კალენდრის მართვა

საცხოვრებლის მაძიებლები თქვენი განცხადების პოვნას შეძლებენ მისი გამოქვეყნებიდან 24 საათის განმავლობაში. ნაგულისხმევად, თქვენს კალენდარში ყველა თარიღი განბლოკილია, ამიტომ დაუყოვნებლივ ჩაასწორეთ დასაჯავშნად ხელმისაწვდომობა, შემდეგ კი აირჩიეთ გაუქმების წესები და ჯავშნების გაფორმების მეთოდი.

დაბლოკეთ კალენდარში თარიღები, რომლებში მასპინძლობასაც ვერ მოახერხებთ. ამგვარად, თქვენი განცხადება არ მოხვდება შესაბამის პერიოდებში სტუმრობის მსურველთა ძიების შედეგებში და ჯავშნების გაუქმებაც აღარ მოგიწევთ.

„ვინაიდან სტუმრებს ერთგვარ მომსახურებას უწევთ, მაქსიმალურად უნდა შეეცადოთ, არ დააღალატოთ ისინი“, — ამბობს ფელისიტი, მრჩეველ მასპინძელთა საბჭოს წევრი და სუპერმასპინძელი ახალი სამხრეთ უელსიდან (ავსტრალია).

დასაჯავშნად ხელმისაწვდომობის სამართავად მიიღეთ ქვემოთ აღნიშნული ზომები.

• განსაზღვრეთ, რამდენით ხნით ადრე შეეძლოთ სტუმრობის მსურველებს ჯავშნების გაფორმება. სურვილისამებრ, ჯავშნების მიღება შეგიძლიათ დაბინავების დღესვე, კონკრეტულ დრომდე, ასევე, საშუალება გაქვთ, მოითხოვოთ, რომ ჯავშნები ფორმდებოდეს დაბინავებამდე მინიმუმ რამდენიმე (მაქსიმუმ 7) დღით ადრე.

• შეასრულეთ თქვენი კალენდრების სინქრონიზაცია. Airbnb‑ზე თქვენი კალენდრის სხვა კალენდრებთან (ასეთის არსებობის შემთხვევაში) სინქრონიზაცია დაგეხმარებათ მასპინძლობის კუთხით თქვენი განრიგის უკეთ მართვასა და ორმაგი ჯავშნების თავიდან აცილებაში.

• აირჩიეთ ჯავშნების გაუქმების წესები. თქვენ თავად წყვეტთ, რამდენად მოქნილი ან მკაცრი იყოს წესები იმ შემთხვევაში, თუ სტუმარი ჯავშნის გაუქმებას გადაწყვეტს. შეაჩერეთ არჩევანი იმ ვარიანტზე, რომელიც თქვენთვის მოსახერხებელია.

• მუდმივად განაახლეთ კალენდარი. ეს თავიდან აგაცილებთ ჯავშნების გაუქმების აუცილებლობასა და ამასთან დაკავშირებულ ჯარიმებსა თუ გადასახადებს.

გადაწყვიტეთ, როდის გირჩევნიათ, სტუმრები დაბინავდნენ და გავიდნენ საცხოვრებლიდან, ასევე, რა დრო გჭირდებათ სტუმრობებს შორის.

• განსაზღვრეთ სტუმრობის მინიმალური და მაქსიმალური ხანგრძლივობა. კონკრეტული თარიღებისთვის შეგიძლიათ სტუმრობის ხანგრძლივობები ინდივიდუალურად დააწესოთ. ყოველთვის დაიცავით ადგილობრივი წესები და რეგულაციები.

• დაადგინეთ მომზადების დრო. დაფიქრდით, რა დრო გჭირდებათ თქვენ ან დამლაგებლებს სტუმრობებს შორის. მრავალი მასპინძელი სტუმრებს დაბინავების საშუალებას აძლევს იმავე დღეს, როცა სხვები საცხოვრებლიდან გადიან, ზოგს კი ყოველი სტუმრობის შემდეგ ან ახალ სტუმრობამდე ერთი‑ორი ღამის დაბლოკვა სჭირდება მოსამზადებლად.

• მიუთითეთ შესვლისა და გასვლის საათები. აირჩიეთ, რამდენად ადრე შეეძლოთ სტუმრებს დაბინავება და რამდენად გვიან — საცხოვრებლიდან გასვლა. ამასთან, საშუალება გაქვთ, განსაზღვროთ საცხოვრებელში შესვლის ბოლო ვადა, თუ არ გსურთ, რომ სტუმრები ძალიან გვიან ბინავდებოდნენ.

ჯავშნების მიღება შეგიძლიათ როგორც ავტომატურად, ისე არაავტომატურად. ამ კუთხით პარამეტრების ჩასწორება მარტივია ნებისმიერ დროს.

• მომენტალური დაჯავშნის ფუნქცია საშუალებას აძლევს სტუმრობის მსურველებს, რომლებიც აკმაყოფილებენ თქვენ მიერ სტუმრების მიმართ დაწესებულ მოთხოვნებს და სახლის წესების დაცვასაც ეთანხმებიან, ავტომატურად დაჯავშნონ თქვენს კალენდარში დასაჯავშნად ხელმისაწვდომი თარიღები. სტუმრები ჩვეულებრივ შეძლებენ თქვენთან დაკავშირებას, თუ მათ რაიმე შეკითხვა ექნებათ.

• დაჯავშნის მოთხოვნების არჩევის შემთხვევაში 24 საათი გექნებათ მათ დასაკმაყოფილებლად ან უარსაყოფად (თუ მოთხოვნასთან დაკავშირებით არ მიიღებთ გადაწყვეტილებას აღნიშნულ ვადაში, მას ძალა დაეკარგება). ეს დრო საკმარისია იმისთვის, რომ დააზუსტოთ სტუმრობის მსურველებთან, ცნობილია თუ არა მათთვის საცხოვრებელში მოქმედი რაიმე განსაკუთრებული წესების ან მისი თავისებურებების შესახებ, თუ, ვთქვათ, ერთადერთ შესასვლელთან მიმავალი კიბე საკმაოდ დაქანებულია და ეს მომენტი აუცილებლად გასათვალისწინებელია. თუ დაჯავშნის მოთხოვნას ძალა დაეკარგება, მოთხოვნილი თარიღები კალენდარში დაგებლოკებათ, სანამ მათ ხელახლა არ განბლოკავთ.

იმის მიუხედავად, თუ რომელ მეთოდს აირჩევთ ჯავშნების გასაფორმებლად, მუდმივად განაახლეთ თქვენი კალენდარი, რომ თავიდან აიცილოთ შესაძლო კონფლიქტები განრიგებში და ჯავშნების გაუქმების აუცილებლობა.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.