უსაფრთხოებასთან დაკავშირებული მნიშვნელოვანი მითითებები მასპინძლებისთვის

უსაფრთხოების საკითხებში გარკვევა საშუალებას მოგცემთ, ყველაფერი წინასწარ დაგეგმოთ და მაქსიმალურად კომფორტულად უმასპინძლოთ სტუმრებს. რამდენიმე რჩევით დაგეხმარებით, მარტივად გაითვალისწინოთ ზოგადი მითითებები უსაფრთხოებასთან დაკავშირებით. აუცილებლად გაეცანით მათ და დაიცავით თქვენს რეგიონში მოქმედი კანონები, წესები თუ რეგულაციები.

აუზი სტუმრობის ბევრი მსურველის ყურადღებას იქცევს, მაგრამ მას უსაფრთხოების რისკიც ახლავს თან. აუზიანი საცხოვრებლის შეთავაზების კუთხით მოქმედი მოთხოვნები რეგიონის მიხედვით განსხვავდება, თუმცა „Safe Kids Worldwide“ გირჩევთ, გაითვალისწინოთ ქვემოთ მოცემული რჩევები თქვენი და სტუმრების უსაფრთხოებისთვის.

უსაფრთხოების უზრუნველსაყოფად:

• მოაწყვეთ აუზის ღობე. ის უნდა იყოს მინიმუმ 1,2 მეტრი სიმაღლის და ჰქონდეს ავტომატური დახურვა-ჩაკეტვის ფუნქციის მქონე კარი. ღობე გარს უნდა უვლიდეს აუზის ყველა მხარეს და მის ფუნქციას არ უნდა ითავსებდეს რაიმე სხვა კონსტრუქცია, მაგალითად, სახლის კედელი.
• დაამონტაჟეთ სიგნალიზაცია ყველა ფანჯარასა და კარზე, რომელიც აუზისკენ გადის.
• დაამონტაჟეთ წყალსადინრების დამცავი საფარები და უსაფრთხოების სისტემები. ეს შეამცირებს გაჭედვის რისკს.
• მოიმარაგეთ სამაშველო აღჭურვილობა. მათ შორის კავები, ძელები, ტივტივები და პირველადი სამედიცინო დახმარების ნაკრები. გირჩევთ, აუზის ტერიტორიაზე განათავსოთ სტაციონარული ტელეფონი.

თავად შეასრულეთ რეგულარული შემოწმება:

• შეაფასეთ წყლის სისუფთავე და ქიმიური ბალანსი. შეასრულეთ ეს წინასწარ განსაზღვრული განრიგით, სტუმრების დაბინავებამდე.
• შეამოწმეთ უსაფრთხოების აღჭურვილობის არსებობა. ეს აუცილებელია ყოველი ახალი სტუმრის დაბინავების წინ.
• იზრუნეთ უსაფრთხო წვდომაზე აუზის ტერიტორიაზე. ყურადღება მიაქციეთ ძაღლების ჭიშკრებსა და სხვა ადგილებს, სადაც პატარა ბავშვებს შეძრომა ან აცოცვა შეუძლიათ.

მიაწოდეთ სტუმრებს ინფორმაცია:

• განაახლეთ თქვენი განცხადება. მკაფიოდ მიუთითეთ საცხოვრებლის აღწერილობაში, რომელი საშუალებებითაა დაცული აუზი და რომლით — არა. მაგალითად, „თქვენ დაგხვდებათ სამაშველო ჟილეტები ბავშვებისა და ზრდასრულებისთვის. აუზს ოთხივე მხარეს ღობე არ აქვს, ამიტომ საჭიროა დამატებითი ზედამხედველობა“.
• სთხოვეთ სტუმრებს, გაეცნონ სტუმრის ცნობარს. ის უნდა შეიცავდეს ინფორმაციას იმ საშუალებების შესახებ, რომლებსაც უსაფრთხოებისთვის უზრუნველყოფთ — მაგალითად, წყალსადინარი სისტემის საფარის, სიგნალიზაციის, აუზის ღობის / ჭიშკრის შესახებ და ა.შ. მკაფიოდ მიუთითეთ, რომ დამხმარე საცურაო საშუალებები და წყლის სათამაშოები (მაგალითად, გასაბერი ბალიშები და აკვაჯოხები) არ არის დახრჩობისგან დაცვის გარანტია.
• თვალსაჩინო ადგილას განათავსეთ ინფორმაცია უსაფრთხოების შესახებ. აუზთან უნდა იყოს ბროშურები ან საინფორმაციო მანიშნებლები, რომლებიც შეიცავს ყველა შესაბამის რეკომენდაციას, გაფრთხილებასა და საგანგებო ვითარებაში საკონტაქტო ინფორმაციას. შეახსენეთ სტუმრებს, რომ ბავშვის დაკარგვის შემთხვევაში, პირველ რიგში, აუზი შეამოწმონ. დაურთეთ გულ-ფილტვის რეანიმაციის ინსტრუქცია, Safe Kids‑ის მიერ მომზადებული საკონტროლო სია და საცხოვრებლის მისამართი.
• შეახსენეთ სტუმრებს სიახლოვის მუდმივი კონტროლის შესახებ. აღნიშნული გულისხმობს ყველა იმ ადამიანის გვერდით ყოფნას, რომელიც არასაკმარისად ძლიერია, ან რომელმაც ცურვა არ იცის. შეიტანეთ ეს ინფორმაცია სტუმრის ცნობარში და განათავსეთ ის თვალსაჩინო ადგილას აუზთან.
• უზრუნველყავით დამკვირვებლის ბარათი მისი გამოყენების ინსტრუქციით. დამკვირვებელი გულისხმობს პასუხისმგებელ ზრდასრულს, რომელიც მთელი ყურადღებით აკვირდება წყალში მყოფ ბავშვებს.

ლიფტები უფრო კომფორტულ და ადაპტირებულ გარემოს ქმნის, თუმცა მათ უსაფრთხოების რისკიც ახლავს თან. ლიფტების ექსპლუატაციასთან დაკავშირებით რჩევების მისაღებად მიმართეთ კომპეტენტურ ადგილობრივ ორგანოებს.

აშშ‑ის კომისია სამომხმარებლო პროდუქტების უსაფრთხოების საკითხებში მომხმარებლებს გარკვეული წესების დაცვას ურჩევს. კერძოდ:

• დარწმუნდით, რომ კარებს შორის ნაპრალის სიგანე არ აღემატება 10 სანტიმეტრს. თუ ლიფტთან დაკავშირებით რაიმე გაეჭვებთ, ან მისი უსაფრთხოების საკითხი გაღელვებთ, დაბლოკეთ ის გამოუსადეგარ მდგომარეობაში, ან ჩარაზეთ მისკენ მიმავალი ყველა კარი. ლიფტის დამონტაჟებისას უნდა გამოირიცხოს 10 სანტიმეტრზე დიდი ნაპრალი შესასვლელთან.
• მოიწვიეთ კვალიფიციური სპეციალისტი სახლის ლიფტის დასათვალიერებლად. მან უნდა გამოავლინოს სახიფათო ნაპრალები და სხვა პოტენციური საფრთხეები. ამას გარდა, მასვე შეუძლია შეამოწმოს, რამდენად შეესაბამება აღჭურვილობა ლიფტებისა და ესკალატორებისთვის მოქმედ უსაფრთხოების უახლეს წესებს (ASME A17.1).
• იზრუნეთ უსაფრთხოების საშუალებებზე. ნაპრალები უფრო უსაფრთხოდ რომ აქციოთ, დააყენეთ შემზღუდველები გარე კარის უკანა მხარეს, ან დაამონტაჟეთ ელექტრონული სენსორი, რომელიც გათიშავს ლიფტს, თუ ბავშვი ნაპრალში აღმოჩნდება. უსაფრთხოების საშუალებების თაობაზე მიმართეთ ლიფტების მწარმოებელს ან დამმონტაჟებელს.

Airbnb‑ზე საცხოვრებლის განთავსებით ადასტურებთ, რომ იცავთ მოქმედ კანონებსა და რეგულაციებს.

ყველა მასპინძელს ვურჩევთ, აუცილებლად დაამონტაჟონ კვამლისა და მხუთავი აირის დეტექტორები, რეგულარულად შეამოწმონ ისინი და იზრუნონ საცხოვრებლის აღწერილობის პერიოდულ განახლებაზე.

• გაეცანით ადგილობრივ რეგულაციებს. შესაძლოა, კვამლისა და მხუთავი აირის ერთზე მეტი დეტექტორის დამონტაჟება გჭირდებოდეთ საცხოვრებელში. ზოგიერთ ქალაქში დეტექტორები სავალდებულოა ყველა ოთახში.
• მოითხოვეთ დეტექტორი. მოქმედი განცხადებების მქონე მასპინძლებს, რომლებიც კონკრეტულ კრიტერიუმებს აკმაყოფილებენ, შეუძლიათ, უსასყიდლოდ მიიღონ კვამლისა და მხუთავი აირის კომბინირებული დეტექტორი, რომელიც ბატარეებზე მუშაობს. მოქმედებს გარკვეული წესები და პირობები.
• ჩაასწორეთ განცხადება. საცხოვრებლის მაძიებლებს შედეგების გაფილტვრა შეუძლიათ იმგვარად, რომ მხოლოდ მხუთავი აირის დეტექტორების მქონე ვარიანტები აისახოს. დამონტაჟებული დეტექტორების შესახებ ცნობების განცხადებაში მითითება შეგიძლიათ „უსაფრთხოების მოწყობილობების“ პუნქტიდან, რომელსაც „სტუმრების უსაფრთხოების“ სექციაში იპოვით.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.