ეფექტური კომუნიკაცია

სტუმრებთან ეფექტური კომუნიკაცია დაგეხმარებათ, კარგი სტუმრობა გადააქციოთ შესანიშნავად. გამოიყენეთ Airbnb‑ზე ხელმისაწვდომი მიმოწერის ფუნქციები, რომ გააზიაროთ მნიშვნელოვანი ინფორმაცია და შეხსენებები, სწრაფად უპასუხოთ შეკითხვებს და გულთბილად მიესალმოთ სტუმრებს.

ინფორმაციის სწორად მიწოდება სასიამოვნო სტუმრობის ერთ‑ერთი წინაპირობაა, ამიტომ გაითვალისწინეთ შემდეგი:

• იყავით ხელმისაწვდომი. ჩართეთ გაფრთხილებები, რომ სწრაფად უპასუხოთ სტუმრებისგან მიღებულ შეტყობინებებს. ანეტი, მასპინძელი სან‑ფრანცისკოდან (აშშ), აღნიშნავს, რომ სტუმრებს ყოველთვის ახსენებს: „დაგვიკავშირდით და ყველაფერზე ჩვენ ვიზრუნებთ, თუნდაც პრობლემა უმნიშვნელო იყოს“.

• იყავით გულწრფელი. ნუ შეუქმნით სტუმრებს არარეალურ მოლოდინს. „ის, თუ რას უყვებით სტუმრებს საცხოვრებელთან დაკავშირებით და რეალურად რა დახვდებათ, თანხვედრაში უნდა იყოს“, — ამბობს დანიელი, მასპინძელი სან‑ფრანცისკოდან (აშშ).

• გამოიჩინეთ ინტერესი. ჰკითხეთ სტუმრებს, რაიმე ხომ არ სჭირდებათ კომფორტული სტუმრობისთვის. „მასპინძლებს ყველაფრის წინასწარ განჭვრეტა არ შეუძლიათ“, — ამბობს სედი, სუპერმასპინძელი სანტა‑ფედან (ნიუ‑მექსიკო, აშშ).

• გამოიჩინეთ ყურადღება. პრობლემის მოგვარებისადმი თქვენმა დამოკიდებულებამ სტუმრებზე შეიძლება დაუვიწყარი შთაბეჭდილება მოახდინოს. „თუ ემპათიას გამოიჩენთ და ოპერატიულად მოაგვარებთ პრობლემას, რთული ვითარება, შესაძლოა, ახალი ჯავშნის მიღების შესაძლებლობად იქცეს“, — ამბობს ფელისიტი, მრჩეველ მასპინძელთა საბჭოს წევრი და სუპერმასპინძელი ახალი სამხრეთ უელსიდან (ავსტრალია).

წინასწარ დაფიქრდით, რა უნდა იცოდნენ სტუმრებმა და რა შეკითხვები შეიძლება ჰქონდეთ მათ. ქვემოთ გაგაცნობთ რამდენიმე ძირითად მომენტს სტუმრობის დაგეგმვისას და მისი მსვლელობის დროს:

• დაჯავშნით დაინტერესება ან დაჯავშნის მოთხოვნა. სტუმრებისთვის პასუხის გასაცემად 24 საათი გაქვთ, მაგრამ უმჯობესია, ოპერატიულად უპასუხოთ ხოლმე. მასპინძლების უმრავლესობა პასუხს ერთი საათის განმავლობაში აბრუნებს.

• ჯავშნის დადასტურება. მისწერეთ სტუმრებს და გადაუხადეთ მათ მადლობა ჯავშნის გაფორმებისთვის, ასევე, აცნობეთ, რომ მზად ხართ, უპასუხოთ მათ ნებისმიერ შეკითხვას.

• დაბინავება. ერთი‑ორი დღით ადრე შეახსენეთ სტუმრებს, სად შეუძლიათ დაბინავების ინსტრუქციის პოვნა აპში, ასევე, საჭიროებისამებრ, გაუზიარეთ მათ სასარგებლო რჩევები საცხოვრებელში მოხვედრასთან დაკავშირებით.

• სტუმრობის პერიოდი. დაბინავების შემდეგ მალევე გაარკვიეთ, ყველაფერი აქვთ თუ არა სტუმრებს იმისთვის, რომ თავი კომფორტულად იგრძნონ. სურვილისამებრ, შეგიძლიათ ურჩიოთ სტუმრებს ადგილობრივი მაღაზიები, რესტორნები და დროის გატარების ვარიანტები.

• სტუმრობის დასრულება. საცხოვრებლიდან გასვლის შემდეგ ცოტა ხანში მისწერეთ სტუმრებს, გადაუხადეთ მათ მადლობა და სთხოვეთ, დაგიტოვონ მიმოხილვა. თქვენც დაუტოვეთ სტუმრებს მიმოხილვა შეძლებისდაგვარად მალე.

გამოხმაურების მაღალი სიხშირე ერთ-ერთი ფაქტორია, რომლის საფუძველზეც თქვენი განცხადება უფრო დიდი ალბათობით მოხვდება უკეთეს პოზიციებზე Airbnb‑ზე ძიების შედეგებში.

ხშირად დასმულ შეკითხვებს დაყოვნების გარეშე რომ უპასუხოთ, ისარგებლეთ „შეტყობინებების“ ჩანართში ხელმისაწვდომი შემდეგი ფუნქციებით:

მზა პასუხები

• შექმენით შეტყობინებების შაბლონები, რომ მარტივად გააზიაროთ ინფორმაცია (მაგალითად, საპარკინგე ადგილის მდებარეობის ან დაბინავებამდე ბარგის დატოვების შესაძლებლობის შესახებ).

• ამ შაბლონებისთვის პერსონალური ელფერის შეძენაც შეგიძლიათ ცვლადებით, რომლებიც შემდეგ ავტომატურად ჩანაცვლდება ცნობებით სტუმრის, ჯავშნისა თუ საცხოვრებლის შესახებ.

• როცა მზა პასუხებს მოაწესრიგებთ და სტუმრისგან შეკითხვას მიიღებთ, ხელოვნური ინტელექტი გაარკვევს მის შინაარსს და ავტომატურად შემოგთავაზებთ თქვენ მიერ მომზადებული პასუხებიდან ყველაზე შესაფერისს.

დაგეგმილი შეტყობინებები

• მოამზადეთ სტანდარტული შეტყობინებები და დაგეგმეთ სტუმრებისთვის მათი დაგზავნა ზემოთ აღნიშნულის მსგავს მნიშვნელოვან მომენტებში.

• ამ ტიპის შეტყობინებებსაც შეგიძლიათ შესძინოთ პერსონალური ელფერი ცვლადების მეშვეობით.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.