესად, კორონავირუსთან დაკავშირებული საფრთხეების პასუხად.
• მათ, ვინც სტუმრებს ტრადიციულ სასტუმრო ობიექტებში (მაგალითად, ბუტიკ‑ოტელებში) მასპინძლობს, უფლება აქვს, საკუთარი შეხედულებისამებრ დაუშვას სათანადო ღონისძიებების გამართვა.
• მასპინძლებმა არ უნდა დართონ ნება სტუმრებს, გამართონ შეკრებები, რომლებიც ჩვენს წესებს ეწინააღმდეგება.

Airbnb‑მ, შესაძლოა, მიიღოს კონკრეტული ზომები იმ სტუმრებისა თუ მასპინძლების მიმართ, რომლებიც ჩვენს წესებს დაარღვევენ.

სტუმრებთან მკაფიო კომუნიკაცია ერთ‑ერთი უმნიშვნელოვანესი ფაქტორია თქვენი, საცხოვრებლის და მეზობლების უსაფრთხოების უზრუნველსაყოფად. დაჯავშნის მოთხოვნის ან დადასტურებული ჯავშნის მიღების შემდეგ გაეცანით ინფორმაციას სტუმრის შესახებ და დაუსვით მას რამდენიმე მარტივი შეკითხვა სტუმრობასთან დაკავშირებით, მაგალითად:

• რა არის სტუმრობის მიზანი?
• სხვა ვინ გახლდებათ თან?
• სახლის წესები ნამდვილად წაიკითხეთ?

ამას გარდა, შეგიძლიათ ისარგებლოთ მომენტით და შეახსენოთ სტუმრებს ისეთი მნიშვნელოვანი საკითხების შესახებ, როგორიცაა, მაგალითად, კონკრეტულ საათებში სიმშვიდის დაცვის აუცილებლობა. ამასთან, შეგიძლიათ გაუზიაროთ ადგილობრივი კანონები ან შეზღუდვები ხმაურთან, პარკირებასთან თუ საზოგადოებრივ ჯანდაცვასთან დაკავშირებით.

შეატყობინეთ მეზობლებს, რომ სტუმრებს მასპინძლობთ ხოლმე. დაუტოვეთ თქვენი საკონტაქტო ინფორმაცია მეზობელს, რომელსაც ენდობით, და სთხოვეთ, დაგიკავშირდეთ, თუ მოულოდნელად რაიმე მოხდება.

თუ მეზობლებს თქვენი მასპინძლობის საკითხი აღელვებთ, აუხსენით მათ, რომ სტუმრების უმრავლესობა პრობლემებს არ ქმნის. 2021 წელს Airbnb‑ს მეშვეობით გაფორმებული იმ ჯავშნების წილმა, რომელთა პერიოდშიც უსაფრთხოებასთან დაკავშირებულ პრობლემები არ დაფიქსირებულა, 99,92% შეადგინა მსოფლიო მასშტაბით.*

სტუმრებთან კავშირზე ყოფნა შეგიძლიათ იმ შემთხვევაშიც, თუ მათ დამოუკიდებლად დაბინავების საშუალებას აძლევთ. დაბინავებამდე, სტუმრობისას და საცხოვრებლიდან გასვლის შემდეგ შეგიძლიათ:

• შეატყობინოთ სტუმრებს, სად დაგირეკონ, თუ რაიმე გაუთვალისწინებელი მოხდება. ასე უფრო ეფექტურად მოაგვარებთ პრობლემას, სტუმრები კი დააფასებენ თქვენს ოპერატიულობას.
• შესთავაზოთ სტუმრებს, რომ შეუვლით ან ვინმეს გაგზავნით, თუ მათ რაიმე დასჭირდებათ. თუ ახლოს არ ცხოვრობთ, კარგი იქნება, თუ გეყოლებათ უძრავი ქონების მენეჯერი ან თანამასპინძელი, რომელსაც, საჭიროების შემთხვევაში, შეუძლია საცხოვრებელში პირადად მისვლა.

თუ თვლით, რომ სტუმარი აპირებს წვეულების გამართვას, მის დაბინავებამდე ჯავშნის გაუქმება შეგიძლიათ თქვენთვის უარყოფითი შედეგების გარეშე. ჩვენ გთხოვთ, დაასაბუთოთ თქვენი გადაწყვეტილება, მაგალითად, სტუმართან მიმოწერის ან სხვა ტიპის მტკიცებულებების მეშვეობით.

ვთქვათ, ახლომახლო მცხოვრები სტუმარი ბოლო წუთს ჯავშნის თქვენ მიერ შეთავაზებულ საცხოვრებელს ერთი ღამით, შაბათ‑კვირას. თქვენთან მიმოწერაში ის გეკითხებათ, სად შეუძლია მის რამდენიმე მეგობარს ქუჩაში მანქანის გაჩერება. ამასთან, სტუმრისთვის დატოვებულ მიმოხილვებში ამჩნევთ, რომ ერთ‑ერთი სხვა მასპინძელი იწერება გამართული წვეულების შესახებ. თუ სტუმრის შეტყობინებასა და მისთვის დატოვებულ მიმოხილვას გაგვიზიარებთ, შესაძლოა, ჯავშნის გაუქმება თქვენთვის უარყოფითი შედეგების გარეშე მოახერხოთ.

გარდა ამისა, ჯავშნის დამოუკიდებლად გაუქმებაც შეგიძლიათ, თუ გააქტიურებული გაქვთ მომენტალური დაჯავშნა და გაუქმებების რაოდენობაზე დაწესებული ზღვრისთვის (3 გაუქმება წელიწადში) ჯერ არ მიგიღწევიათ. თუ სტუმრის დაბინავების დრო 24 საათის განმავლობაშია, ჯავშნის გასაუქმებლად ჩვენთან დაკავშირება დაგჭირდებათ.

უსაფრთხოებისა და მასპინძლების მიმართ ჩვენი მოლოდინის შესახებ დამატებითი ინფორმაციისთვის გაეცანით გაერთიანების წესებს.

*ეფუძნება 2021 წლის 1 იანვრიდან 31 დეკემბრამდე Airbnb‑ს მიერ შეგროვებულ შიდა მონაცემებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.