რჩევები სეზონზე მასპინძლობის გასამარტივებლად

სეზონს „სეზონი“ ტყუილუბრალოდ არ ჰქვია: მსგავს პერიოდებში მასპინძელთა კალენდრები ბოლომდე შევსებულია, სტუმრობებს შორის კი დიდი დრო არ არის და ზოგჯერ ბევრი საკითხია მოსაგვარებელი. სწორედ ამიტომ, ჩვენ მოგიმზადეთ რამდენიმე რჩევა, გაზრდილი მოთხოვნის პირობებში მასპინძლობას თავი შესანიშნავად რომ გაართვათ.

რაც უფრო ერთნაირ ამოცანებს შეასრულებთ ყოველი სტუმრობის შემდეგ, მით უფრო სწრაფად მოამზადებთ საცხოვრებელს მომდევნო სტუმრისთვის, როცა ერთმანეთის მიყოლებით გაქვთ ჯავშნები. რობინი, სუპერმასპინძელი მაუნტ‑ბარკერიდან (ავსტრალია), გვირჩევს, საკონტროლო სია ვიქონიოთ (იმის მიუხედავად, დასუფთავების საკითხს თავად ვაგვარებთ თუ სხვისი დახმარებით).

„საკონტროლო სია კონცენტრირებაში მეხმარება, რადგან ვიცი, რომ არაფერი გამომრჩება“, — გვიზიარებს რობინი და დასძენს: „ხდება ხოლმე, რომ ყურადღება სხვა რაღაცაზე გადაგვაქვს და გვავიწყდება, რას ვაკეთებდით. სიის დახმარებით კი ყველაზე პატარა დეტალებსაც ვითვალისწინებ, რომ სტუმრობამ ყველასთვის სასიამოვნოდ ჩაიაროს“.

სხვა რჩევები სტუმრების სწრაფი ცვლის პირობებში:

• გააორმაგეთ ან გაასამმაგეთ თეთრეულის რაოდენობა: დამატებითი ზეწრები და პირსახოცები საშუალებას მოგცემთ, ისე მოაწესრიგოთ საძინებელი, სააბაზანო და სამზარეულო, რომ სარეცხის დაუყოვნებლივ რეცხვა არ დაგჭირდეთ. ამას გარდა, ეს იმ შემთხვევაშიც დაგეხმარებათ, თუ თეთრეულზე აღმოჩნდება რთულად მოსაშორებელი ლაქები (მაგალითად, მაკიაჟის ან ცხიმის).

• გამოიყენეთ საბნის/ბალიშის პირები და მატრასის გადასაფარებლები: გააორმაგეთ მათი რაოდენობაც, რომ სტუმრობებს შორის სწრაფად მოაწესრიგოთ ყველაფერი.

• შეუკვეთეთ ნივთების ადგილზე მოტანა: მაღაზიებში სიარულის გარეშე შეავსეთ საწმენდი საშუალებების, სააბაზანოს ნივთების, სურსათისა და იმ სხვა პროდუქტების მარაგი, რომლებიც რეგულარულად გჭირდებათ ან რომლებსაც სტუმრებს ახვედრებთ.

• იქონიეთ სათადარიგო გეგმა დასუფთავების, ტექნიკური მომსახურების ან ბაღის მოვლის კუთხით: ეს დაგეხმარებათ, ყველაფერი დროულად მოასწროთ იმ შემთხვევაშიც კი, როცა თქვენ ან თქვენიანები მიუწვდომელი იქნებით. თუ ზედმეტად იტვირთებით ხოლმე, გირჩევთ, დაიმატოთ თანამასპინძელი.

საცხოვრებლიდან გასვლა თქვენგან და თქვენი სტუმრებისგან მინიმალურ ძალისხმევას უნდა საჭიროებდეს. საგანგებოდ ამისთვის, მაისში, სპეციალური ხელსაწყოებიც წარმოგიდგინეთ.

ახალ ფუნქციებს შორისაა ავტომატური Push‑გაფრთხილებები და საცხოვრებლიდან გასვლის შეტყობინება ღილაკზე ერთი შეხებით. საცხოვრებლიდან გასვლის დროსა და შესაბამის ინსტრუქციას Airbnb სტუმრებს ერთი დღით ადრე, ადგილობრივი დროით 17:00‑ზე ახსენებს. შეხსენებებს მიიღებენ სტუმრები, რომლებსაც თავიანთ მობილურ მოწყობილობებზე უყენიათ ჩვენი აპი და ჩართული აქვთ push‑გაფრთხილებების მიღება. ამას გარდა, სტუმრებს შეუძლიათ, ღილაკზე ერთი შეხებით შეგატყობინონ, რომ წავიდნენ, რაც საშუალებას მოგცემთ, მომდევნო სტუმრისთვის დაიწყოთ მზადება.

ჯოს, სუპერმასპინძელს ფორესტვილიდან (კალიფორნია, აშშ), ურჩევნია, სტუმრობის დასრულების დროის მოახლოებისას თავისი შედგენილი ტექსტი გაუგზავნოს სტუმრებს დაგეგმილი შეტყობინებების სახით — განსაკუთრებით, სეზონზე. „სტუმრებს ვუხსნი, რომ 11 საათზე დამლაგებელი მოვა. ასე უკეთ ესმით, რატომ არის მნიშვნელოვანი საცხოვრებლიდან დროულად გასვლა“, — გვიზიარებს ის.

სხვა რჩევები, საცხოვრებლიდან გასვლასთან დაკავშირებული ხელსაწყოების დახმარებით დრო რომ დაზოგოთ:

• მოამზადეთ საცხოვრებლიდან გასვლის საბაზისო ინსტრუქცია: ინსტრუქციის სწრაფად შექმნა შეგიძლიათ 5 სტანდარტული ამოცანის სიიდან საჭირო ვარიანტების არჩევით. თითოეული ამოცანისთვის შეგიძლიათ საგულისხმო დეტალების დართვა. მაგალითად, „ნაგვის გადაყრის“ არჩევის შემთხვევაში, საშუალება გექნებათ, დაუზუსტოთ სტუმრებს, რომ ორგანული ნაგავი ერთ კონკრეტულ ურნაში ჩაყარონ, ხოლო ის, რაც გადამუშავებას ექვემდებარება — სხვა რომელიმე ურნაში.

• დაურთეთ მითითებები კონკრეტულად თქვენ მიერ განთავსებულ საცხოვრებელთან დაკავშირებით: თუ, მაგალითად, სტუმრებისთვის ხელმისაწვდომია გარე გამოყენების გრილი, შეგიძლიათ სთხოვოთ მათ, დააფარონ გრილს თავსახური მისით სარგებლობის შემდეგ.

• დაამატეთ საცხოვრებლიდან გასვლის ბარათები: დაბინავების საბაზისო ინსტრუქციის მომზადების შემდეგ შეგიძლიათ დაგეგმილ შეტყობინებას ან მზა პასუხს დაამატოთ საცხოვრებლიდან გასვლის ბარათი, რომელიც სტუმარს შესაბამის ინსტრუქციაზე გადაიყვანს. აღნიშნული განსაკუთრებით სასარგებლო იქნება სტუმრებისთვის შეხსენებების გასაგზავნად იმ შემთხვევაში, თუ ისინი არ სარგებლობენ Airbnb‑ს აპით გააქტიურებული push‑გაფრთხილებების პირობებში.

Airbnb‑ს მიერ საერთაშორისო მასშტაბით შეგროვებული მონაცემების მიხედვით, აუზიანი საცხოვრებლების ძიებათა რაოდენობამ 60%‑ით იმატა 2023 წლის პირველ სამ თვეში, გასული წლის ანალოგიურ პერიოდთან შედარებით. ყველაზე ხშირად იჯავშნებოდა საცხოვრებლები Airbnb კატეგორიებიდან „პლაჟთან“, „შესანიშნავი აუზით“ და „ხის სახლები“.

განცხადების ჩასწორება იმგვარად, რომ სეზონისთვის აქტუალური საყოფაცხოვრებო პირობები და ნივთები კარგად წარმოჩნდეს, დაეხმარება სტუმრობის მსურველებს თქვენ მიერ მათთვის შეთავაზებული საცხოვრებლის პოვნასა და დაჯავშნაში.

„დეკორატორი და მყავს, რომელიც სეზონურად ცვლის საცხოვრებლის იერსახეს ადგილობრივი საჩუქრების მაღაზიიდან ნათხოვარი ნივთებით“, — გვიყვება ფრედი, სუპერმასპინძელი პლასენსიიდან (ბელიზი), და დასძენს: „ყოველწლიურად საცხოვრებელს რაღაც ახალსაც ვმატებთ — რამე განსაკუთრებულს, რაც წინა სტუმრებს დაბრუნებას მოანდომებს. ასე მაგალითად, ბელვედერი მოვაწყვეთ, ობსერვატორიაც და ბარის ზონა წყალში“.

სხვა რჩევები სეზონური საყოფაცხოვრებო პირობების წარმოსაჩენად:

• დაამატეთ ფოტოები სეზონური ელფერით: წელიწადის თბილ თვეებში აჩვენეთ სტუმრობის მსურველებს შესანიშნავი აუზი, გარე გამოყენების გრილი, ჰამაკი ან პლაჟისკენ მიმავალი ბილიკი. ცივ პერიოდებში დაამატეთ ბუხრის, ჰიდრომასაჟის აუზის ან სათხილამურო ტრასის ლიფტებისკენ მიმავალი გზის ამსახველი კადრები.

• გაახალისეთ საცხოვრებლის აღწერილობა: თუ ფრედის და მისი დის მსგავსად თქვენც შემატეთ საცხოვრებელს რაიმე ახალი, აღნიშნეთ ამის შესახებ საცხოვრებლის აღწერილობაში და შესაბამისი ფოტოებიც დაურთეთ განცხადებას.

• ჩაასწორეთ სხვადასხვა დეტალი განცხადებაში: შეამოწმეთ თქვენი ანგარიშის პარამეტრები — დარწმუნდით, რომ მონიშნული გაქვთ ყველა ის საყოფაცხოვრებო პირობა, რომელიც ამჟამად საცხოვრებელშია. თუ დეტალების დაკონკრეტებას გთხოვთ, დამატებითი ინფორმაციაც მიუთითეთ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.