დაუბრკოლებელ დაბინავებაზე ზრუნვა

დაბინავება იწყება მკაფიო კომუნიკაციით და სრულდება სტუმრების კომფორტულად განთავსებაზე ზრუნვით. გთავაზობთ რამდენიმე რჩევას, ყველაფერმა დაუბრკოლებლად რომ ჩაიაროს.

დაბინავების მარტივი და საიმედო პროცედურის შესამუშავებლად გადადით თქვენი განცხადების დაბინავების გზამკვლევზე.

• აირჩიეთ შესვლის დრო. დაფიქრდით, რა დრო დაგჭირდებათ მომდევნო სტუმრისთვის საცხოვრებლის მოსამზადებლად. მრავალი მასპინძელი დაბინავების დროდ დღის მეორე ნახევარს ირჩევს, დალაგება რომ მოასწრონ.

• მკაფიოდ განმარტეთ საცხოვრებლამდე მისასვლელი გზა. დაურთეთ დეტალური ინფორმაცია, თუ საცხოვრებლის პოვნა შედარებით რთულია ან სატელეფონო კავშირი არასაიმედოა.

• აირჩიეთ დაბინავების მეთოდი. მრავალ სტუმარს ურჩევნია დამოუკიდებლად დაბინავება, რადგან ამ შემთხვევაში თქვენთან შეხვედრის დროის შეთანხმება აუცილებელი არ იქნება.

• მოამზადეთ დაბინავების ინსტრუქცია. როცა დაბინავების მეთოდს აირჩევთ და მიუთითებთ დეტალურ ინფორმაციას (მაგალითად, იმის შესახებ, თუ სად მდებარეობს მინისეიფი), იმავე სექციაში შეძლებთ, სტუმრებისთვის ნაბიჯ‑ნაბიჯ განმარტოთ ფოტოებით, თუ როგორ მოხვდნენ ისინი საცხოვრებელში.

• შეადგინეთ სტუმრის ცნობარი და გზამკვლევი. დაურთეთ მათ სტუმრებისთვის სასარგებლო ინფორმაცია, მაგალითად, როგორ უნდა დაუკავშირდნენ ისინი Wi‑Fi ქსელს ან სად ჯობს სასადილოდ წასვლა.

დაბინავებასთან დაკავშირებით თქვენ მიერ მომზადებული მითითებები სტუმრებისთვის ხელმისაწვდომი გახდება სტუმრობის დეტალების სექციაში, დაბინავების დრომდე 48 საათით ადრე (ან 24 საათით ადრე, თუ გაუქმების მოქნილი წესები გაქვთ არჩეული).

დაბინავებამდე ერთი ან ორი დღით ადრე სტუმრებისთვისშეტყობინების გაგზავნის დაგეგმვა შეგიძლიათ. ეს საშუალებას მოგცემთ, გაუზიაროთ დაბინავებასთან დაკავშირებული მითითებები ჯავშანში დაფიქსირებულ ყველა სტუმარს, ასევე, აცნობოთ მათ, რომ მოგმართონ, თუ რაიმე შეკითხვა ექნებათ.

ის, თუ როგორ იგრძნობენ სტუმრები თავს საცხოვრებლის კარის გაღების მომენტში, უაღრესად მნიშვნელოვანია.

• საგულდაგულოდ დაასუფთავეთ საცხოვრებელი. შეიმუშავეთ პროცედურა, რომელიც მოიცავს ყველა ზედაპირის, იატაკისა და ქსოვილის გასუფთავებას, ასევე, ლაქების, ჭუჭყისა და თმების მოშორებას.

• დაახვედრეთ სტუმრებს სასარგებლო ინფორმაცია. ამობეჭდეთ სტუმრის ცნობარი და გზამკვლევი, შემდეგ კი დაუტოვეთ ისინი სტუმრებს ადვილად შესამჩნევ ადგილას.

• მოუმზადეთ სტუმრებს პატარა საჩუქარი. მაგალითად, ხელნაწერი წერილი ან ადგილობრივი სასუსნავი.

• შეიმუშავეთ დაბინავების სათადარიგო მეთოდი. მაგალითად, შესასვლელთან შეგიძლიათ დაამონტაჟოთ მინისეიფი, რომელშიც შეინახავთ სათადარიგო გასაღებს იმ შემთხვევისთვის, თუ დაბინავების ძირითად მეთოდთან დაკავშირებით რაიმე პრობლემა წარმოიქმნება.

დაბინავების რა მეთოდიც არ უნდა შესთავაზოთ სტუმრებს, თქვენ ან თქვენი თანამასპინძელი კავშირზე უნდა იყოთ შესაბამის დროს, რომ სწრაფად მოაგვაროთ ნებისმიერი წარმოქმნილი პრობლემა. ამას გარდა, სწრაფი რეაგირება დადებითად აისახება სტუმრობის დარჩენილ პერიოდზე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.