ეფექტიანი კომუნიკაცია სტუმრებთან

სტუმრებს დაბინავებამდე აუცილებლად უნდა ჰქონდეთ მნიშვნელოვანი ინფორმაცია — მაგალითად, საცხოვრებლამდე მისასვლელი გზის ან შიგნით მოხვედრის წესის შესახებ. მასპინძლებისთვის მოქმედი ძირითადი წესების თანახმად, თქვენ ყოველთვის უნდა იყოთ მზად, მაქსიმალურად სწრაფად უპასუხოთ სტუმრებს და დაეხმაროთ წარმოქმნილი პრობლემების მოგვარებაში.

სტუმრების დაბინავების შემდეგ იყავით კავშირზე იმ შემთხვევისთვის, თუ მათ რაიმე შეკითხვა გაუჩნდებათ. გთავაზობთ რამდენიმე რჩევას ამ კუთხით:

• ჩამოტვირთეთ Airbnb‑ს აპი თქვენს ტელეფონზე და გაააქტიურეთ გაფრთხილებების მიღება SMS‑ით, ელფოსტით ან პირდაპირ აპიდან.
• ისარგებლეთ მზა პასუხებით. სულ რამდენიმე წამში შეგიძლიათ შეადგინოთ და შეინახოთ მომავალში გასაგზავნი შეტყობინებები, რომ სწრაფად უპასუხოთ სტუმრების მიერ ხშირად დასმულ შეკითხვებს.
• მოსინჯეთ დაგეგმილი შეტყობინებები. ეს ხელსაწყო ავტომატურად უგზავნის სტუმრებს შეტყობინებებს მნიშვნელოვან მომენტებში — მაგალითად, ჯავშნის გაფორმების შემდეგ ან დაბინავებამდე.
• დანიშნეთ თანამასპინძელი, რომ სტუმრები უპასუხოდ არ დაგრჩნენ, როცა ტელეფონის ან ელფოსტის შემოწმების საშუალება არ გექნებათ.

როცა სტუმარი თქვენ მიერ განთავსებულ საცხოვრებელს დაჯავშნის, გაუგზავნეთ მას თბილი და მეგობრული შეტყობინება. მიმოწერაში გამოიჩინეთ ყურადღება და თანაგრძნობა, ნურაფერს დაასკვნით წინასწარ.

არ დაგავიწყდეთ, დაუკავშირდეთ სტუმრებს შემდეგ ძირითად ეტაპებზე:

• დაბინავებამდე: მკაფიოდ აუხსენით სტუმრებს საცხოვრებლამდე მისასვლელი გზა და მიაწოდეთ მათ დაბინავების ინსტრუქცია საცხოვრებელში შესვლის დაგეგმილ დრომდე მინიმუმ 24 საათით ადრე.
• დაბინავებისას: იყავით კავშირზე, რომ უპასუხოთ სტუმრების შეკითხვებს და დარწმუნდეთ, რომ ისინი უპრობლემოდ დაბინავდნენ.
• სტუმრობის პირველი ღამის შემდეგ: შეინარჩუნეთ კომუნიკაცია — მოკლედ ჰკითხეთ სტუმრებს, როგორ მოეწონათ სტუმრად გატარებული პირველი ღამე და რაიმე ხომ არ სჭირდებათ.
• საცხოვრებლიდან გასვლამდე: შეახსენეთ სტუმრებს საცხოვრებლიდან გასვლის დრო და შესასრულებელი ამოცანები — მაგალითად, სინათლის გამორთვა ან გათბობის დაწევა.
• საცხოვრებლიდან გასვლის შემდეგ: მოკლე შეტყობინებით გადაუხადეთ სტუმრებს მადლობა, რითაც ერთგვარად შეახსენებთ მათ, მიმოხილვა დაგიტოვონ.