ოთახის თაობაზე განცხადების შექმნის წესი

ოთახის თაობაზე განცხადება არის სივრცე, სადაც წარმოაჩენთ, როგორი იქნება თქვენთან სტუმრობა. მასში შეგიძლიათ მიუთითოთ სხვადასხვა დეტალი, მაგალითად, რომელი სივრცეები იქნება კერძო, რომელი — საზიარო, ასევე, რა ინტენსივობით გირჩევნიათ სტუმრებთან ურთიერთობა.

განცხადებისა და დაჯავშნის ქვემოთ მოცემული პარამეტრები საშუალებას გაძლევთ, დაამატოთ ან ჩაასწოროთ ინფორმაცია, რომელიც დაეხმარება სტუმრების მსურველებს, გადაწყვიტონ, კომფორტულად და უსაფრთხოდ იგრძნობენ თუ არა თავს თქვენთან საცხოვრებლის გაზიარებისას.

• საცხოვრებლის აღწერილობა. ამ სექციაში აღწერეთ, რა გამოარჩევს თქვენ მიერ განთავსებულ საცხოვრებელს. აირჩიეთ ყველა საყოფაცხოვრებო პირობა, რომელსაც სტუმრებს სთავაზობთ, ასევე, მიუთითეთ, რომელი სივრცეებია მათთვის ხელმისაწვდომი, იქნებიან თუ არა საცხოვრებელში შინაური ცხოველები და როგორია უბნის თავისებურებები.

• ფოტოები და წარწერები. მკაფიოდ წარმოაჩინეთ ყველა სივრცე, რომელიც ხელმისაწვდომია სტუმრებისთვის, მათ შორის, შესასვლელები და საპარკინგე ადგილები. ხაზი გაუსვით ყველაფერს, რაც დაეხმარება სტუმრობის მსურველებს, გადაწყვიტონ, შეესაბამება თუ არა თქვენ მიერ განთავსებული ოთახი მათ საჭიროებებს.

• ოთახები და სივრცეები. აცნობეთ სტუმრობის მსურველებს, სააბაზანო ცალკეა თუ საზიარო, აქვს თუ არა საძინებლის კარს საკეტი და სხვა ვინ იქნება საცხოვრებელში მათი სტუმრობისას.

• სახლის წესები. გაუგებრობების თავიდან აცილების მიზნით, მკაფიოდ განმარტეთ ყველაფერი, რაც თქვენთვის მნიშვნელოვანია — მაგალითად, საჭიროა თუ არა სიჩუმის დაცვა კონკრეტულ საათებში ან შეუძლიათ თუ არა სტუმრებს შინაური ცხოველების წამოყვანა. სტუმრებმა თქვენ მიერ დადგენილი წესები უნდა დაიცვან. წინააღმდეგ შემთხვევაში, შესაძლოა, მათ Airbnb‑დან ანგარიშები წავუშალოთ.

სტუმრებისთვის შინაურული გარემოს შექმნის სხვა პრაქტიკული გზებიც არსებობს. მაგალითად, დანიელი, მრჩეველ მასპინძელთა საბჭოს წევრი ესპანეთიდან, თავის პროფილში წერს, რომ მისი სახლის კარი ყველასთვის ღიაა.

შექმენით მყუდრო გარემო ზედმეტი ნივთების გარეშე — სტუმრებს თავიანთი პირადი ნივთებისთვის საკმარისი ადგილი უნდა ჰქონდეთ. დაფიქრდით, თავად რა გჭირდებათ ხოლმე, როცა მოგზაურობთ, შემდეგ კი დაახვედრეთ შესაბამისი ნივთები თუ პირობები სტუმრებს.

მასპინძლები, რომლებიც სტუმრებს ოთახებს სთავაზობენ, აღნიშნავენ, რომ მცირე დეტალები სტუმრებს უფრო მშვიდად აგრძნობინებს თავს, რაც, საბოლოო ჯამში, მათ შესანიშნავი მიმოხილვების მიღებაში ეხმარება. ასეთი დეტალებია:

• საკვების შესანახი ადგილი. გამოუყავით სტუმრებს სივრცე თქვენს მაცივარსა და საკუჭნაოში, შემდეგ კი დაურთეთ მას შესაბამისი აღნიშვნა, ან დააყენეთ პატარა მაცივარი / მოაწყვეთ მიკროსაკუჭნაო სტუმრის საძინებელშივე ან მასთან ახლოს.

• სასმელების ურიკა. ოთახში წყლის, ყავის, ჩაის, ფინჯნებისა და ელექტრომადუღარას ქონა მოსახერხებელია, განსაკუთრებით იმ სტუმრებისთვის, რომლებსაც თავისთვის ყოფნა ურჩევნიათ.

• ხმის იზოლაცია. ყურის საცობებს, ჩუსტებს, ასევე, ვენტილატორს ან თეთრი ხმაურის გენერატორს შეუძლია არასასურველი ხმაურის შემცირება.

• საკეტები. სტუმრები მოელიან, რომ თავიანთი საძინებლის კარს საკეტი ექნება. თუ ოთახის კარს საკეტი არ აქვს, იზრუნეთ ამის გამოსწორებაზე.

„როცა საძინებელს საკეტი აქვს, ყველას უფრო მშვიდად სძინავს და მაქსიმალურად სასიამოვნოდ ატარებს დროს“, — ამბობს დანდარა, მრჩეველ მასპინძელთა საბჭოს წევრი, რომელიც სტუმრებს ოთახს ბრაზილიის ქალაქ მასეიოში სთავაზობს.

სთხოვეთ სტუმრებს, დატოვონ მიმოხილვა, მათგან მიღებული გამოხმაურების საფუძველზე კი შეიტანეთ საჭირო ცვლილებები. საჭიროებისამებრ, განცხადებაც ჩაასწორეთ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.