ინკლუზიური პრაქტიკა სტუმრების კომფორტისთვის

Airbnb‑ს მეშვეობით მასპინძლები თავიანთი სახლის კარს უღებენ მოგზაურებს მთელი მსოფლიოდან, რასაც სწორედ ინკლუზიურობის პრინციპები უდევს საფუძვლად.

მასპინძლობის კუთხით წარმატების მისაღწევად მთავარია, ნებისმიერი წარმომავლობის სტუმარმა თავი შინაურულად იგრძნოს თქვენ მიერ მისთვის შეთავაზებულ საცხოვრებელში. ჩვენი გაერთიანებისთვის განსაკუთრებით მნიშვნელოვანია, შინაურობის განცდა შევუქმნათ და პატივისცემით, განსჯისა თუ მიკერძოების გარეშე მოვეპყროთ ყველა სტუმარს, მისი რასის, რელიგიის, ეროვნული კუთვნილების, ეთნიკური წარმომავლობის, შეზღუდული შესაძლებლობის, სქესის, გენდერული იდენტობის, სექსუალური ორიენტაციისა თუ ასაკის მიუხედავად.

ინკლუზიურობას წარმატებული მასპინძლობისთვის გადამწყვეტი მნიშვნელობა აქვს. ამაში იგულისხმება:

• ნებისმიერი წარმომავლობის სტუმრის მასპინძლობა

• ყველასთვის თანაბარი პირობების შექმნა და სტუმრების საჭიროებების დაკმაყოფილება

• ახლო ურთიერთობის დამყარება განსხვავებული და საერთო თავისებურებების საფუძველზე

• თავისუფალი შეხედულებებისთვის კარის გაღება და სტუმრების საჭიროებებით დაინტერესების სურვილი

Airbnb‑მ თავი მოუყარა მასპინძლებისგან, სტუმრებისა და ექსპერტებისგან მიღებულ სასარგებლო რჩევებს, რომლებიც ინკლუზიური სტუმარ‑მასპინძლობის პრაქტიკაში დანერგვასა და სტუმრების მიმართ თბილი დამოკიდებულების გამოჩენაში დაგეხმარებათ ყველა ეტაპზე — განცხადების შექმნიდან სტუმრისთვის მიმოხილვის დატოვებამდე. თუ ყველაფერს გაითვალისწინებთ, ფარული მიკერძოების შემთხვევებსაც შეამცირებთ და ყველა სტუმართან კარგი ურთიერთობის დამყარებასაც შეძლებთ.

თუ მკაფიოდ გექნებათ მითითებული, რომ ნებისმიერი წარმომავლობის სტუმრებს მიესალმებით, ისტორიულად მარგინალიზებული ჯგუფების წარმომადგენლები თქვენ მიერ განთავსებულ საცხოვრებელს უფრო მშვიდად დაჯავშნიან. სტუმრებისგან შევიტყვეთ, რომ ამ ჯგუფების წარმომადგენლები ყველაზე ხშირად ეძებენ ინკლუზიურობის ნიშნებს განცხადებაში.

გთავაზობთ ინკლუზიური მასპინძლობის შესახებ სტუმრების ინფორმირების რამდენიმე იდეას:

• მკაფიოდ მიუთითეთ, რომ ნებისმიერი წარმომავლობის სტუმარს მიესალმებით. სასურველია, ეს საცხოვრებლის აღწერილობის დასაწყისშივე აღნიშნოთ (გაეცანით მაგალითებს ქვემოთ).

• ზუსტად აღწერეთ საცხოვრებელში შეთავაზებული ადაპტირებული პირობები და განაახლეთ ფოტოები.

• მიუთითეთ პროფილში, თუ როგორ მოგმართონ სტუმრებმა (მაგალითად, ინგლისურის შემთხვევაში, she/her, he/him, they/them და ა.შ.). ამით სტუმრებსაც მიანიშნებთ, რომ თავადაც ისე მიმართავთ, როგორც მათ ურჩევნიათ.

• ჩართეთ მომენტალური დაჯავშნის ფუნქცია, რომ სტუმრობის მსურველებმა წინასწარი დასტურის ლოდინის გარეშე შეძლონ თქვენ მიერ განთავსებული საცხოვრებლის დაჯავშნა. ამას გარდა, ეს იქნება ერთგვარი ნიშანი, რომ, დაჯავშნის კრიტერიუმების დაკმაყოფილების შემთხვევაში, მზად ხართ, უმასპინძლოთ სტუმრობის ნებისმიერ მსურველს.

• გაუგზავნეთ წინასწარი დასტური მათ, ვინც ჯავშნის გაფორმებამდე მოგწერთ და იყავით მეგობრული. სტუმრობის ზოგიერთი მსურველი მასპინძლებს წინასწარ მხოლოდ იმისთვის მიმართავს, რომ გაარკვიოს, რამდენად თბილად დახვდება ის მომავალში.

• დაჯავშნის მოთხოვნის უარყოფამდე დაფიქრდით, რატომ ეუბნებით უარს სტუმრობის მსურველს — შეძლებდით მიზეზის პირისპირ ახსნას?

ბევრი მასპინძელი განცხადებებში ინკლუზიურ ფორმულირებებს იყენებს. სურვილისამებრ, შეგიძლიათ მათი ადაპტირება. გთავაზობთ მაგალითებს, რომლებიც მრჩეველ მასპინძელთა საბჭოს წევრებმა გაგვიზიარეს:

1. პიტერი სან‑ფრანცისკოდან წერს: „უმცირესობებისა თუ მარგინალიზებული ჯგუფების ყველა წარმომადგენელს უსაფრთხოდ შეუძლია იგრძნოს თავი ჩემ მიერ განთავსებულ საცხოვრებელში. ყველა რასის, აღმსარებლობის, გენდერისა და სექსუალური ორიენტაციის სტუმრებს ვმასპინძლობ“.

2. „ჩემს განცხადებაში მეორე ფოტოზე ნაჩვენებია ძეგლი, რომელზეც წერია: „თქვენ ერთ‑ერთი ჩვენგანი ხართ““, — აღნიშნავს შინია იაპონიის ქალაქ ოსაკიდან. შინიას სხვა ფოტოზე იკითხება „მე პატივს ვცემ პიროვნულ მრავალფეროვნებასა და ვიღვწი წინასწარგანწყობებისგან თავისუფალი დამოკიდებულებისკენ“. ამის მითითება ფოტოსთვის დართულ წარწერაშიც შეგიძლიათ.

როგორც კი თქვენ მიერ განთავსებული საცხოვრებელი დაიჯავშნება, გაუგზავნეთ სტუმარს თბილი მისასალმებელი შეტყობინება. წინასწარ ნურაფერს დაასკვნით და იყავით გულისხმიერი.

• მისასალმებელ შეტყობინებას ინდივიდუალური ელფერი რომ შესძინოთ, გამოიყენეთ ინფორმაცია სტუმრის პროფილიდან. მაგალითად, ჰკითხეთ ინტერესების, მშობლიური ქალაქისა და ჰობის შესახებ.

• გამოიყენეთ გენდერისა და ორიენტაციის თვალსაზრისით ნეიტრალური ლექსიკა, როცა სტუმრებს მოიხსენიებთ. კარგი იქნება, თუ სტუმრის გენდერთან ან პირად ცხოვრებასთან დაკავშირებით წინასწარ არაფერს დაასკვნით.

• თუ სტუმარი ადაპტირებული პირობების შესახებ გკითხავთ, აუცილებლად უპასუხეთ მის შეკითხვებს და თავადაც დაინტერესდით, კიდევ რაიმე ხომ არ სჭირდებათ.

იდეებისთვის დაიხმარეთ სხვა მასპინძლების მიერ სტუმრებისთვის გაგზავნილი შეტყობინებები. აი, ორი მაგალითი:

1. მაიკლი სტუმრებს ირლანდიის ქალაქ ფალკარაში მასპინძლობს. მისი პრიორიტეტი სტუმრებთან თავიდანვე თბილი და მეგობრული ურთიერთობის დამყარებაა. „სტუმრებს ყოველთვის მადლობას ვუხდი იმისთვის, რომ ჩემ მიერ განთავსებულ საცხოვრებელში სტუმრობა გადაწყვიტეს“, — აღნიშნავს ის და დასძენს: „შემდეგ ვეუბნები, რომ მათ კიდევ შევეხმიანები, როცა დაბინავების დრო მოახლოვდება, დღის სასიამოვნოდ გატარებას ვუსურვებ და შევახსენებ, რომ საჭიროების შემთხვევაში ჩემთან დაკავშირება არ მოერიდოთ“.

2. სიუზანი დენვერიდან წერს: „ჩვენი სახლი თქვენი სახლია. იგრძენით თავი კომფორტულად, როგორც საკუთარ სახლში. თუ რაიმეს გამოსწორებას ისურვებდით, შეგვატყობინეთ“.

ქვემოთ გთავაზობთ რამდენიმე მაგალითს, რომლებიც სტუმრებმა (განსაკუთრებით, ისტორიულად მარგინალიზებული ჯგუფების წარმომადგენლებმა) გაგვიზიარეს იმასთან დაკავშირებით, თუ რა აგრძნობინებთ თავს შინაურულად.

• მიეცით სტუმრებს დამოუკიდებლად დაბინავების შესაძლებლობა, თუ ამის საშუალება გაქვთ. ამასთან, ჰკითხეთ, ხომ არ ურჩევნიათ, პირადად დახვდეთ.
• არ ეწვიოთ სტუმრებს საჭიროების გარეშე. ამის ნაცვლად, უზრუნველყავით მათთვის პირადი სივრცე და მკაფიოდ აღნიშნეთ, რომ საჭიროების შემთხვევაში კონტაქტზე იქნებით (პირადად ან ონლაინ).

Airbnb‑ს გაერთიანების წევრებს შორის ნდობის ჩამოყალიბება დიდწილად მიმოხილვებს ეფუძნება. სტუმრებისთვის მიმოხილვის დატოვება მადლობის გადახდის შესაძლებლობაცაა და მათთვის სასარგებლო რჩევის მიცემის საშუალებაც.

• ყველა სტუმრის მიმართ ერთი სტანდარტით იხელმძღვანელეთ.

• უმასპინძლეთ Airbnb‑ზე ახლახან დარეგისტრირებულ სტუმრებს, როცა ეს შეგიძლიათ, სტუმრობის შემდეგ კი დაუტოვეთ მიმოხილვა. ერთი მიმოხილვაც კი მნიშვნელოვნად დაეხმარება ახალბედა სტუმარს, რომ მომავალში ჯავშნები დაუდასტურდეს.

• სთხოვეთ სტუმრებს, დატოვონ მიმოხილვები. ისტორიულად მარგინალიზებული ჯგუფების წარმომადგენლებისთვის მიმოხილვები განსაკუთრებით მნიშვნელოვანია. მათი მეშვეობით ისინი არკვევენ, თუ რამდენად თბილად დახვდა ესა თუ ის მასპინძელი მათი ჯგუფის სხვა წარმომადგენლებს.

აუცილებლად დაიხმარეთ ჩვენი ინკლუზიური პრაქტიკა. ეს განსაკუთრებით მნიშვნელოვანია ახალბედა მასპინძლებისთვის. გახსოვდეთ, რომ შინაურობის განცდის შესაქმნელად მთავარია, დაინტერესდეთ სტუმრების საჭიროებებით და კონტაქტზე იყოთ.

უბრალოდ, ჰკითხეთ მათ, რა სჭირდებათ იმისთვის, რომ საცხოვრებელში თავი კომფორტულად და შინაურულად იგრძნონ. ვიმედოვნებთ, რომ ამგვარად მათ გადაწყვეტილების მიღებასაც გაუმარტივებთ და შესანიშნავადაც დაამახსოვრებთ თავს.