გრძელვადიანი სტუმრობისას კომფორტის შექმნის ხერხები

სტუმრებს, რომლებიც მინიმუმ 28 ღამით აპირებენ საცხოვრებლის დაჯავშნას, მხოლოდ შაბათ‑კვირით სტუმრობის მსურველებისგან განსხვავებული საჭიროებები აქვთ. ამ საჭიროებების დაკმაყოფილებით სტუმრებს უკეთეს ატმოსფეროს შეუქმნით და მეტ 5‑ვარსკვლავიან მიმოხილვაც დაიმსახურებთ.

გთავაზობთ რჩევებს, გრძელი ვადით სტუმრობის მსურველებს სათანადო ყურადღება და სტუმართმოყვარეობა რომ აგრძნობინოთ.

ყველაფერი ჩემოდანში ვერ ჩაეტევა, ერთი თვე კი დიდი დროა ჩვეული ნივთების გარეშე საცხოვრებლად. ჰკითხეთ სტუმრებს, პირველადი საჭიროების ნივთები ხომ არ აკლიათ.

იქნებ, მათ დამატებითი ბალიში ან საბანი სურთ, ანდაც ქოლგა, ტოსტერი თუ ბლენდერი სჭირდებათ?! სტუმრებისთვის ხელსაყრელი პირობების შექმნა დიდ ძალისხმევას არ მოითხოვს, თანაც ამავე ნივთებს მომავალში მასპინძლობისას გამოიყენებთ.

ანდრეა, სუპერმასპინძელი ლევენვორთიდან (ვაშინგტონი), თვლის, რომ სტუმრებისთვის, რომლებიც გრძელი ვადით ბინავდებიან, პროდუქტების სათანადო მარაგი უნდა იყოს სამზარეულოში. „სტუმრებს ყოველთვის ვახვედრებ ყავის ან ფოთლოვანი ჩაის კარგ არჩევანს, ასევე, ყავის მომზადების რამდენიმე საშუალებას ვთავაზობ და არც ზეთი და სუნელები მავიწყდება“, — აზუსტებს ის.

ბევრი სტუმარი სიხარულით თანხმდება სტუმრობის შუა პერიოდში საცხოვრებლის უფასოდ დასუფთავების შემოთავაზებას. ეს მათთვისაც ხელსაყრელია და თქვენც საშუალებას გაძლევთ, მიხედოთ საცხოვრებელს — მაგალითად, გამოცვალოთ ნათურები, ბატარეები ან ფილტრები.

ანეტი, სუპერმასპინძელი სან‑ფრანცისკოდან, პირდაპირ ეუბნება ხოლმე სტუმრებს: „ვინაიდან მინიმუმ ერთი თვით რჩებით, შესაძლოა, გარკვეულ საკითხებში ჩვენი დახმარება დაგჭირდეთ. გთხოვთ, ნუ შეეცდებით რაიმეს დამოუკიდებლად შეკეთებას, თუნდაც პრობლემა უმნიშვნელო იყოს. დაგვიკავშირდით და ყველაფერზე ჩვენ ვიზრუნებთ“.

სტუმრობის შუა პერიოდში საცხოვრებლის დასუფთავების დაგეგმვისას ჯობს, სტუმრებს აცნობოთ, ვინ მივა მათთან, რა დროს და რამდენი ხნით. სტუმრებისთვის კონკრეტული ინფორმაციის მიწოდებით მათ აგრძნობინებთ, რომ პატივს სცემთ მათ პირად სივრცეს და ზრუნავთ მათ უსაფრთხოებაზე.

სურვილისამებრ, შეგიძლიათ სტუმრებს დასუფთავების უფრო ხშირი მომსახურებაც შესთავაზოთ გარკვეული გადასახადის სანაცვლოდ. ამით დასუფთავების გუნდსაც შეუწყობთ ხელს და საცხოვრებელში სისუფთავესაც შეინარჩუნებთ.

სტუმრებზე უკეთ თქვენს რეგიონს თავად იცნობთ, ამიტომ გაუგზავნეთ მათ შეტყობინების სახით ადგილობრივების რჩევები ან გზამკვლევი, რომ დაეხმაროთ დროის მაქსიმალურად საინტერესოდ გატარებაში.

მცირე დეტალებს სტუმრებისთვის განწყობის ამაღლება შეუძლია. მაგალითად, დაახვედრეთ კართან ღია ბარათი (მადლიერების გამომხატველი რამდენიმე სიტყვაც კმარა, თუნდაც: „გმადლობთ, რომ გვესტუმრეთ“) ან გულდასმით შერჩეული საჩუქარი:

• ადგილობრივი ღვინის ბოთლი
• ახალგამომცხვარი პური
• სამახსოვრო ნივთი

„რაც უფრო პატარა და მსუბუქი იქნება საჩუქარი, მით უკეთესი“, — ამბობს დონა, სუპერმასპინძელი სან‑ფრანცისკოდან, და დასძენს: „თუნდაც რამე საჭმელი, რომ გემოს გასინჯვა ადგილზევე იყოს შესაძლებელი“. ადგილობრივად დამზადებული ნივთები სტუმრებს შეუმჩნეველი არ დარჩებათ და საცხოვრებლიდან გასვლის შემდეგ ტკბილად მოაგონდებათ.