მომგებიანი პირობებით მასპინძლობა

უცნობი ადამიანების მასპინძლობა, შესაძლოა, თქვენთვის სიახლე იყოს. მასპინძლობის კუთხით კომფორტული პირობები რომ შეგიქმნათ, Airbnb გთავაზობთ სხვადასხვა პარამეტრსა და ფუნქციას, რომელთა მეშვეობითაც განსაზღვრავთ, როგორ და როდის გსურთ მასპინძლობა.

დაჯავშნის პარამეტრები შეგიძლიათ მოირგოთ თქვენი საჭიროებების, ხელმისაწვდომობისა და, უბრალოდ, არჩევანის მიხედვით — მაგალითად, მიუთითოთ, საცხოვრებლის რომელი სივრცეებით სარგებლობა შეუძლიათ სტუმრებს, რამდენ ადამიანზეა გათვლილი საცხოვრებელი და სხვა.

განცხადებაში მითითებული ინფორმაციის მეშვეობით სტუმრობის მსურველები წინასწარ იქმნიან წარმოდგენას საცხოვრებელზე, საცხოვრებელ პირობებსა და ფასზე. განცხადების შექმნისას უნდა გაითვალისწინოთ რამდენიმე ასპექტი, კერძოდ:

• ერთი ღამის ფასი და სხვა გადასახადები: Airbnb‑ს მეშვეობით მასპინძლობისას ერთი ღამის ფასს თავად აწესებთ. ფასის შეცვლა შეგიძლიათ ჯავშნის მიღებამდე ნებისმიერ დროს, ხოლო, სურვილისამებრ, შეგიძლიათ განსხვავებული ფასები დააწესოთ სხვადასხვა თარიღსა თუ სეზონზე. ამასთან, საშუალება გაქვთ, სტუმრებს დააკისროთ დამატებითი გადასახადები დასუფთავებისთვის, გათვალისწინებულზე მეტი სტუმრისთვის და სხვა. ჩვენი რჩევები დაგეხმარებათ კონკურენტუნარიანი ფასის შერჩევაში.
• სტუმრების რაოდენობა: განცხადებაში შეგიძლიათ მიუთითოთ, ერთდროულად რამდენი ადამიანის მასპინძლობისთვის ხართ მზად. საცხოვრებლის დაჯავშნას სტუმრობის მსურველები მხოლოდ იმ შემთხვევაში შეძლებენ, თუ მათი ჯგუფის ზომა არ აღემატება ამ მნიშვნელობას.
• სტუმრებისთვის ხელმისაწვდომი საყოფაცხოვრებო პირობები: თუ საცხოვრებელში არის გრილი ან სარეცხი მანქანა საშრობით, ეს სულაც არ ნიშნავს, რომ ისინი სტუმრებისთვის ავტომატურად ხელმისაწვდომია. საჭიროებისამებრ, შეგიძლიათ მიუთითოთ, რისი გამოყენების უფლება აქვთ სტუმრებს, რისი — არა და რისი — გარკვეული შეზღუდვებით. მაგალითად, ბრაიანს, მასპინძელს ნიუპორტიდან (როდ‑აილენდი), საცხოვრებლის აღწერილობაში უწერია, რომ „სტუმრებს სარეცხი მანქანისა და საშრობის გამოყენება შეუძლიათ მოთხოვნის საფუძველზე“.

სახლის წესების განსაზღვრა დაგეხმარებათ სტუმრებისთვის სათანადო მოლოდინის შექმნასა და მასპინძლობის თქვენეული სტილის დემონსტრირებაში. მათი გაცნობის შემდეგ, სტუმრობის მსურველები გადაწყვეტენ, შესაფერისია თუ არა მათთვის თქვენ მიერ განთავსებული საცხოვრებელი.

სახლის წესები ამ ეტაპზე წარმოდგენილია ოთხ შესამჩნევ ადგილას: განცხადების გვერდზე, საცხოვრებლის დაჯავშნის პროცესში, ასევე, ჯავშნის დამადასტურებელ ელწერილსა და დაბინავების გზამკვლევში, რომელიც სტუმრობამდეა ხელმისაწვდომი. სახლის ძირითადი წესების დაცვა სავალდებულოა.

სტანდარტული ნაკრებიდან შესაძლებელია სახლის წესების არჩევა შემდეგი კუთხით:

• შინაური ცხოველები
• ღონისძიებები
• მოწევა, ვეიპინგი და ელექტროსიგარეტები
• სიმშვიდის საათები
• შესვლისა და გასვლის საათები
• სტუმრების მაქსიმალური რაოდენობა
• კომერციული ფოტო‑ და ვიდეოგადაღება

როგორც ყოველთვის, სახლის სტანდარტულ წესებს შეგიძლიათ დამატებითი წესებიც მიაწეროთ და აღნიშნოთ ყველაფერი დანარჩენი, რაც სტუმრებისთვის აკრძალულია (მაგალითად, კერძო აივნით ან საკუჭნაოთი სარგებლობა). ამას გარდა, შეგიძლიათ დაურთოთ გარკვეული მოთხოვნები ადგილობრივ წეს‑ჩვეულებებთან დაკავშირებით — მაგალითად, რომ სიესტის დროს საჭიროა სიმშვიდის დაცვა ან რომ სახლში არ არის მიღებული ფეხსაცმლით სიარული.

თუ თვლით, რომ სტუმარი არღვევს თქვენს წესებს (თქვენ მიერ არჩეულს ან დაწერილს), მიმართეთ გაერთიანების მხარდაჭერის გუნდს. საჭიროების შემთხვევაში, ჯავშნის გაუქმებაში დაგეხმარებით.

გაითვალისწინეთ, რომ სახლის წესები არ უნდა ეწინააღმდეგებოდეს Airbnb‑ს პირობებსა და დებულებებს (მომსახურების პირობებისა და ანტიდისკრიმინაციული პოლიტიკის ჩათვლით).

კალენდრისა და დაჯავშნის პარამეტრების დახმარებით შეგიძლიათ განსაზღვროთ დასაჯავშნად ხელმისაწვდომობა და რა ტიპის ჯავშნების მიღება გსურთ. დაჯავშნის პარამეტრების დაყენებისას გაითვალისწინეთ რამდენიმე ასპექტი, კერძოდ:

• დასაჯავშნად ხელმისაწვდომობა: თქვენი გადასაწყვეტია, რომელი თარიღების დაჯავშნა შეძლონ სტუმრებმა. საჭიროებისამებრ, შეგიძლიათ დაბლოკოთ კონკრეტული თარიღები კალენდარში, თუ, მაგალითად, ქალაქიდან გასული იქნებით, მეგობრებს ან ოჯახის წევრებს ელოდებით ან სხვა მიზეზით ვერ ახერხებთ მასპინძლობას. თუ ყოველ სტუმრობას შორის შესვენება ან დასუფთავებისთვის გარკვეული დრო გჭირდებათ, მისი მითითებაც შეგიძლიათ.
• დაჯავშნის მეთოდი: მასპინძლებს შეუძლიათ აირჩიონ საცხოვრებლის დაჯავშნის ხერხი — კერძოდ, მომენტალური დაჯავშნა ან დაჯავშნის მოთხოვნების მიღება. მომენტალურად დაჯავშნა ნიშნავს, რომ ისინი, ვინც თქვენ მიერ სტუმრების მიმართ დაწესებულ ყველა მოთხოვნას აკმაყოფილებენ და სახლის წესების დაცვასაც დაეთანხმებიან, მომენტალურად შეძლებენ ხელმისაწვდომი თარიღების დაჯავშნას. თუ დაჯავშნის მოთხოვნების მიღებას აირჩევთ, თითოეული მოთხოვნის განხილვა და მასთან დაკავშირებით გადაწყვეტილების მიღება მოგიწევთ.
• სტუმრობის ხანგრძლივობა: სურვილისამებრ, შეგიძლიათ განსაზღვროთ სტუმრობის მინიმალური და მაქსიმალური ხანგრძლივობები (დამოკიდებულია ადგილობრივ კანონმდებლობაზე). ზოგიერთი მასპინძელი სტუმრობის ხანგრძლივობას სეზონური მოთხოვნის მიხედვით ცვლის, მაგალითად, ითხოვს, რომ პიკის პერიოდებში ჯავშნის ხანგრძლივობა იყოს მინიმუმ 2 ღამე ან, ზოგჯერ, ერთი კვირაც კი.
• დრო დაბინავებამდე: ზუსტად არ იცით, როდის გეცლებათ მასპინძლობისთვის? პრობლემა არ არის. პარამეტრებიდან შეგიძლიათ განსაზღვროთ, რამდენად ადრე გსურთ ჯავშნების მიღება. ამგვარად, სტუმრობის მსურველები ვერ დაჯავშნიან იმ თარიღებს, როცა არ იცით, რას აპირებთ. ამას გარდა, შეგიძლიათ მიუთითოთ, რა დრო გჭირდებათ მომდევნო სტუმრისთვის საცხოვრებლის მოსამზადებლად — მაგალითად, თავიდან რომ აიცილოთ ჯავშნები იმავე ან მომდევნო დღეს დაბინავების მოთხოვნით.
• სტუმრების დაბინავებისა და გასვლის საათები: საცხოვრებლიდან გვიან გასვლის შემთხვევები ან გათვალისწინებულზე ადრე დაბინავების სურვილი, შესაძლოა, ზოგჯერ წინააღმდეგობაში აღმოჩნდეს სხვა ჯავშნებთან, განსაკუთრებით, როცა თქვენთან ზედიზედ რამდენიმე სტუმრობაა დაგეგმილი. პარამეტრებიდან შეგიძლიათ განსაზღვროთ შესვლისა და გასვლის კონკრეტული საათები. ამასთან, განცხადებაშიც შეგიძლიათ აღნიშნოთ, რატომ არის მნიშვნელოვანი ამ საათების დაცვა (მაგალითად, დაწეროთ, რომ „დილის 11 საათზე დამლაგებელი მოდის“).

გახსოვდეთ, რომ დაჯავშნის პარამეტრების შეცვლა ნებისმიერ დროს შეგიძლიათ. ამას გარდა, კარგი იქნება, თუ პერიოდულად გადახედავთ ხოლმე მათ და შეამოწმებთ, სწორად არის თუ არა განსაზღვრული დასაჯავშნად ხელმისაწვდომობა და თქვენთვის მნიშვნელოვანი სხვა ასპექტები.

მასპინძლები აფასებენ სტუმრებს, რომლებიც Airbnb‑ს მეშვეობით შეთავაზებულ საცხოვრებელს ისევე უფრთხილდებიან, როგორც თავიანთ საკუთარ სახლს. Airbnb‑ზე მოქმედებს სხვადასხვა წესი და დაცვის მექანიზმი. მათი მიზანია, დააინტერესოთ სტუმრობის ის მსურველები, რომლებისთვისაც თქვენ მიერ შეთავაზებული საცხოვრებელი კარგი არჩევანი იქნება.

საცხოვრებლის მკაფიო აღწერილობა, სახლის დეტალურად განმარტებული წესები და დაჯავშნის აქტუალური პარამეტრები, ასევე, აუმაღლებს პასუხისმგებლობის გრძნობას სტუმრებს, თქვენ კი მათი მშვიდად მასპინძლობის საშუალებას მოგცემთ.