ფლორიდელი მასპინძლები, რომლებმაც ევაკუირებული პირები შეიფარეს

Open Homes გარდაიქმნა Airbnb.org‑ად

Airbnb‑ს პროგრამა Open Homes მუშაობას განაგრძობს Airbnb.org‑ის, 501(c)(3) კატეგორიის ახალი არაკომერციული ორგანიზაციის, სახელით. გმადლობთ Open Homes‑ში შეტანილი წვლილისთვის. მოხარული ვართ, რომ ჩვენს ურთიერთობაში ამ ახალ გვერდს თქვენთან ერთად ვშლით.

ქარიშხალმა „მაიკლმა“ ჯეისონი და კარენი ერთმანეთს დააშორა, მაგრამ Open Homes‑ში ჩართულმა მასპინძლებმა, ბობმა და ხუანმა, მათი ოჯახი გააერთიანა.

2018 წლის ოქტომბერში ფლორიდის შტატის პანჰენდლის რეგიონს ტროპიკული ქარიშხალი დაატყდა თავს, რომელიც მე‑5 კატეგორიამდე გაძლიერდა. ჯეისონმა და კარენმა ხელი მოჰკიდეს ბავშვებს და ორლანდოში გაემგზავრნენ.

„ფლორიდელები მიჩვეული ვართ ქარიშხლებს“, — ამბობს ჯეისონი, რომლის ოჯახიც სანაპიროდან ხუთ კილომეტრში, ფორტ‑უოლტონ‑ბიჩში ცხოვრობს, და დასძენს: „მე‑3 ან მე‑4 კატეგორიაზე სუსტი ქარიშხლები არ გვაშინებს, მაგრამ როცა ქარიშხლის სიმძლავრემ მე‑5 კატეგორიას მიაღწია, უკვე სახუმარო აღარ იყო. ამიტომაც გადავწყვიტეთ, გავცლოდით იქაურობას“.

„სკოლები ორი დღით დახურეს, რაც უჩვეულოა“, — იხსენებს კარენი, რომელიც თავად არის თეატრალური ხელოვნების მასწავლებელი, და დასძენს: „სწორედ მაშინ მივხვდით, რომ საქმე სერიოზულად იყო. გვსურდა, ერთად ვყოფილიყავით, რამე რომ მომხდარიყო“.

ქარიშხალი „მაიკლი“ ცენტრალური ფლორიდის სანაპიროს დაატყდა თავს. 241 კმ/სთ სიჩქარის ქარი ხდიდა შენობებს სახურავებს, ტბორავდა გზებს ზღვის წყლით და ანადგურებდა ელექტროგადამცემ ხაზებს. საფრთხის წინაშე არაერთი რაიონი აღმოჩნდა. იმ დროს ჯეისონი მივლინებაში იყო, 10 საათის სავალზე, კარენი კი თავის ორ ვაჟთან ერთად სახლში რჩებოდა. ოჯახმა აღმოაჩინა, რომ ახლომდებარე თავშესაფრები სავსე იყო, სასტუმროები კი ზედმეტად ძვირი ღირდა.

„სასტუმროს ნომრები ელვისებური სისწრაფით იჯავშნებოდა, ფასები კი უკონტროლოდ მაღალი იყო, ამიტომ Airbnb‑ს აპი გავხსენი“, — გვიყვება ჯეისონი და დასძენს: „თუ ოდესმე ევაკუაცია მოგვიწევს, ახლა ოქროს წესი გვაქვს — სასტუმროებამდე ჯერ Airbnb შევამოწმოთ. ჯობს, არ გადადოთ გამგზავრება, შტორმმა გზა რომ არ ჩაგიხერგოთ. რაც უფრო დიდხანს დაიცდით, მით უფრო მეტი ადამიანი გადაწყვეტს ევაკუაციას“.

მან გახსნა Airbnb‑ს აპი თავის ტელეფონზე და შეხვდა შეკითხვა იმის შესახებ, დაზარალდა თუ არა ის ან მისი ოჯახი ქარიშხლის შედეგად. სწორედ ასე შეიტყო ჯეისონმა, რომ არსებობდა პროგრამა Open Homes, რომელიც სტიქიით დაზარებულებს დროებითი საცხოვრებლის უფასოდ პოვნაში ეხმარებოდა. მას შეხვდა 3‑საძინებლიანი და 3‑სააბაზანოიანი სახლი, რომლამდე მანქანით მისვლაც მოსახერხებელი იყო როგორც მისთვის, ისე მისი ცოლ‑შვილისთვის.

ჯეისონი და კარენი ერთმანეთს შეხვდნენ Airbnb‑ზე განთავსებულ საცხოვრებელში, ორლანდოს სამხრეთით. ეს ადგილი განსაკუთრებით პოპულარულია Disney World‑თან სიახლოვის გამო. ოჯახს ელოდა მყუდრო საცხოვრებელი საზღვაო სტილში, ნატურალური ქვების ფერის ავეჯითა და მხიარულ ფერებში გადაწყვეტილი კედლებით.

ბობი და ხუანი პროგრამაში 2016 წელს ჩაერთნენ და მათ უკვე უმასპინძლებს რამდენიმე ოჯახს, რომლებიც ქარიშხლების „ირმას“ და „მაიკლის“ შედეგად დაზარალდნენ. ისინი 10 წელზე მეტია, რაც ერთად არიან, აქედან 7 წელი — ქორწინებაში. ბობი პენსიაზეა გასული და უძრავ ქონებას მართავს, ხუანი კი ორგანიზებას უწევს ლგბტ‑ტურებს ეკვადორში. ჯამში მათ 2000‑ზე მეტ ადამიანს უმასპინძლეს მსოფლიოს 35‑ზე მეტი ქვეყნიდან.

„თავი ზუსტად ისე ვიგრძენით, როგორც საკუთარ სახლში“, — გვიზიარებს კარენი და დასძენს: „რა თქმა უნდა, ჩვენი სახლის ამბავი ძალიან გვაღელვებდა, თუმცა მოხარული ვიყავით, რომ თავშესაფარი მაინც ვიპოვეთ, თანაც საცურაო აუზის სახით სასიამოვნო სიურპრიზი დაგხვდა”.

ოჯახმა დროებით საცხოვრებელში 3 ღამე გაატარა. მათ დაისვენეს, აღიდგინეს ძალები და უსაფრთხო მანძილიდან ადევნებდნენ თვალს სიახლეებს ქარიშხლის შესახებ. „რთულ სიტუაციაში დახმარება ვიგრძენით“, — ამბობს ჯეისონი და დასძენს: „იმის მიუხედავადაც კი, რომ ყველაფერი აპის მეშვეობით იყო ორგანიზებული“.

ბობი და ხუანი ფორტ‑ლოდერდეილში ცხოვრობდნენ, თუმცა მაინც ახერხებდნენ დისტანციურად დახმარებას. ხუანი კავშირზე იყო ჯეისონთან და ხშირად კითხულობდა მის ოჯახს. „სახლში სტუმრების ყოლა მაინც გარკვეული პასუხისმგებლობაა“, — გვიხსნის ბობი და დასძენს: „იმის მიუხედავად, რომ საშიში უკვე აღარაფერი იყო, მათი კეთილდღეობის საკითხი მაინც გვაღელვებდა“.

როგორც წესი, ჯეისონი და კარენი ქარიშხლების სეზონისთვის წინასწარ ემზადებიან — იმარაგებენ არამალფუჭებად საკვებს, აბაზანას კი წყლითა და ყინულით ავსებენ. „ნუ დაელოდებით დახლების დაცარიელებას“, — ამბობს კარენი და დასძენს: „ელექტროენერგიის გათიშვის შემთხვევისთვის მომარაგებული გვაქვს ბატარეები, ფანრები და ტელეფონის მექანიკური დამტენები“.

ხუანი და ბობი ჯეისონისა და კარენის ოჯახს ზუსტად ისე დახვდნენ, როგორც ნებისმიერ სხვა სტუმარს Airbnb‑ზე. „მოგზაურობისას ყველა ვეძებთ ისეთ საცხოვრებელს, სადაც თავს შინაურულად ვიგრძნობთ“, — ამბობს ხუანი და დასძენს: „სისუფთავე, სტუმართმოყვარეობა და უსაფრთხოება ძალიან მნიშვნელოვანია“.

ჯეისონი და კარენი იმავე კვირას დაბრუნდნენ შინ და სახლში თითქმის ყველაფერი წესრიგში დახვდათ, მაგრამ მეზობლებს ნაკლებად გაუმართლათ. „აღდგენას წლები დასჭირდება,“ — აღნიშნავს ჯეისონი და დასძენს: „ახალ ამბებში ამაზე აღარ საუბრობენ, მაგრამ ჯერ კიდევ არსებობენ ადამიანები, რომელთაც საცხოვრებელი დაკარგეს და დღემდე კარვების ქალაქში ცხოვრობენ პანამაში“. რეგიონში 1992 წლის შემდეგ ყველაზე დამანგრეველმა ქარიშხალმა „მაიკლმა“ მინიმუმ 36 ადამიანის სიცოცხლე შეიწირა.

„სასიამოვნო შეგრძნებაა, როცა უანგაროდ ეხმარები სხვას“, — ამბობს ხუანი და დასძენს: „ჯეისონი არაერთხელ გვთავაზობდა თანხას, მაგრამ უარს ვეუბნებოდით. მისი ოჯახი უსახლკაროდ დარჩა, ამიტომ გვსიამოვნებდა დახმარება“.

„მათ ადგილას რომ ვყოფილიყავით და ქარიშხლის პირისპირ აღმოვჩენილიყავით, აუცილებლად გვექნებოდა Open Homes‑ის იმედი“, — ამბობს ის.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.