კალენდრის მორგება გრძელვადიანი სტუმრობებისთვის

დღესდღეობით სტუმრები გრძელი ვადით ეძებენ საცხოვრებლებს, რადგან ზოგს მეტი დროის გატარება სურს ახლობლებთან, ზოგს კი ძალიან მოსწონს ახალი ადგილებიდან დისტანციურად მუშაობა.

ამ ტიპის სტუმრობები შესანიშნავი შესაძლებლობაა მასპინძლებისთვის, მეტი დაჯავშნილი თარიღი ჰქონდეთ თავიანთ კალენდრებში და უფრო მარტივად იზრუნონ ისეთ საკითხებზე, როგორიცაა საცხოვრებლის დასუფთავება, სტუმრებთან კომუნიკაცია თუ ჯავშნების მართვა. ამ სტატიიდან შეიტყობთ, რა ცვლილებები შეიტანოთ, რომ მინიმუმ რამდენიმე კვირით სტუმრობის მსურველებს უმასპინძლოთ ხოლმე.

პირველ რიგში, გირჩევთ, საცხოვრებლის აღწერილობაში აღნიშნოთ, რომ გრძელვადიან ჯავშნებს იღებთ, შემდეგ კი კალენდრის პარამეტრები განაახლოთ. ყურადღება მიაქციეთ სტუმრობის ხანგრძლივობაზე დაწესებულ შეზღუდვებს — ისინი წინააღმდეგობაში არ უნდა მოდიოდეს სტუმრების გრძელი ვადით მასპინძლობის სურვილთან.

შეიტყვეთ, როგორ შეამოწმოთ საცხოვრებლის დასაჯავშნად ხელმისაწვდომობა

მასპინძლობის კუთხით თქვენი საჭიროებების შესაბამისი სტრატეგია რომ შეიმუშაოთ, სცადეთ დასაჯავშნად ხელმისაწვდომობის პარამეტრების განახლება იმგვარად, რომ ისინი მისაღები იყოს რამდენიმე თვით სტუმრობის მსურველებისთვისაც. ამისთვის სულ რამდენიმე მარტივი მოქმედების შესრულება დაგჭირდებათ.

• დრო დაბინავებამდე: მიუთითეთ, მინიმუმ რა დრო გჭირდებათ (ერთი დღე, ორი დღე და ა.შ.), სანამ ახალი სტუმარი დაბინავდება. ეს დაგეხმარებათ მოულოდნელი ჯავშნების თავიდან აცილებაში. ამას გარდა, ამ პარამეტრის განსაზღვრის შემთხვევაში მეტი დრო გექნებათ გრძელი ვადით სტუმრობის მსურველებთან ორგანიზაციული საკითხების შესათანხმებლად. ვრცლად დაბინავებამდე დროის პარამეტრის შესახებ.

• მომზადების დრო: სტუმრობებს შორის გარკვეული შუალედის დაცვა საშუალებას მოგცემთ, სათანადოდ დაასუფთაოთ საცხოვრებელი მომდევნო სტუმრებისთვის. „ჰენრი და მე დღისით ვმუშაობთ, ამიტომ ძალიან არ მოგვწონს, როცა ნაჩქარევად გვიწევს დასუფთავება. ორ კვირაზე ხანგრძლივი სტუმრობების შემდეგ რამდენიმე დღეს ვბლოკავთ, რომ აუჩქარებლად და საგულდაგულოდ დავალაგოთ საცხოვრებელი“, — გვიზიარებს ჯესიკა, მასპინძელი სეულიდან (სამხრეთი კორეა). ვრცლად მომზადების დროის პარამეტრის შესახებ.

• ხელმისაწვდომი პერიოდი: თქვენ თავად აკონტროლებთ, წინასწარ რამდენი ხნით ადრე შეიძლებოდეს თქვენ მიერ სტუმრებისთვის შეთავაზებული საცხოვრებლის დაჯავშნა. მაგალითად, შეგიძლიათ დაბლოკოთ თარიღები, რომლებიც დღეიდან 3, 6 ან 12 თვის შემდეგაა. „გრძელვადიანი ჯავშნებისთვის კალენდარს 6 თვით ადრე ვხსნი ხოლმე, ხოლო სტუმრობის მინიმალურ ხანგრძლივობად 30 დღე მაქვს მითითებული“, — იხსენებს ოლივერი, მასპინძელი ნიუ‑იორკიდან (აშშ). ვრცლად დასაჯავშნად ხელმისაწვდომობის განსაზღვრის შესახებ.

• წესების ნაკრებები: ექვსი და მეტი განცხადების მქონე მასპინძლებს წესების ნაკრებების შექმნა და ჩასწორება შეუძლიათ. წესების ნაკრებები დაგეხმარებათ, ავტომატურად დაარეგულიროთ ფასი წელიწადის დროის მიხედვით, შესთავაზოთ ფასდაკლებები გრძელი ვადით სტუმრობის მსურველებს, დააწესოთ მოთხოვნები სტუმრობის ხანგრძლივობის კუთხით და სხვა. ყოველივე ეს დაგიზოგავთ დროს მასპინძლობის პროცესში. ვრცლად წესების ნაკრებების შესახებ.

გრძელვადიანი ჯავშნების დაშვების შემთხვევაში არა მხოლოდ არსებულ მოთხოვნას დააკმაყოფილებთ, არამედ კალენდარში უფრო მეტი დაჯავშნილი თარიღი გექნებათ და ნაკლები ამოცანის შესრულება მოგიწევთ, პარალელურად კი კვლავ გეყოლებათ სტუმრები მსოფლიოს სხვადასხვა კუთხიდან.