დაამატეთ დეტალები, რომელიც სტუმრებს მოეწონებათ

კალიფორნიის ჰოლივუდ‑ბიჩში მდებარე The Beach Lodge‑ის სტუმრები თავიანთი მასპინძლის, ტიფანი კალივა‑ტალიედოს, შესახებ წარმოდგენას საცხოვრებელში შესვლისთანავე იქმნიან. მისი ინდივიდუალიზმი და დიზაინისადმი სიყვარული იგრძნობა დეკორის თითოეულ ელემენტში — ფერებში, ტექსტურებში და სხვა შტრიხებში. როგორც ყოფილი შემოქმედებითი დირექტორი, ის კარგად ერკვევა დეტალებში. ამ სტატიაში კი ტიფანი Airbnb‑ზე თავისი წარმატების საიდუმლოს გაგვიზიარებს.

„რემონტამდე The Beach Lodge საშინლად გამოიყურებოდა. ფაქტობრივად, ინგრეოდა. აქაურები მას „ნარკომანთა თავშესაფრად“ მოიხსენიებდნენ და ცდილობდნენ, სწრაფად აევლოთ მისთვის გვერდი. მეზობლებს გიჟები ვეგონეთ, როცა მისი ყიდვა გავწყვიტეთ, თუმცა რაღაცამ მიიქცია ჩემი ყურადღება და ჩავთვალე, რომ გარემონტებული სახით საკმაოდ მიმზიდველი იქნებოდა. მასში დიდი სიყვარული ჩავდე და ვიცი, რომ სტუმრები სწორედ ამის გამო ბრუნდებიან“.

შექმენით განსაკუთრებული ატმოსფერო
„თუ გსურთ, სტუმრებს წარუშლელი შთაბეჭდილებები აჩუქოთ, დაიწყეთ სათანადო გარემოს შექმნით. ჩემს კლიენტებს ვურჩევ ხოლმე, რომ თემატიკაზე მეტად ყურადღება მიაქციონ სივრცისგან მიღებულ შეგრძნებებს. რას უნდა გრძნობდნენ სტუმრები, როცა საცხოვრებელში შედიან? კომფორტს, სიხარულს, სიმშვიდეს? „The Beach Lodge“‑ში საზღვაო თემა გადავათამაშე, თუმცა არა პირდაპირ. კომპლექსურად მოვიფიქრე ფერები, ტექსტურები და დეტალები: შტრიხები, რომლებიც ნეიტრალური ფერების ფონზე იკვეთება, ქვიშის ტექსტურა და ბევრი მცენარე ბუნებასთან სიახლოვის შეგრძნებისთვის“.

სცადეთ ბიუჯეტური დიზაინი
„დეკორი არ უნდა იყოს აუცილებლად ძვირი. ძველმანების ბაზრობები და მეორადი ნივთების მაღაზიები სავსეა იაფი, მაგრამ უნიკალური ნაკეთობებით, რომლებსაც საკუთარი ისტორია აქვს. უბრალოდ, მცირე ძალისხმევაა საჭირო მათ საპოვნელად. განსაკუთრებით მომწონს ყველაფერი, რაც ჩემს ფილიპინურ და აზიურ წარმომავლობას უკავშირდება. შეარჩიეთ სახასიათო ნივთები. ერთად ისინი სახლის განუმეორებელ ატმოსფეროს უნდა ქმნიდეს და მის ამბავს გადმოსცემდეს“.

მიმართეთ ექსპერიმენტებს
„კიდევ ერთი რამ, რასაც ჩემს კლიენტებს ვურჩევ, არის ის, რომ ისინი არ უნდა შეუშინდნენ ექსპერიმენტებს. ცვალეთ დეკორი. სცადეთ სიახლეები. გადაახალისეთ გარემო ყოველ სეზონზე. ასე უფრო მარტივად გაარკვევთ, რომელი ხრიკები მუშაობს და რომელი — არა. მოეპყარით საცხოვრებელს ისე, როგორც ადამიანს, რომელსაც თავისი ინდივიდუალობა და ხასიათი აქვს. ის თქვენსავით უნდა იცვლებოდეს და ვითარდებოდეს ამა თუ იმ მოცემულობის შესაბამისად“.

მოაწყვეთ მყუდრო კუთხეები
„მომწონს სივრცესთან თამაში და მოულოდნელი ვიზუალური სახეების შექმნა. გირჩევთ, საცხოვრებელში მოაწყოთ მყუდრო კუთხეები — მცირე დასასვენებელი ზონები, სადაც სტუმრები შეძლებენ წიგნთან განმარტოებას. მაგალითად, პლედები, ბალიშები და ნახატი ერთ რომელიმე კუთხეში მშვიდ ატმოსფეროს შექმნის. დაფიქრდით, თქვენთან როგორ მოხერხდება ასეთი კუთხეების მოწყობა“.

გამოიჩინეთ ინდივიდუალური მიდგომა
„შეძლებისდაგვარად, შემატეთ სტუმრობას განსაკუთრებული, ინდივიდუალური შტრიხები. მაგალითად, როცა ვიცი, რომ სტუმარს დაბადების დღე აქვს, ჩემი საყვარელი ადგილობრივი საცხობიდან ქაფქეიქებს ვახვედრებ. თუ მაგალითად, სტუმრები ვეგანები არიან, ადგილობრივი რესტორნების სიას ვუდგენ. როცა სტუმრებს მცირეწლოვანი ბავშვები ჰყავთ, საწოლებზე უფრო გამძლე თეთრეულს ვაგებ. მსგავსი შტრიხები არ დარჩება შეუმჩნეველი. სტუმრები აუცილებლად აღნიშნავენ მათ მიმოხილვებში და კვლავ გეწვევიან“.

დაუტოვეთ სტუმრებს რაიმე სახსოვრად
„გირჩევთ, სტუმრებს დაახვედროთ მცირე საჩუქარი ან სუვენირი, რომელიც მათ თქვენს ყურადღებას და სტუმართმოყვარეობას აგრძნობინებს. ეს შეიძლება იყოს ახლომდებარე დაწესებულების სასაჩუქრე ბარათი ან ადგილობრივი მხატვრის მიერ გაფორმებული ღია ბარათი“.

„ამას გარდა, სტუმრებს შეუძლიათ პირდაპირ The Beach Lodge‑იდან იყიდონ საინტერესო ნივთები, როგორიცაა, მაგალითად, ეკოლოგიაზე ზრუნვით დამზადებული ხალათები და თეთრეული, ასევე, ვინტაჟური საგნები. ამ ყველაფრისთვის ონლაინმაღაზიაც კი შევქმენი. ამასთან, პოპულარიზაციას ვუწევ ბრენდებს, რომელთა მფლობელებიც ქალები არიან, ასევე, სხვა ადგილობრივ მარკებს, რომლებსაც ჩემთვის მნიშვნელოვანი მისია აკისრია. ყოველივე ამას ვაკეთებ არა მოგებისთვის, არამედ იმისთვის, რომ ადამიანებმა ეს ბრენდები გაიცნონ. აქაურობა ჩემთვის გაცილებით მეტია, ვიდრე, უბრალოდ, დასასვენებელი სახლი“.

არ დაგავიწყდეთ შემოქმედებითი მიდგომა
„ამ სახლს The Beach Lodge იმიტომ ვუწოდეთ, რომ ის თბილი და მყუდროა. აქ არის სამაგიდო თამაშები, პლაჟის პირსახოცები, ველოსიპედები, წიგნები და ფირსაკრავი. შესაძლებელია იოგით, ხელნაკეთი ნივთების დამზადებით ან ხატვით დაკავება, ასევე, ბარბექიუს მოწყობა. მოგზაურობა ახალ ჰორიზონტებს ხსნის, მსგავსი აქტივობები კი ადამიანებს განსაკუთრებულად ამახსოვრდებათ. მოიფიქრეთ, კიდევ რით შეძლებთ სტუმრების ზოგადი შთაბეჭდილების გაუმჯობესებას“.

გახსოვდეთ, რომ ყველაფერს დეტალები წყვეტს. სტუმრები დააფასებენ კარგად მოფიქრებულ შტრიხებს და იმ სითბოს, რომელიც საცხოვრებელში ჩადეთ. ისინი აუცილებლად დაბრუნდებიან.

ვრცლად მასპინძლობის დაწყების შესახებ