მასპინძლობისადმი მიდგომის ოპტიმიზაცია

მასპინძლობას გარკვეული დრო მიაქვს, თუმცა როგორც კი ალღოს აუღებთ, მრავალი ასპექტის ოპტიმიზაციასაც შეძლებთ, რაც საშუალებას მოგცემთ, კონცენტრირდეთ სტუმრებისთვის დაუვიწყარი შთაბეჭდილებების შექმნაზე.

დასუფთავების პროცედურის შემუშავება დაგეხმარებათ, უფრო მარტივად მოამზადოთ საცხოვრებელი მომდევნო სტუმრისთვის.

• დაფიქრდით, ხომ არ გირჩევნიათ პროფესიონალი დამლაგებლის დაქირავება, ყოველთვის ერთნაირი შედეგი რომ მიიღოთ ამ კუთხით.
• მსგავს ფერებში შეარჩიეთ პირსახოცები და საწოლის თეთრეული, რომ მათი ერთად გარეცხვა შეიძლებოდეს.
• იქონიეთ პირსახოცებისა და საწოლის თეთრეულის დამატებითი კომპლექტები, რომ უფრო სწრაფად მოამზადოთ საცხოვრებელი მომდევნო სტუმრებისთვის.
• პერიოდულად ჩაატარეთ გენერალური დასუფთავება, რომ შემდეგ მარტივად დაალაგოთ ხოლმე საცხოვრებელი სტუმრობებს შორის.
• ისარგებლეთ პროდუქციის ავტომატურად გამოწერის შესაძლებლობით, რომ რეგულარულად მიიღოთ საწმენდი საშუალებები და პირველადი საჭიროების სხვა ნივთები (მაგალითად, ტუალეტის ქაღალდი და საპონი). ეს დაგეხმარებათ, დაზოგოთ დრო და თავიდან აიცილოთ მარაგის ამოწურვა.
• შეიძინეთ პროდუქცია ბითუმად, რომ მარაგში იქონიოთ ყველაფერი, რაც სტუმრებსა და თქვენ ყველაზე მეტად გჭირდებათ (მაგალითად, შამპუნი და თმის კონდიციონერი).

სტუმართა შეტყობინებებზე პასუხის გაცემა შრომატევადი არ უნდა იყოს — სტუმრებთან ეფექტურ კომუნიკაციაში Airbnb‑ს მიერ შემოთავაზებული ხელსაწყოები დაგეხმარებათ.

• ჩამოტვირთეთ Airbnb‑ს აპი, სტუმრებს ოპერატიულად რომ უპასუხოთ ხოლმე. განაცხადეთ თანხმობა push‑გაფრთხილებების მიღებაზე და თან იქონიეთ მოწყობილობა ჩართული ხმით.
• დაგეგმეთ შეტყობინებების გაგზავნა, რომ სტუმრებს გარკვეული ინფორმაცია სწორედ იმ მომენტებში მიაწოდოთ, როცა ის მათ, დიდი ალბათობით, ყველაზე მეტად დასჭირდებათ — მაგალითად, შეგიძლიათ წინასწარ მოამზადოთ შეტყობინება, რომელშიც იკითხავთ, მიიღო თუ არა სტუმარმა დაბინავების ინსტრუქცია, შემდეგ კი დაგეგმოთ, რომ ეს შეტყობინება ავტომატურად გაეგზავნოს თითოეულ სტუმარს დაბინავებამდე ერთი დღით ადრე.
• შეადგინეთ მზა პასუხები, რომ ხშირად დასმულ შეკითხვებს უფრო სწრაფად უპასუხოთ. „შეტყობინებების“ ჩანართში ავტომატურად შემოგთავაზებთ, თქვენ მიერ შედგენილი მზა პასუხებიდან რომლის გამოყენება ჯობს ამა თუ იმ მიმოწერაში.

დაბინავების პროცედურის გამარტივებით სტუმრებს აგრძნობინებთ, რომ მათ კომფორტზე ზრუნავთ. დაფიქრდით თანამასპინძლის დამატებაზე, რომ გაინაწილოთ საცხოვრებლისა და ჯავშნების მართვასთან დაკავშირებული ამოცანები.

• ისარგებლეთ დაბინავების გზამკვლევით „განცხადებების“ ჩანართიდან, რომ მიუთითოთ მნიშვნელოვანი ცნობები, მათ შორის, დაბინავების მეთოდი და დრო, საცხოვრებლამდე მისასვლელი გზა, სტუმრის ცნობარი და Wi‑Fi ქსელის პაროლი.
• მიეცით სტუმრებს დამოუკიდებლად დაბინავების შესაძლებლობა ღილაკებიანი პანელების, გონიერი საკეტების ან მინისეიფების მეშვეობით. ამით სტუმრებს უფრო მოქნილი პირობები ექნებათ დაბინავების კუთხით და თქვენც დაგეზოგებათ დრო.
• მოამზადეთ სტუმრის ცნობარი და დაურთეთ მას სხვადასხვა ინსტრუქცია, მაგალითად, ამა თუ იმ მოწყობილობით ან Wi‑Fi ქსელით სარგებლობასთან დაკავშირებით.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.