ლტოლვილის ახალი სახლი რომში

Open Homes გარდაიქმნა Airbnb.org‑ად

Airbnb‑ს პროგრამა Open Homes მუშაობას განაგრძობს Airbnb.org‑ის, 501(c)(3) კატეგორიის ახალი არაკომერციული ორგანიზაციის, სახელით. გმადლობთ Open Homes‑ში შეტანილი წვლილისთვის. მოხარული ვართ, რომ ჩვენს ურთიერთობაში ამ ახალ გვერდს თქვენთან ერთად ვშლით.

როდესაც ელსმა, სუპერმასპინძელმა რომიდან, Airbnb‑ზე არსებული Open Homes‑ის პროგრამის შესახებ შეიტყო, მაშინვე დაინტერესდა და გაწევრიანება გადაწყვიტა. მას სტუმრები მსოფლიოს არაერთი კუთხიდან სწვევიან, თუმცა იცოდა, რომ ლტოლვილებისთვის დროებითი საცხოვრებლის შეთავაზება და მათი დაბინავება მასპინძლობის განსაკუთრებულ გამოცდილებას შესძენდა.

ერთხელაც ელსს Refugees Welcome Italia დაუკავშირდა და შესთავაზა, ემასპინძლა ფოდესთვის, ახალგაზრდა კაცისთვის მალიდან, რომელსაც ლტოლვილის სტატუსი მიენიჭა. ელსს გაუხარდა, რომ სხვისი ცხოვრების პოზიტიურად შეცვლის შესაძლებლობა მიეცა. ამ გამოცდილებამ ორივე მათგანის ცხოვრება შეცვალა.

ელსი ღელავდა და მოუთმენლად ელოდა ფოდეს სტუმრობას. როგორც რომში მცხოვრებ ბელგიელს, მას კარგად ესმოდა, რას ნიშნავს ახალი ცხოვრების დაწყება უცხო ადგილას, ამიტომ სურდა, თავის დროზე მისდამი გამოჩენილი იტალიური სტუმართმოყვარეობა სხვისთვის გაეზიარებინა. მასპინძლობისთვის ის Refugees Welcome Italia‑ს სოციალურმა მუშაკმა, სარამ, მოამზადა. ელსმა იცოდა, რომ სარა მუდამ მზად იყო მის დასახმარებლად.

როცა ელსმა ფოდე გაიცნო, ისინი ერთმანეთს დაუახლოვდნენ. ფოდე ასაკით ელსის ვაჟის ტოლი იყო. მისი ცხოვრებისეული თავგადასავლების მოსმენის შემდეგ კი ელსს „დედობრივი ინსტინქტი“ გაუჩნდა. ფოდეს სტუმრობამ ერთმანეთისთვის უცნობი ადამიანები ერთ ოჯახად აქცია. ფოდეს ცხოვრების ნაწილი გახდნენ ელსის მეზობლებიც. მათ მისდამი ისეთივე სტუმართმოყვარეობა და სიყვარული გამოიჩინეს, როგორიც თავის დროზე ბელგიიდან ჩამოსული ელსის მიმართ. როცა ელსი შინ არ იყო, ფოდე ხშირად ზედა სართულზე მცხოვრებ მეზობლებთან ატარებდა დროს. ისინი ერთად აგემოვნებდნენ იტალიურ კერძებს და ერთმანეთს თავიანთი ქვეყნების კულტურას აცნობდნენ.

ფოდეს თქმით, იტალიაში ჩასვლის შემდეგ მის ცხოვრებაში ყველაზე ბედნიერი პერიოდი სწორედ ელსთან ცხოვრება იყო. ის გააოცა იტალიელების უანგარო მზრუნველობამ. ცხოვრების თავიდან დაწყებას ყოველთვის შიში ახლავს, მაგრამ სხვების სიკეთეს ბევრი რამის შემსუბუქება შეუძლია. ცხოვრების ამ ეპიზოდმა დიდი გავლენა მოახდინა ელსზეც და ფოდეზეც.

შეუერთდით მათ, ვინც ეხმარება რთულ ვითარებაში აღმოჩენილ ადამიანებს.

Refugees Welcome Italia‑ს შესახებ

Refugees Welcome Italia (RWI) არის არაკომერციული ორგანიზაცია, რომელიც Airbnb‑ს პროგრამა Open Homes‑ის პარტნიორია. RWI დაარსდა 2015 წლის დეკემბერში, საერთაშორისო ქსელის, Refugees Welcome, ფარგლებში. ქსელის მიზანია ლტოლვილების იმ ადამიანებთან (ოჯახებთან, წყვილებთან ან მარტოხელებთან) დაკავშირება, რომელთაც დროებითი საცხოვრებლის შეთავაზება სურთ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.