გამოცდილი სუპერმასპინძლის საიდუმლოებები

ნიკი ერთ‑ერთი პირველი იყო, ვინც Airbnb‑ზე სუპერმასპინძლის სტატუსი მოიპოვა, როცა 2014 წელს ეს პროგრამა ამოქმედდა. ამ სტატუსს ნიკი უკვე 16 კვარტალზე მეტი ხნის განმავლობაში ინარჩუნებს.

როგორ ახერხებს ამას ნიკი? სტუმარ‑მასპინძლობის საქმის დაუფლება ნულიდან დაიწყო, როდესაც სან‑ფრანცისკოში, თავის უკანა ეზოში მდებარე პატარა კოტეჯის შესახებ განცხადება გამოაქვეყნა. ამ გადაწყვეტილებამ იმდენად გაამართლა, რომ მოგვიანებით თავის სამსაძინებლიანი სახლიც კი შესთავაზა სტუმრებს მთლიანად, სანამ ოჯახთან ერთად დასასვენებლად იყო.

ამ სტატიაში ნიკი გვიზიარებს, როგორ მიაღწია წარმატებას სუპერმასპინძლობის კუთხით.

„6 წლის წინ, როცა საფრანგეთის პროვანსის რეგიონს ვსტუმრობდი, პირველად გავჩერდი Airbnb საცხოვრებელში. ძალიან მომეწონა. პატარა სტუდიო იყო, ექს‑ან‑პროვანსის ძველ ქალაქში. ჩვენს საჭიროებებს სრულად შეესაბამებოდა, თუმცა ეტყობოდა, რომ მასპინძლებს დიდად არ უზრუნიათ მის მომხიბლაობაზე. სწორედ მაშინ მივხვდი, რომ თუ ჩემს უკანა ეზოში მდებარე 19 მ²‑იან სახლში მცირე ინვესტიციას ჩავდებდი, გასაოცარი საოჯახო სასტუმრო გამოვიდოდა. ვიფიქრე, დროდადრო ვინმეს დასჭირდება‑მეთქი და ძალიან გამიკვირდა, როცა თავიდანვე ერთი კვირით დაიჯავშნა“.

„ყოველი ახალი განცხადების გამოქვეყნებისას საშუალო საბაზროზე 50‑70%‑ით დაბალ ფასს ვუთითებ, შემდეგ კი საბაზრო ტარიფამდე ვზრდი, როცა მინიმუმ 3 მიმოხილვას ან დაჯავშნის მოთხოვნების საკმარის რაოდენობას მივიღებ. ეს მეხმარება ნაკლოვანებების აღმოფხვრასა და პირველი დადებითი მიმოხილვების შეძლებისდაგვარად სწრაფად მიღებაში, რომ განცხადება ძიების შედეგებში უკეთეს პოზიციებზე მოხვდეს“.

„ყველაფერი საცხოვრებელი სივრცით იწყება. ის უნდა იყოს სუფთა. მომწონს ღია და დიდი ოთახები. მინიმალიზმის მომხრე ვარ, თუმცა უნდა იყოს ისეთი დეტალები, თვალს წყალი რომ დაალევინო. კომფორტიც აუცილებელია, რაც განსაკუთრებით საწოლებს ეხება. მეხსიერების ეფექტის მქონე მატრასებს ვყიდულობ და სტუმრებს ძალიან მოსწონთ. ყოველთვის ბევრს ვფიქრობ იმაზე, თუ ვინ მესტუმრება — დავდივარ ოთახებში და წარმოვიდგენ, თავს როგორ იგრძნობენ სტუმრები, შემდეგ კი დიზაინზე ვფიქრობ“.

„კარგი ფოტოები ბევრს ნიშნავს, ამიტომ აუცილებლად იზრუნეთ პროფესიონალურ ფოტოგადაღებაზე. ამას გარდა, პირველ რიგში, განვსაზღვრავ, ვისთვის იქნება საცხოვრებელი იდეალური — ოჯახებისთვის თუ კონკრეტული ტიპის სტუმრებისთვის — და მხოლოდ ამის შემდეგ ვადგენ სათაურს განცხადებისთვის. სტუმრების ყურადღების მისაქცევად არანაკლებ მნიშვნელოვანია საცხოვრებლის ზედმიწევნით დეტალურად აღწერა მეგობრული ტონის გამოყენებით: აღწერეთ საწოლები/თეთრეული, დაასახელეთ იმ საპნის ან საყოფაცხოვრებო ნივთების ბრენდები, რომლებსაც სტუმრებს დაახვედრებთ“.

„თუ საცხოვრებელში რაიმე უჩვეულოა, აუცილებლად აღნიშნეთ აღწერილობაში. შეეცადეთ, გულწრფელად და მკაფიოდ გადმოსცეთ, თუმცა მაინცდამაინც ნუ დააშინებთ სტუმრებს. აღწერილობა საკმარისად გამჭვირვალე უნდა იყოს, რომ სტუმრებმა სწორი არჩევანი გააკეთონ“.

„ვთვლი, რომ კომუნიკაცია სტუმარ‑მასპინძლობის მთავარი წესია. ის თქვენდამი პირველი მომართვიდან იწყება. დაჯავშნის მოთხოვნის მიღების შემდეგ პოტენციურ სტუმრებს ყოველთვის გარკვეულ შეკითხვებს ვუსვამ. ვცდილობ, თავაზიანი ვიყო და ზედმეტად ცნობისმოყვარე არ გამოვჩნდე. უბრალოდ, უნდა დავრწმუნდე, რომ საცხოვრებელი მათთვის შესაფერისი იქნება. 5‑ვარსკვლავიანი მიმოხილვის მიღებაზე მუშაობა სწორედ ამ მომენტში იწყება“.

„ყველაზე მეტად ის მაოცებს, როგორი შესანიშნავი შეიძლება იყვნენ სტუმრები. მათი უმრავლესობა გულწრფელი, კეთილი და გულისხმიერია. შემოსავლის ოდენობამაც სასიამოვნოდ გამაოცა. ასეთ გამართლებას არ ველოდი და არც ის მიფიქრია, რომ მასპინძლობა ჩემს მთავარ საქმიანობად გადაიქცეოდა. სტუმარ‑მასპინძლობის იმ ასპექტებზე ვკონცენტრირდებოდი, რომლებიც ჩემთვის მნიშვნელოვანი იყო და არცერთ შესაძლებლობას არ ვუშვებდი ხელიდან. სწორედ ამის დამსახურებით მივიღე ეს შედეგი“.