სტუმრებისთვის სწორი მოლოდინის შექმნა

მასპინძლებისთვის მოქმედი ძირითადი წესების თანახმად, განცხადების გვერდზე საცხოვრებელი ზუსტად უნდა იყოს აღწერილი. ამასთან, მითითებული უნდა იყოს ყველა ის საყოფაცხოვრებო პირობა თუ ნივთი, რომელიც სტუმრებისთვის ხელმისაწვდომი იქნება დაბინავების მომენტიდან სტუმრობის დასრულებამდე. ყოველივე ამით თავიდან აიცილებთ სტუმრების იმედების გაცრუებას.

ნუ გააზვიადებთ ინფორმაციას საცხოვრებლის შესახებ, თუმცა ნურც მნიშვნელოვანი დეტალების აღნიშვნა დაგავიწყდებათ. უმჯობესია, გულახდილად აღწეროთ შესაძლო უსიამოვნო მომენტები საცხოვრებელთან ან უბანთან დაკავშირებით — მაგალითად, მიუთითეთ, თუ ფარდები დილით მზის სინათლეს უხვად ატარებს, ან თუ საცხოვრებელთან ახლოს მშენებლობა მიმდინარეობს.

სტუმრობის მსურველებს სწორი მოლოდინი რომ შეუქმნათ, დაიხმარეთ შემდეგი რჩევები:

• ზუსტად აუხსენით მათ, რას უნდა ელოდნენ. ამისთვის გამოიყენეთ საცხოვრებლის აღწერილობის სექცია, ასევე, დაურთეთ ფოტოები წარწერებთან ერთად. თუ საცხოვრებლის ტერიტორიაზე ძაღლია, ან კიბე ჭრაჭუნებს, წინასწარ აცნობეთ ამის შესახებ სტუმრებს.
• მიუთითეთ ოთახებისა და სააბაზანოების სწორი რაოდენობა. ამასთან, საცხოვრებლის ტიპი უნდა შეესაბამებოდეს რეალობას — მაგალითად, თუ სტუმრებს ბინას სთავაზობთ მრავალბინიან კომპლექსში, არ აღწეროთ ის ისე, თითქოს სოფლად მდებარე კერძო სახლია.
• დაიცავით სიზუსტე საყოფაცხოვრებო პირობების კუთხით. თუ პოპულარული ღირსშესანიშნაობა საცხოვრებლიდან ერთი საათის სავალ მანძილზეა, არ თქვათ, რომ ის იქვეა — სანაცვლოდ, მიუთითეთ რეალური მანძილი. თუ საცურაო/ჰიდრომასაჟიანი აუზი სხვადასხვა სეზონზე განსხვავებულ საათებში მუშაობს, ან საერთოდ მიუწვდომელია, აღნიშნეთ ეს განცხადებაში.

წარმატებული მასპინძლები სტუმრებს ზედმეტს არაფერს ჰპირდებიან, რომ შემდეგ მათ მოლოდინს გადააჭარბონ. მაგალითად, ისინი მეტისმეტი შელამაზების გარეშე უთითებენ საცხოვრებელთან დაკავშირებულ ინფორმაციას, შემდეგ კი მაქსიმალურად ზრუნავენ სტუმრების კომფორტზე.

გთავაზობთ რამდენიმე რჩევას, რომ სტუმრები დაბინავებისთანავე მოიხიბლონ საცხოვრებლით:

• ატვირთეთ რეალისტური ფოტოები. არ გადაიღოთ ფოტოები მეტისმეტად ფართო ხედით და არც ზედმეტად დაამუშაოთ ისინი, რადგან საცხოვრებელი, შესაძლოა, რეალურზე განათებული ან დიდი გამოჩნდეს. ზოგან Airbnb‑ს მეშვეობით ფოტოგრაფის დაქირავება შეგიძლიათ.
• იზრუნეთ საცხოვრებლის რეგულარულ ტექნიკურ მომსახურებაზე. ხშირად შეამოწმეთ ხოლმე, გამართულად ფუნქციონირებს თუ არა ყველაფერი, რაც განცხადებაში გაქვთ მითითებული. მაგალითად, თუ სტუმრებს სთავაზობთ საცურაო/ჰიდრომასაჟიან აუზს, ჭურჭლის სარეცხ მანქანას ან სხვა მსგავს ტექნიკას, სტუმრების დაბინავებამდე ის უნდა იყოს იდეალურად სუფთა და მუშა მდგომარეობაში.
• დაახვედრეთ სტუმრებს პატარა საჩუქარი ყურადღების ნიშნად. მაგალითად, შეგიძლიათ, ხელით დაწერილი მოკლე მისასალმებელი ბარათი ან რაიმე სასუსნავი დაუტოვოთ.