სტუმრის ცნობარის შედგენა საცხოვრებლის შესახებ ინფორმაციით

როგორ დავუკავშირდე Wi‑Fi‑ს? სად არის თერმოსტატი? დისტანციური მართვის რომელი პულტი რისთვის არის? — ეს მხოლოდ რამდენიმე შეკითხვაა, რომლებიც, შესაძლოა, სტუმრებს ჰქონდეთ, თქვენ კი შეგიძლიათ მათ პასუხების მიღებაში დაეხმაროთ. მნიშვნელოვანია ისიც, რომ სტუმრებმა სწორად გამოიყენონ საყოფაცხოვრებო ტექნიკა და ყველაფერი, რასაც საცხოვრებელში სთავაზობთ. სწორედ ამისთვის გვაქვს Airbnb‑ზე სტუმრის ცნობარი.

ცნობარში შეგიძლიათ სტუმრებს სხვადასხვა დეტალური ინსტრუქცია გააცნოთ და გარკვევით აუხსნათ, სად იპოვონ უსაფრთხოების მოწყობილობები, Wi‑Fi როუტერი თუ სხვა მნიშვნელოვანი ნივთები. ის დაგეხმარებათ დროის დაზოგვაში, რადგან მისი შედგენა მხოლოდ ერთხელ მოგიწევთ. ამას გარდა, ყოველი ახალი ჯავშნისთვის ელწერილების ხელახლა დაწერა და დაგზავნაც აღარ დაგჭირდებათ, რადგან სტუმრებს ნებისმიერ დროსა თუ ადგილას შეეძლებათ ცნობარის გახსნა აპის მეშვეობით. ნილი, რომელიც კალიფორნიის ქალაქ მაუნთინ-ვიუში მასპინძლობს, სიხარულით აღნიშნავს, როგორ იყენებს ამ ხელსაწყოს, რომ თავიდან აიცილოს „SMS‑ები გვიან ღამით, მოულოდნელი ზარები და ყველაზე ცუდი რამ: უარყოფითი მიმოხილვები“.

სტუმრის ცნობარის ყველა უპირატესობით რომ ისარგებლოთ, გამოიყენეთ მრავალჯერ ნაცადი, ეფექტური რჩევები მასპინძლებისგან:

სტუმრებს Wi‑Fi ხშირად დაბინავებისთანავე სჭირდებათ, ამიტომ ბევრი მასპინძელი პაროლს სტუმრის ცნობარის ზედა ნაწილში უთითებს. „პაროლს ყველა ითხოვს, ამიტომ მას ცნობარში ვუთითებ, რომ დანარჩენი ინფორმაციის წასაკითხადაც შევიტყუო სტუმრები“, — ამბობს მარიტ ენი ტრომსიდან (ნორვეგია).

განსაკუთრებით მნიშვნელოვანია, რომ Wi-Fi ქსელის პაროლი მარტივად იპოვონ სტუმრებმა, რომლებიც დისტანციურად მუშაობენ და შესაძლოა, დაბინავების შემდეგ მალევე სჭირდებოდეთ ვირტუალურ შეხვედრაში ჩართვა, ელწერილის გაგზავნა ან ანგარიშის მომზადება.

შესაძლოა, პარკირების წესები და ნიშნები, რომლებიც ქუჩებშია, სტუმრებისთვის დამაბნეველი იყოს, განსაკუთრებით, თუ ისინი უცხო ენაზეა. კარგი იქნება, თუ სტუმრებს ისეთ მკაფიო ინსტრუქციას მიაწვდით, როგორიც, მაგალითად, მითითებული აქვთ ბენსა და ენჯელს, მასპინძლებს უელინგტონიდან (ახალი ზელანდია): „პარკირება შეგიძლიათ თეთრი მესრის წინ, სახლთან მისასვლელი გზის მარჯვენა მხარეს, ცოცხალ ღობესთან“.

თუ იმ სტუმრებსაც მასპინძლობთ, რომლებსაც შინაური ცხოველები ან ბავშვები ახლავთ, სასურველია, სტუმრის ცნობარში ყველა შესაბამისი პირობა გააცნოთ, რომ ყველაფერი წინასწარ დაგეგმონ. ცნობარში შეგიძლიათ მიუთითოთ:

• სად ინახავთ წყლისა და საკვების თასებს შინაური ცხოველებისთვის
• რომელი პირსახოცები გამოიყენება ფეხებისა და თათების გასაწმენდად
• რა პირობები გაქვთ ბავშვებისთვის, მაგალითად, ჩვილის საწოლი ან ბავშვის სკამ‑მაგიდა
• რომელ ოთახებშია განთავსებული კვამლისა და მხუთავი აირის დეტექტორები

ხანგრძლივი მგზავრობით დაღლილმა სტუმრებმა პირველადი საჭიროების ნივთები რომ ადვილად იპოვონ, ჯო და ჯიანი, მასპინძლები სან-ფრანცისკოდან, ინსტრუქციას ტოვებენ. წარმოგიდგენთ მაგალითებს:

• „გამათბობელი: თერმოსტატი კედელზეა, ტელევიზორთან ახლოს. არ დაგავიწყდეთ მისი გამორთვა სახლიდან გასვლისას.
• უნიტაზი: უნიტაზში ტუალეტის ქაღალდის გარდა არაფერი ჩაყაროთ. სხვა დანარჩენისთვის ნაგვის პატარა ურნა დგას.
• სამზარეულოს ნივთები: თეფშები და ჭიქები ზედა კარადაშია, მიკროტალღური ღუმელის ორივე მხარეს. დანა-ჩანგალი უჯრაშია, ჰაერღუმელის მარცხენა მხარეს, ტაფები კი — კარადაში. გამოიყენეთ, რაც გაგიხარდებათ. როცა მორჩებით, შეგიძლიათ დასვრილი თეფშები ჭურჭლის სარეცხ მანქანაში მოათავსოთ. მას სრულად დატვირთვის შემდეგ ჩავრთავთ“.

მასპინძლები, რომლებიც შეთავაზებულ საცხოვრებელში ან მასთან ახლოს არ ცხოვრობენ, გირჩევენ, მიუთითოთ ინსტრუქცია ნაგვის გატანასთან, წყლის გამოყენებასა და სხვა ადგილობრივ პირობებთან დაკავშირებითაც:

• „ნაგავი: ნარჩენები ჩაყარეთ ნაგვის 125‑ლიტრიან ურნაში, რომელიც სარდაფშია. არ დატოვოთ ნაგავი გარეთ ან პარმაღზე, სადაც შეიძლება ჩიტები, ენოტები და სხვა ცხოველები მიწვდნენ“, — კიმი აპსონიდან (ვისკონსინი)
• „წყალი და ელექტროენერგია: ყურადღება მიაქციეთ, რა ოდენობის წყალსა და ელექტროენერგიას მოიხმართ. ცხელი წყალი შეზღუდულია“, — ფრედი პლასენსიიდან (ბელიზი)

დეტალური ინსტრუქცია მნიშვნელოვანია, ამბობენ მასპინძლები ჯო და ჯანი. აი, როგორ აღწერენ ისინი სტრიმინგ-სერვისების გამოყენების წესს:

„Netflix‑თან, Prime Video‑სთან და სხვა სტრიმინგ-სერვისებთან დასაკავშირებლად:

1. ჩართეთ ტელევიზორი საძინებელში და ცოტა ხნით დაელოდეთ. ამ ხნის განმავლობაში მხოლოდ სტანდარტული ფონი გამოჩნდება.
2. ერთი წუთის შემდეგ დააჭირეთ ბრილიანტის ფორმის ფერად ღილაკს.
3. აირჩიეთ აპი, რომელთან დაკავშირებაც გსურთ, და დააჭირეთ მთავარ ღილაკს. Netflix‑ისთვის შეგიძლიათ გამოიყენოთ სტუმრის ანგარიში, რომელიც თქვენთვის შევქმენით“.

ბევრი მასპინძელი ხაზგასმით აღნიშნავს, რომ სტუმრის ცნობარი მოკლე და მკაფიო უნდა იყოს. „სტუმრებს დიდი სირთულეების დაძლევა არ უნდა უწევდეთ იმისთვის, რომ მასპინძელი კმაყოფილი დარჩეს“, — ამბობს თინა კანადის ქალაქ ნანაიმოდან და დასძენს: „თქვენი საჭიროებებიც უნდა გაითვალისწინოთ და სტუმრებსაც თავი შინაურულად აგრძნობინოთ“.

როცა სტუმრის ცნობარის შედგენას მორჩებით, შეგიძლიათ საცხოვრებელში ლამინირებული, ადვილად გასასუფთავებელი აბრა განათავსოთ და მასზე Wi‑Fi ქსელთან დაკავშირების ინსტრუქცია დაიტანოთ. ამგვარად, სტუმრები ინფორმაციას კიდევ უფრო მარტივად იპოვიან, თქვენ კი ყოველ ჯერზე შესანიშნავ მიმოხილვებს მიიღებთ.

სტუმრის ცნობარის დამატების წესი