Airbnb.org‑ის მეშვეობით ლტოლვილების მასპინძლობისთვის მომზადება

ახალი ქვეყნის კულტურასთან ადაპტირებისას ლტოლვილებსა და თავშესაფრის მაძიებლებს მრავალი საკითხის ერთდროულად მოგვარება უწევთ: დოკუმენტების გაფორმება, სამსახურის ძიება და სხვა. ამ ამოცანების შესრულებაში ლტოლვილ ბენეფიციარებს, ხშირ შემთხვევაში, ეხმარებიან Airbnb.org‑ის პარტნიორი არაკომერციული ორგანიზაციების სპეციალისტები, რომლებიც მათთვის მუდმივი საცხოვრებლის პოვნაზეც ზრუნავენ. ზოგჯერ კი ლტოლვილებსა და თავშესაფრის მაძიებლებს დამოუკიდებლად უწევთ მსგავს გამოწვევებთან გამკლავება.

რთულ ვითარებაში აღმოჩენილი ადამიანებისთვის გარდამტეხ ეტაპზე წვლილის შეტანა თქვენც შეგიძლიათ მათთვის უსაფრთხო და კომფორტული საცხოვრებლის შეთავაზებით, სანამ ისინი ახალ გარემოს შეეგუებიან, სამომავლო გეგმებს დაისახავენ და თავს მშვიდად იგრძნობენ.

ამ სტატიიდან შეიტყობთ, როგორ მოემზადოთ იმ ადამიანების მასპინძლობისთვის, რომლებიც თავიდან იწყებენ ცხოვრებას. რეკომენდაციები ეფუძნება არაკომერციული ორგანიზაციების თანამშრომლებისა და იმ მასპინძლების რჩევებს, რომლებსაც უკვე შეუთავაზებიათ საცხოვრებელი ლტოლვილი სტუმრებისთვის.

ჯავშნის გაფორმებამდე საცხოვრებლის შესახებ რამდენიმე დეტალის დასაზუსტებლად შეიძლება დაგიკავშირდეთ Airbnb.org‑ის ერთ‑ერთი პარტნიორი არაკომერციული ორგანიზაციის (როგორიცაა, მაგალითად, IRC და HIAS) სოცმუშაკი ან თავად სტუმრობის მსურველი, რომელსაც სტუმრობის ღირებულების დასაფარად სპეციალური ვაუჩერი ექნება. განცხადებაში სრული და უახლესი ინფორმაციის მითითება, ასევე, სწრაფი კომუნიკაცია გაცილებით გააიოლებს ამ პროცესს.

მნიშვნელოვანია გესმოდეთ, რომ საემიგრაციო კრიზისის დროს (რომელმაც ახლა, მაგალითად, უკრაინელი ხალხი მოიცვა), საცხოვრებელი ადამიანებს სასწრაფოდ და დაუყოვნებლივ სჭირდებათ. ზოგიერთ შემთხვევაში, Airbnb.org‑ის მეშვეობით, შეიძლება მიიღოთ 30 ან მეტი დღის დაჯავშნის მოთხოვნა, რომელიც დაბინავებას ერთ ან ორ დღეშიც კი ითვალისწინებს.

ჯავშნის გაფორმებამდე სტუმარს ან სოცმუშაკს შეგიძლიათ თქვენთვის საინტერესო შეკითხვები დაუსვათ, ხოლო საჭიროების შემთხვევაში მიმართოთ Airbnb.org‑ის მხარდაჭერის სპეციალიზებულ გუნდს.

არაკომერციული ორგანიზაციები, ხშირ შემთხვევაში, თავიანთი ბენეფიციარებისთვის უზრუნველყოფენ საკვებსა და ტრანსპორტს, ასევე, აგვარებენ სხვადასხვა საკითხს, როგორიცაა, მაგალითად, სამედიცინო მომსახურება, დასაქმება და გრძელვადიანი საცხოვრებელი.

უკრაინიდან იძულებით გადაადგილების მასშტაბიდან გამომდინარე, ზემოაღნიშნული ტიპის მხარდაჭერაზე მოთხოვნა უაღრესად დიდია. სტუმრებს ვურჩევთ, რომ ამ ეტაპზე თავიანთ საბაზისო საჭიროებებზე, შეძლებისდაგვარად, დამოუკიდებლად იზრუნონ, რომ დახმარება ჯერ გაეწიოთ მათ, ვისაც გამოუვალი მდგომარეობა აქვს.

მასპინძლების მხრიდან დამატებითი დახმარება მისასალმებელია, თუმცა, რა თქმა უნდა, არასავალდებულო. მაგალითად, თუ სტუმრებს გაუზიარებთ, რა ტიპის ადგილობრივი რესურსებია ხელმისაწვდომი ლტოლვილებისთვის, ეს მათ საგრძნობლად გაუმარტივებს ახალ გარემოსთან ადაპტირებას.

„დედა ვარ და პირდაპირ პრაქტიკულ საკითხებზე გადავედი“, — იხსენებს სარა, რომელიც ვანკუვერში (კანადა) მასპინძლობს, და დასძენს: „დავინტერესდი, ხომ არ სჭირდებოდათ სტუმრებს ტანსაცმელი, მაცივარი ან პროდუქტების ყიდვა“. ეს შეკითხვები მან გაუგზავნა თავისი სტუმრებისთვის გამოყოფილ სოცმუშაკს, რომელმაც უპასუხა, რომ კარგი იქნებოდა, თუ, შეძლებისდაგვარად, დაახვედრებდა მათ დამატებით საბნებსა და სათამაშოებს ბავშვებისთვის.

ადამმა, მასპინძელმა ონტარიოდან (კანადა), რომელსაც უკრაინული წარმომავლობა აქვს და უკვე უმასპინძლია ლტოლვილებისთვის Airbnb.org‑ის მეშვეობით, დაუყოვნებლივ შესთავაზა საცხოვრებელი მათ, ვინც უკრაინაში მიმდინარე კონფლიქტს დააღწია თავი. თავის და მის მიერ მართულ საცხოვრებლებში ადამიანების განთავსების გარდა, ადამი სიამოვნებით ეხმარება სტუმრებს ახალი ცხოვრების დაწყებაში: აკავშირებს მათ უკრაინულ დიასპორას, ურჩევს მაღაზიებს, ეკლესიებს, ასევე, პროფესიულ კურსებს უკრაინულ საზოგადოებრივ ცენტრში. „ვეკითხები ხოლმე, რას აკეთებდნენ სახლში, მათი პასუხის მიხედვით კი სწორ მიმართულებას ვაძლევ“, — ამბობს ის.

თითოეულ სტუმარსა თუ ოჯახს სხვადასხვა საჭიროება ექნება პირადი სივრცის კუთხით. თუ სტუმრებს წინასწარ ეცოდინებათ, სად შეეძლებათ განმარტოება ან დროის ერთად გატარება, ისინი უფრო მარტივად ადაპტირდებიან. ასეთი ადგილი შეიძლება იყოს მოსასვენებელი ოთახი, უკანა ეზო და სხვა.

„სტუმრების ოჯახს ჩვენთან ურთიერთობა შეეძლო მაშინ, როცა თავად ჩათვლიდა საჭიროდ“, — ამბობს სარა და დასძენს: „ბაღში ან სამზარეულოში გადაკვეთისას მეგობრულად ვხვდებოდით, თუმცა ვცდილობდით, ხელი არ შეგვეშალა“.

ყოველი სტუმრობა უსაფრთხო რომ იყოს, Airbnb‑მ მასპინძლებისთვის გარკვეული მითითებები და პროგრამები შეიმუშავა. გაგაცნობთ ძირითადს:

• ატარეთ ნიღაბი და დაიცავით სოციალური დისტანცია ადგილობრივი კანონმდებლობისა თუ ოფიციალური მითითებების შესაბამისად
• ყოველ სტუმრობას შორის შეასრულეთ განსაკუთრებული დასუფთავების 5‑ეტაპიანი პროცედურა
• არ იმოგზაუროთ და არ უმასპინძლოთ, თუ ახლახან COVID‑19‑ით ინფიცირების საფრთხის ქვეშ იყავით ან მისი სიმპტომები გაქვთ

იძულებით გადაადგილების პროცესში, ლტოლვილი სტუმრები, შესაძლოა, სერიოზული სირთულეების წინაშე აღმოჩენილიყვნენ. მათ, ვისაც ლტოლვილების შესახებ დამატებითი ინფორმაციის მიღება სურს, ჩვენი პარტნიორი არაკომერციული ორგანიზაციები ურჩევენ:

• შეიტყონ ვრცლად ლტოლვილებთან მუშაობის შესახებ
• მიიღონ ინფორმაცია უკრაინაში მიმდინარე კრიზისის შესახებ Airbnb.org‑ის პარტნიორისგან, მიგრაციის საერთაშორისო ორგანიზაციისგან
• მიიღონ ინფორმაცია ავღანელი ხალხის გამოწვევების შესახებ Airbnb.org‑ის პარტნიორისგან, საერთაშორისო სამაშველო კომიტეტისგან

როგორ ჯავშნიან დროებით საცხოვრებელს უკრაინიდან იძულებით გადაადგილებულები?
ადამიანს ან ოჯახს, რომელიც პროგრამის კრიტერიუმებს დააკმაყოფილებს, ერთ შემთხვევაში, მიემაგრება სოცმუშაკი, რომელიც მას საცხოვრებლის დაჯავშნაში დაეხმარება, ხოლო სხვა შემთხვევაში — გადაეცემა ვაუჩერი, რომლის მეშვეობითაც დამოუკიდებლად შეძლებს საცხოვრებლის პოვნას.

ჯავშნის გაფორმების პროცესში მასპინძლებმა შეიძლება მიიღონ შეტყობინება იმის შესახებ, რომ სტუმრობა მოთხოვნილია Airbnb.org‑ის ფარგლებში.

რა ვადით სჭირდებათ ლტოლვილებს საცხოვრებელი?
Airbnb.org‑ის ფარგლებში საცხოვრებლები, როგორც წესი, იჯავშნება რამდენიმე დღიდან რამდენიმე კვირამდე ვადით. იქიდან გამომდინარე, რომ უკრაინას მილიონობით ადამიანი ტოვებს, არაკომერციული და სამთავრობო ორგანიზაციები იღებენ დახმარების უამრავ მოთხოვნას, მათ შორის, მინიმუმ 30 დღით განთავსებასთან დაკავშირებით.

ზოგიერთ მუნიციპალიტეტში ლტოლვილების მასპინძლობა არ ისახება მასპინძლებისთვის ღამეების რაოდენობის კუთხით დაწესებულ შეზღუდვებზე. ადგილობრივი რეგულაციების შესახებ დამატებითი ინფორმაციისთვის მიმართეთ შესაბამის ორგანოებს.

რა ხდება ლტოლვილების მიერ დაჯავშნილი პერიოდის შემდეგ?
სტუმრობისას ლტოლვილები, სავარაუდოდ, დაისახავენ გარკვეულ გეგმებს ახალ ადგილას დამკვიდრებასთან დაკავშირებით, მათ შორის, საცხოვრებლის გრძელი ვადით პოვნის კუთხით.

სტუმრებს ემსახურება Airbnb.org‑ის მხარდაჭერის სპეციალიზებული გუნდი, რომელსაც, საჭიროებისამებრ, შეუძლია დახმარების თხოვნა ადგილობრივი არაკომერციული ორგანიზაციებისგან.

უკრაინაში მიმდინარე მოვლენების მასშტაბიდან გამომდინარე, არაკომერციული ორგანიზაციები დამატებით დახმარებას, პირველ რიგში, სთავაზობენ მათ, ვისაც გამოუვალი მდგომარეობა აქვს. ამ ეტაპზე ყველა სტუმარი ვერ მიიღებს გარანტიას, რომ მას აღმოუჩენენ მხარდაჭერას გრძელვადიან პერსპექტივაში.

თუ ჯავშნის მოქმედების ვადის ბოლოს სტუმარს კვლავ დასჭირდება დროებითი საცხოვრებელი, მან უნდა მიმართოს Airbnb.org‑ს და მოითხოვოს განთავსება 2 კვირამდე ვადით.

რა არის საჭირო დროებითი საცხოვრებლის საპოვნელად?
Airbnb.org თანამშრომლობს არაკომერციულ ორგანიზაციებსა და განსახლების სააგენტოებთან, რომლებიც სათანადო რეაგირებას ახდენენ კრიზისულ პერიოდებში, მათ შორის, ლტოლვილების მხარდაჭერის კუთხით (მაგალითად, აფასებენ მათ საჭიროებებსა და სხვადასხვა კრიტერიუმთან შესაბამისობას).

სტუმრებმა, რომლებიც დამოუკიდებლად ჯავშნიან დროებით საცხოვრებელს Airbnb.org‑ის მეშვეობით, უნდა შექმნან Airbnb ანგარიში, რაც, თავის მხრივ, ვინაობის დადასტურებასაც მოიაზრებს ზოგიერთ შემთხვევაში.

როგორ აისახება Airbnb.org‑ის ფარგლებში მასპინძლობა „სუპერმასპინძლის“ სტატუსზე?
სუპერმასპინძლების 2022 წლის 1 აპრილის შეფასების დროს (მოიცავს მაჩვენებლებს 2021 წლის 1 აპრილიდან 2022 წლის 31 მარტამდე):

• Airbnb.org‑ის ფარგლებში გაფორმებული ჯავშნები დაემატება სტუმრობების საერთო რაოდენობას.
• Airbnb.org‑ის ფარგლებში გაფორმებული ჯავშნები არ აისახება სხვა კრიტერიუმებზე, რომელთა მიხედვითაც ფასდებიან სუპერმასპინძლები ყოველკვარტალურად, კერძოდ, მიმოხილვებზე, გაუქმებათა რაოდენობასა და გამოხმაურების სიხშირეზე.

მზად ხართ დასაწყებად? შეუერთდით მათ, ვინც Airbnb.org‑ის მეშვეობით სთავაზობს დროებით საცხოვრებელს რთულ ვითარებაში აღმოჩენილ ადამიანებს.