მიმოწერის კუთხით შემოღებული სიახლეები უფრო ეფექტური კომუნიკაციისთვის

მიმოწერა სტუმრებთან ეფექტური კომუნიკაციის მნიშვნელოვანი ნაწილია. „შეტყობინებების“ ჩანართში შესული ცვლილებები დაგეხმარებათ, დაზოგოთ დრო და უფრო მკაფიო პასუხები გასცეთ სტუმრებს.

მზა პასუხების ახალი შაბლონები უკვე მოიცავს პასუხებს ხშირად დასმულ შეკითხვებზე, ამიტომ მათი ნულიდან აკრეფა არ მოგიწევთ. საჭიროებისამებრ, საშუალება გექნებათ, სტუმრებთან მიმოწერისთანავე ჩავასწოროთ და გაგზავნოთ აღნიშნული შაბლონები, ან მათი სამომავლოდ გაგზავნა დაგეგმოთ.

„შეტყობინებების“ ჩანართში სხვა სიახლეებს შორისაა:

• ჯაჭვური პასუხები, რომლებიც მიმოწერათა უკეთ ორგანიზებაში დაგეხმარებათ
• ჩასწორების ხელსაწყოები, რომლებიც საშუალებას მოგცემთ, ჩაასწოროთ ან გააუქმოთ უკვე გაგზავნილი შეტყობინებები

აღნიშნული სიახლეები უახლოეს თვეებში ყველა მასპინძლისთვის გახდება ხელმისაწვდომი.

თქვენ იპოვით ათზე მეტ შაბლონს, რომლებიც მოიცავს სტუმრების მიერ ყველაზე ხშირად დასმულ შეკითხვებზე (მაგალითად, მისასვლელი გზის, Wi‑Fi ქსელის ან საცხოვრებლიდან გასვლის შესახებ) მზა პასუხების ნიმუშებს. შემოთავაზებული შაბლონი შეგიძლიათ უცვლელად გამოიყენოთ, ან ჩაასწოროთ ის თქვენეული სტილის, საცხოვრებელში არსებული საყოფაცხოვრებო პირობების ან სტუმართა საჭიროებების გათვალისწინებით.

ახალ შაბლონებთან ერთად ხელმისაწვდომი ხდება ფუნქციებიც, რომლებიც უფრო სწრაფად და მარტივად კომუნიკაციის საშუალებას მოგცემთ.

• შემოთავაზებები: თუ ახალი შაბლონებიდან რომელიმე სტუმრის შეკითხვის შესაბამისი აღმოჩნდება, ხელოვნური ინტელექტი მიმოწერაში ავტომატურად შემოგთავაზებთ მზა პასუხს, რომელიც მხოლოდ თქვენთვის იქნება ხილული. გაგზავნამდე შეძლებთ როგორც შემოთავაზებული მზა პასუხის შემოწმებასა და ჩასწორებას, ისე განსხვავებული შეტყობინების აკრეფას.
• დეტალები: ახალი მზა პასუხები მოიცავს ცვლადებს, რომლებიც შეტყობინების გაგზავნისას ავტომატურად ჩანაცვლდება სტუმრის სახელით ან ჯავშანთან თუ საცხოვრებელთან დაკავშირებული სხვა ცნობებით.
• შეხსენებები: როცა შეტყობინების გაგზავნის თქვენ მიერ დაგეგმილი დრო მოახლოვდება, სტუმართან მიმოწერაში შეხსენება გამოჩნდება. თქვენ საშუალება გექნებათ, ჩაასწოროთ შეტყობინება, ან გამოტოვოთ მისი გაგზავნა, თუ ის იმეორებს ინფორმაციას, რომელიც უკვე გაუზიარეთ სტუმარს.

ახალი ფუნქციები ხელმისაწვდომი გახდება 2025 წლის დასაწყისში. მანამდე შეგიძლიათ ისარგებლოთ ამჟამინდელი ხელსაწყოებით, რომ თქვენი საკუთარი მზა პასუხები შექმნათ და დაგეგმოთ შეტყობინებათა სტუმრებისთვის გაგზავნა. როცა პლატფორმას ახალი შაბლონები დაემატება, თქვენ მიერ უკვე შენახული შაბლონები არ დაიკარგება.

წარმოგიდგენთ ჯაჭვურ პასუხებსა და ჩასწორების ხელსაწყოებს, რომლებიც დაგეხმარებათ მიმოწერის მართვის კუთხით.

• ჯაჭვური პასუხები: თუ კონკრეტულ შეტყობინებაზე ჯაჭვურად პასუხს გადაწყვეტთ, თქვენი პასუხი უშუალოდ თავდაპირველი შეტყობინების ქვეშ გამოჩნდება. სტუმრები პასუხის გაცემას იმავენაირად შეძლებენ, რაც ურთიერთდაკავშირებული შეტყობინებების ჯაჭვს შექმნის.
• ჩასწორების ხელსაწყოები: შეტყობინების ჩასწორებას მისი გაგზავნიდან 15 წუთის განმავლობაში შეძლებთ, ხოლო შეტყობინების გაგზავნის გაუქმებისთვის 24 საათი გექნებათ.

ჯაჭვური პასუხებისა და ჩასწორების ხელსაწყოები ნოემბრიდან გახდება ხელმისაწვდომი. „შეტყობინებების“ ჩანართების განახლებები შემოთავაზებულია 2024 წლის ზამთრის განახლების ფარგლებში.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.