თანამასპინძლობის მართვის პანელის შესახებ

მართვის პანელი თანამასპინძელთა ქსელში წარმატების მიღწევის საწინდარია. სწორედ მისი მეშვეობით დაუკავშირდებით მასპინძლებს და გააკონტროლებთ დასახული მიზნების მისაღწევად განვლილ პროგრესს.

მართვის პანელის „მოთხოვნების“ ჩანართში ქვემოთ მოცემული მაჩვენებლები დაგხვდებათ.

• საშუალო შეფასება: ძიების შედეგებში რომ ხვდებოდეთ, მინიმუმ 4,7‑ვარსკვლავიანი შეფასება უნდა შეინარჩუნოთ. იგულისხმება ვარსკვლავებით დაფიქსირებული საშუალო შეფასება სტუმრებისგან ბოლო 12 თვის განმავლობაში, ყველა იმ განცხადების შემთხვევაში, რომლებშიც ფიგურირებთ (გამონაკლისია განცხადებები, რომელთა შემთხვევაშიც მხოლოდ კალენდარზე წვდომის მქონე თანამასპინძელი ხართ).
• გამოხმაურების სიხშირე: თქვენი თანამასპინძლობის პროფილი, შესაძლოა, ვერ მოხვდეს ძიების შედეგებში, თუ თქვენი გამოხმაურების სიხშირე 90%‑ზე დაბლა დაიწევს. გამოხმაურების სიხშირე ასახავს, მასპინძლებისგან მიღებული პირველი მოთხოვნების რამდენ პროცენტს უპასუხეთ 24 საათის განმავლობაში. ის გამოითვლება ბოლო 90 დღის მონაცემების მიხედვით.
• მნახველთა რაოდენობა: გულისხმობს ბოლო 90 დღის მანძილზე თქვენი თანამასპინძლობის პროფილის უნიკალური მნახველების რაოდენობას.
• მნახველთა კონვერსია: გულისხმობს ძიების შედეგებში თქვენი პროფილის მნახველებიდან იმ მასპინძლების პროცენტულ მაჩვენებელს, რომლებიც დაგიკავშირდნენ (ბოლო 90 დღის მონაცემებით).

მასპინძლებისგან მიღებული მოთხოვნები აისახება როგორც „მოთხოვნების“, ისე „შეტყობინებების“ ჩანართში. ჩართეთ გაფრთხილებები, რომ არასდროს გამოგრჩეთ მოთხოვნები და ყველას სწრაფად უპასუხოთ.

მიღებულ მოთხოვნებში აისახება შემდეგი ინფორმაცია:

• მასპინძლის სახელი
• საცხოვრებლის მისამართი
• მასპინძლის საკონტაქტო ინფორმაცია
• მოთხოვნის თარიღი
• მოთხოვნის სტატუსი

თუ სხვა მასპინძლებს უკვე ეხმარებით, შეგიძლიათ სთხოვოთ მათ, მოგცენ რეკომენდაციები პოტენციურ პარტნიორებთან გასაზიარებლად. რეკომენდაციების გაზიარება შესაძლებელია შეტყობინებაში ან როგორც მასპინძელს ურჩევნია.

ჯიმი, თანამასპინძელი კონ‑ლა‑ვილიდან (საფრანგეთი), აღნიშნავს, რომ რეკომენდაციები მნიშვნელოვნად ზრდის წარმატებული თანამშრომლობის შანსებს. „დამკვეთებისგან მიღებულ დადებით გამოხმაურებას მასპინძლები ყველაზე დიდ ყურადღებას აქცევენ“, — ამბობს ის.

თანამასპინძელთა ქსელი ხელმისაწვდომია საფრანგეთში, ესპანეთში, იტალიაში, გერმანიაში, გაერთიანებულ სამეფოში, ავსტრალიაში, მექსიკაში (უზრუნველყოფს Airbnb Global Services Limited); კანადაში, აშშ‑ში (უზრუნველყოფს Airbnb Living LLC); ასევე, ბრაზილიაში (უზრუნველყოფს Airbnb Plataforma Digital Ltda).

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.