საცხოვრებლიდან გასვლის მარტივი და მკაფიო პროცედურა

საცხოვრებლიდან გასვლა სტუმრებისგან და მასპინძლებისგან მინიმალურ ძალისხმევას უნდა მოითხოვდეს. დაამატეთ ინსტრუქცია თქვენს განცხადებას, Airbnb კი ავტომატურად გაუგზავნის მას სტუმრებს საცხოვრებლიდან გასვლის წინა ღამეს.

საცხოვრებლიდან გასვლის ინსტრუქციაში მითითებების დამატება შეგიძლიათ ზუსტად ისე, როგორც სახლის სტანდარტულ წესებს ამატებთ. ასარჩევად ხელმისაწვდომია შემდეგი სტანდარტული ამოცანები:

• გამოყენებული პირსახოცების შეგროვება
• ნაგვის გადაყრა
• ყველაფრის გამორთვა
• კარის დაკეტვა
• გასაღების დაბრუნება

თითოეული ამოცანის შემთხვევაში, საჭიროებისამებრ, შეგეძლებათ დეტალების დაზუსტება. მაგალითად, საშუალება გექნებათ, მიუთითოთ, რომ სტუმრებმა ორგანული ნაგავი ერთ კონკრეტულ ურნაში ჩაყარონ, ხოლო ის, რაც გადამუშავებას ექვემდებარება — სხვა რომელიმე ურნაში. ამას გარდა, შეძლებთ კონკრეტულად თქვენ მიერ განთავსებული საცხოვრებლისთვის სპეციფიკური თხოვნების მითითებას — ვთქვათ, თუ სტუმრებმა გრილი გამოიყენეს, საცხოვრებლიდან გასვლამდე თავსახურის დახურვა რომ არ დაავიწყდეთ.

სტუმრობის მსურველებს ჯავშნის გაფორმებამდე შეუძლიათ საცხოვრებლიდან გასვლის ინსტრუქციისა და სახლის წესების გაცნობა. ჯავშნის გაფორმების შემდეგ საცხოვრებლიდან გასვლის ინსტრუქცია სტუმრებისთვის ხელმისაწვდომი იქნება „სტუმრობების“ ჩანართში, სახლის წესებთან, Wi‑Fi ქსელის ინფორმაციასთან და სხვა მნიშვნელოვან ცნობებთან ერთად.

სტუმრებმა, რა თქმა უნდა, არ უნდა გახეხონ ყველა კუთხე‑კუნჭული საცხოვრებლიდან გასვლამდე, თუმცა, მათთვის მოქმედი ძირითადი წესების მიხედვით, მათ საცხოვრებელი არც ისეთ მდგომარეობაში უნდა დატოვონ, რომელიც ზედმეტ ან საგულდაგულო დასუფთავებას საჭიროებს.

„ვცდილობთ, საცხოვრებლიდან გასვლის პროცესი მაქსიმალურად მარტივი იყოს“, — ამბობს კეშავი, მრჩეველ მასპინძელთა საბჭოს წევრი ნიუ‑დელიდან (ინდოეთი), და დასძენს: „სტუმრობის შემდეგ დამლაგებელი მოდის და დანარჩენს ის მიხედავს“.

სტუმრებს ავტომატურად შევახსენებთ საცხოვრებლიდან გასვლის დროს და შესაბამის მითითებებსაც მივაწვდით. სტუმრები თავიანთ მობილურ მოწყობილობაზე მიიღებენ push‑გაფრთხილებას, სტუმრობის დასრულების წინა დღეს, 17:00‑ზე (იმ სასაათო სარტყლის მიხედვით, რომელშიც იმყოფებიან).

აღნიშნული შეხსენების მისაღებად სტუმრებს სჭირდებათ Airbnb‑ს აპის ჩამოტვირთვა და push‑გაფრთხილებების ფუნქციის ჩართვა. საცხოვრებლიდან გასვლის შემდეგ სტუმრები ღილაკზე ერთი შეხებით ან დაწკაპუნებით შეძლებენ, შეგატყობინონ, რომ წავიდნენ.

სურვილისამებრ, შეგიძლიათ ხაზი გაუსვათ იმას, თუ რატომ არის მნიშვნელოვანი, რომ სტუმრები დროულად გავიდნენ საცხოვრებლიდან. „სტუმრებს ვუხსნი, რომ 11 საათზე დამლაგებელი მოვა. ასე მათ უკეთ ესმით, რატომ არის მნიშვნელოვანი საცხოვრებლიდან დროულად გასვლა“, — გვიზიარებს ჯო, სუპერმასპინძელი სან‑ფრანცისკოდან (აშშ).

ბარათი ინფორმაციით საცხოვრებლიდან გასვლის შესახებ სტუმრებისთვის შესაბამისი ინფორმაციის მიწოდების მოსახერხებელი საშუალებაა. მოამზადეთ ინსტრუქცია, შემდეგ კი დაამატეთ ბარათი ინფორმაციით საცხოვრებლიდან გასვლის შესახებ მზა პასუხებს ან დაგეგმილ შეტყობინებებს. ბარათში მოცემული იქნება ბმული, რომელიც თქვენ მიერ მომზადებულ ინსტრუქციაზე გადავა.

მართალია, ერთი დღით ადრე Airbnb ავტომატურად შეახსენებს სტუმრებს საცხოვრებლიდან გასვლის დროის მოახლოებას, თუმცა თავადაც შეგიძლიათ სხვა შეტყობინებების მომზადება. მაგალითად, დაგეგმეთ ისეთი შეტყობინების გაგზავნა, რომლითაც სტუმრებს საცხოვრებლიდან გასვლას შეახსენებთ და რომელსაც ისინი პირდაპირ Airbnb‑ზე, თავიანთ შემომავალ შეტყობინებებში მიიღებენ (იმ შემთხვევისთვის, თუ მათ არ აქვთ ჩამოტვირთული აპი და არც push‑გაფრთხილებები ჩართული).

საცხოვრებლიდან გასვლის შემდეგ სტუმრებს შეუძლიათ მასპინძლის შეფასება კომუნიკაციის კუთხით და იმის დაზუსტება, თუ რა მოეწონათ და რის გაუმჯობესებას ისურვებდნენ. მაგალითად, ზოგმა, შესაძლოა, აღნიშნოს „ზედმეტი მითითებები გასვლასთან დაკავშირებით“. თუ მასპინძელი ბევრ დაბალ შეფასებას მიიღებს არაადეკვატური ამოცანების გამო, შესაბამისი განცხადება, შესაძლოა, წაიშალოს Airbnb‑დან.

სტუმრებს, ასევე, შეუძლიათ მთლიანად სტუმრობის შეფასება. ცალკეულ კატეგორიებთან (მაგალითად, კომუნიკაციასთან) დაკავშირებით დატოვებული გამოხმაურება და ვარსკვლავებით შეფასება არ აისახება სუპერმასპინძლის სტატუსზე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.