გრძელვადიანი სტუმრობების მნიშვნელობა მასპინძლობის ბიზნესისთვის

გრძელვადიანი ჯავშნების მიღება იდეალური სტრატეგიაა ზოგიერთი მასპინძლისთვის. ისინი დაგეხმარებათ შემოსავლის პროგნოზირებაში, დატვირთვის შემცირებასა და უფრო მოქნილი პირობებით მასპინძლობაში.

გრძელვადიანი ჯავშნები ხელს უწყობს კალენდრის სწრაფად შევსებას. როგორც კვირაობით (მინიმუმ 7 ღამით), ისე თვეობით (მინიმუმ 28 ღამით) გაფორმებული ჯავშნები დაგეხმარებათ, დაუჯავშნელი ღამეების რაოდენობის შემცირებაში.

ამას გარდა, რაც უფრო მეტი გრძელვადიანი ჯავშანი გექნებათ, მით უფრო პროგნოზირებადი იქნება თქვენი შემოსავალი. ერთ თვეზე ხანგრძლივი ჯავშნების შემთხვევაში, ანაზღაურებას მიიღებთ ეტაპობრივად.

სტუმრობის მსურველების გრძელვადიანი ჯავშნების გაფორმებით დაინტერესება შეგიძლიათ ერთ კვირაზე და თვეზე ფასდაკლებების დაწესების მეშვეობით:

1. თქვენს კალენდარში შეხებით ან დაწკაპუნებით აირჩიეთ პარამეტრების ხატულა.

2. „ფასების“ ჩანართიდან გადადით „ფასდაკლებების“ სექციაზე.

3. აირჩიეთ „ერთ კვირაზე“ ან „ერთ თვეზე“. ჩვენ შემოგთავაზებთ პროცენტს, როგორც თქვენ მიერ სტუმრებისთვის შეთავაზებული საცხოვრებლის თავისებურებების, ისე თქვენს რეგიონში განთავსებულ მსგავს ვარიანტებზე არსებული მოთხოვნის გათვალისწინებით.

4. ფასდაკლების ჩასასწორებლად გადააადგილეთ სლაიდერი 0‑დან 99%‑მდე და დააკვირდით, როგორც იცვლება ერთი კვირის ან თვის საშუალო ფასი.

5. აირჩიეთ „სტუმრის მიერ გადასახდელი“, რომ დეტალურად შეიტყოთ, რის გადახდა მოუწევს სტუმარს და თქვენ რამდენი გერგებათ.

6. ფასდაკლების გასააქტიურებლად შეხებით ან დაწკაპუნებით აირჩიეთ „შენახვა“.

ზოგიერთ მასპინძელს სტუმრების გრძელი ვადით მიღება ურჩევნია — ისინი უზიარებენ თავიანთი განცხადებების ბმულებს იმ კომპანიებსა თუ უნივერსიტეტებს, რომელთა თანამშრომლებსაც თუ სტუდენტებს, შესაძლოა, დროებითი საცხოვრებელი სჭირდებოდეთ.

„მხოლოდ გრძელვადიან ჯავშნებს ვიღებ“, — გვიყვება პატრისია, სუპერმასპინძელი ოსტინიდან (ტეხასი, აშშ), და დასძენს: „სიამოვნებით ვთავაზობ საცხოვრებელს მათ, ვინც საქმეზე ჩამოდის 1‑დან 3 თვემდე ვადით“.

გრძელვადიანი ჯავშნები, როგორც წესი, თავიდან აგაცილებთ ზედმეტ საზრუნავსა და სამუშაოს, კერძოდ, სტუმრებთან მიმოწერისა და საცხოვრებლის დასუფთავების კუთხით.

მასპინძლები ზოგადად ნაკლებ დროს ხარჯავენ იმ სტუმრებთან კომუნიკაციაზე, რომლებიც მინიმუმ ერთი თვით რჩებიან, ვიდრე ახალ-ახალ სტუმრებთან, რომლებიც რამდენიმე ღამით ჩერდებიან.

ზოგიერთი მასპინძელი სტუმრებს სთავაზობს დასუფთავების მომსახურებას, ან მათ საწმენდ საშუალებებს უტოვებს. „ყოველკვირეულად სტუმრებს უფასოდ ვთავაზობ დასუფთავების მომსახურებას, ვუცვლი საწოლის თეთრეულს და ვუვსებ აუცილებელი მინიმუმის მარაგს. მსურს, დარწმუნებული ვიყო, რომ ყველაფერი წესრიგში აქვთ“, — გვიზიარებს ომარი, სუპერმასპინძელი მეხიკოდან (მექსიკა), რომელსაც ხშირად სტუმრობენ ოჯახები და დისტანციურად მომუშავე პირები ექვს კვირამდე ვადით.

გრძელვადიანი ჯავშნები, შესაძლოა, იდეალური ვარიანტი იყოს მასპინძლებისთვის, რომლებიც თავადაც დიდი ხნით გადიან ქალაქიდან. მაგალითად, მეგი, თანამასპინძელი ნორთჰემპტონიდან (მასაჩუსეტსი, აშშ), გვიყვება, რომ თავისი მშობლების სახლი ცარიელი იყო ხოლმე, როცა წყვილი ზამთარს პუერტო‑რიკოში ატარებდა. „Airbnb‑ს მეშვეობით ჩვენი შემოსავალი არაფრიდან თვეში 3 500 აშშ დოლარამდე გაიზარდა“, — ამბობს ის.

გრძელვადიანი ჯავშნების მიღება ხელსაყრელია იმ რეგიონებშიც, სადაც მოქმედებს გარკვეული შეზღუდვები საცხოვრებლის მოკლევადიან გაქირავებაზე. სტუმრობის მინიმალური და მაქსიმალური ხანგრძლივობები მითითებული უნდა გქონდეთ ადგილობრივი წესებისა თუ რეგულაციების დაცვით.

თუ თქვენს რეგიონში დაშვებულია როგორც მოკლევადიანი, ისე გრძელვადიანი ჯავშნების მიღება, პერიოდულად დაარეგულირეთ ხოლმე პარამეტრები. ეს დაგეხმარებათ, მაქსიმალური სარგებელი მიიღოთ პერიოდებში, როცა ადგილობრივ დონეზე მოთხოვნა მაღალია, პარალელურად კი სტუმრობის მსურველებს საშუალება მისცეთ, დაჯავშნონ გრძელვადიან სტუმრობებს შორის მოხვედრილი დაუჯავშნელი ღამეები თუ კვირები.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.