მასპინძლის ხელშეწყობა განცხადების გამორჩეულად ქცევის კუთხით

გაუზიარეთ სხვებს მასპინძლობის კუთხით დაგროვილი თქვენი ცოდნა — დაეხმარეთ მასპინძელს ახალი განცხადების შექმნაში ან არსებულის განახლებაში.

სტუმრობის მსურველები, როგორც წესი, დიდ მნიშვნელობას ანიჭებენ საცხოვრებლის ფოტოებს, აღწერილობასა და სხვა სტუმრებისგან მიღებულ მიმოხილვებს.* ეფექტური განცხადების შესაქმნელად გაამახვილეთ ყურადღება აღნიშნულ ფაქტორებზე, ასევე, საყოფაცხოვრებო პირობებსა და ფასებზე.

მომხმარებელთა შორის ჩატარებულმა კვლევამ აჩვენა, რომ მაღალხარისხიანი ფოტოები იმ უმთავრესი ფაქტორებიდან ერთ‑ერთია, რომლებსაც სტუმრობის მსურველები ითვალისწინებენ საცხოვრებლის დაჯავშნისას. თუ მასპინძელს არ აქვს საცხოვრებლის ბოლოდროინდელი პროფესიონალური ფოტოები, აუხსენით მას ფოტოების მნიშვნელობა და ურჩიეთ ფოტოგრაფი ან Airbnb‑ს პროფესიონალური ფოტოგადაღების პროგრამა.

მასპინძლებს უნდა ესმოდეთ, რომ აღწერილობა ეფექტური განცხადების ერთ‑ერთი ყველაზე მნიშვნელოვანი ასპექტია. ჯიმი, თანამასპინძელი პალმ‑სპრინგზიდან (კალიფორნია, აშშ), ამბობს, რომ განცხადების აღწერილობის ოპტიმიზაცია ყოველთვის შესაძლებელია. ის ყველა მასპინძელს სთავაზობს ამ კუთხით დახმარებას.

„ფაქტებზე ვამახვილებ ყურადღებას“, — აღნიშნავს ის და დასძენს: „აუზი ზღვის წყლით ან გაქვს, ან არა. საცხოვრებელი კომპლექსი ან დახურული ტიპის არის, ან არა. ძალიან ბევრი ზედსართავი სახელი სუბიექტურ გრძნობებს გამოხატავს და აღწერილობა ზუსტი არ გამოდის. სინამდვილეს მხოლოდ ფაქტები აღწერს“.

სტუმრობის მსურველები, ხშირ შემთხვევაში, სასურველი საყოფაცხოვრებო პირობების მიხედვით ფილტრავენ განცხადებების ძიების შედეგებს. მაგალითად, ძალიან ბევრ მათგანს აინტერესებს საცურაო/ჰიდრომასაჟის აუზი, Wi‑Fi კავშირი, უფასო საპარკინგე ადგილი, სამზარეულო, კონდიციონერი, სარეცხი მანქანა და დამოუკიდებელი დაბინავების შესაძლებლობა.**

დაფიქრდით თქვენს გამოცდილებაზე და გაუზიარეთ მასპინძლებს სასარგებლო რჩევები. აღნიშნულში, მაგალითად, იგულისხმება:

• შემოწმება, რომ განცხადებაში მითითებულია სტუმრებისთვის შეთავაზებული ყველა საყოფაცხოვრებო პირობა
• ახსნა, თუ რამდენად სასარგებლოა ისეთი საყოფაცხოვრებო პირობების დამატება ან გაუმჯობესება, როგორიცაა Wi‑Fi კავშირი ან გონიერი საკეტი
• თქვენი გამოცდილებიდან მაგალითების მოყვანა, თუ როგორ რეაგირებდნენ სტუმრები გაუმჯობესებებზე
• უსაფრთხოების საშუალებებისა და ადაპტირებული პირობების შემოწმება მასპინძლებთან ერთად, რომ გაარკვიოთ, კიდევ რისი დამატებაა შესაძლებელი განცხადებაში

მასპინძლებს, შესაძლოა, არ ჰქონდეთ გამოცდილება ფასების დაწესებასთან დაკავშირებით, თქვენ კი მათი დაკვალიანება შეგიძლიათ ადგილობრივი ცოდნითა და Airbnb‑ს ხელსაწყოებით ფასების დაწესებისთვის. მაგალითად, გააცანით მათ შემდეგი ვარიანტები:

• ფასდაკლების დაწესება ერთ კვირაზე ან თვეზე
• შინაური ცხოველებისა და დასუფთავების გადასახადების შემცირება ან გაუქმება
• ერთ ღამეზე დაწესებული ფასის კორექტირება სეზონური მოთხოვნის მიხედვით

ერთად აირჩიეთ ოპტიმალური მიდგომა მასპინძლობისადმი და კონტროლის თქვენი სფეროები. დომინიკი, თანამასპინძელი კორნუოლიდან (ინგლისი), მასპინძლებს ურჩევს, რეგულარულად ჩაასწორონ ფასი ერთ ღამეზე.

„ობიექტებს ყოველკვირეულად ან ყოველ მეორე კვირას ვამოწმებ“, — აღნიშნავს ის და დასძენს: „თუ ობიექტი მალევე იჯავშნება სრულად, ცხადია, ფასის მომატება შესაძლებელია, მაგრამ თუ ბევრია მნახველი და არა მჯავშნელი, სავარაუდოდ, ფასი ზედმეტად მაღალია“.

სტუმრობის მსურველები ხშირად ეცნობიან მიმოხილვებს, მათთვის შესაფერისი საცხოვრებელი რომ იპოვონ. აუხსენით მასპინძლებს, რომ მიმოხილვებზე პასუხის გაცემა სტუმრებზე ზრუნვისა და ჯანსაღი კრიტიკისთვის მზადყოფნის დემონსტრირების შესაძლებლობაა.

გადაწყვიტეთ, ვინ უპასუხებს სტუმრებისგან მიღებულ მიმოხილვებს. თუ ამის გაკეთება მასპინძელს ურჩევნია, შეგიძლიათ გააცნოთ მას ნიმუშები სხვადასხვა ტიპის გამოხმაურებაზე საპასუხოდ.

• სტუმრებისთვის მადლობის გადახდა: „გმადლობთ მიმოხილვისთვის! ვაფასებთ, რომ დრო გამონახეთ და თქვენი სტუმრობის შესახებ მოსაზრება გამოთქვით“.
• ინფორმაციის გაზიარება, თუ რა გაუმჯობესდა: „ვწუხვართ, რომ საწოლები არაკომფორტული იყო. მშვიდი ძილი მნიშვნელოვანია, ამიტომ მატრასს თხელი ლეიბები დავამატეთ“.

„არ მოველი, რომ რომელიმე მასპინძელს 100%‑ით დადებითი მიმოხილვები ექნება“, — ამბობს ენდრიუ, სტუმარი და სუპერმასპინძელი ბერლინიდან, და დასძენს: „უფრო ის მხიბლავს, როცა კრიტიკულ გამოხმაურებას მასპინძელი სერიოზულობით ეკიდება“.

არ დაგავიწყდეთ განცხადების აღწერილობისა და ფოტოების განახლება საცხოვრებელში ნებისმიერი ცვლილების შემდეგ.

* ეფუძნება Airbnb‑ს მიერ 2023 წლის ნოემბერსა და დეკემბერში ჩატარებულ კვლევას, რომელშიც მონაწილეობდა თითქმის 7000 სტუმარი ავსტრალიაში, ბრაზილიაში, კანადაში, საფრანგეთში, გერმანიაში, მექსიკაში, სამხრეთ კორეაში, ესპანეთში, გაერთიანებულ სამეფოსა და აშშ‑ში.

** ეფუძნება Airbnb‑ს მიერ 2024 წლის 1 იანვრიდან 30 ივნისამდე ყველაზე მოთხოვნადი საყოფაცხოვრებო პირობების შესახებ შეგროვებულ შიდა მონაცემებს.

თანამასპინძელთა ქსელი ხელმისაწვდომია საფრანგეთში, ესპანეთში, იტალიაში, გერმანიაში, გაერთიანებულ სამეფოში, ავსტრალიაში, მექსიკაში (უზრუნველყოფს Airbnb Global Services Limited); კანადაში, აშშ‑ში (უზრუნველყოფს Airbnb Living LLC); ასევე, ბრაზილიაში (უზრუნველყოფს Airbnb Plataforma Digital Ltda).

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.