მეტი 5‑ვარსკვლავიანი მიმოხილვის მიღების ხერხები

გილოცავთ 5‑ვარსკვლავიან მიმოხილვას! სტუმრებმა დააფასეს ის ძალისხმევა, რომელიც გაიღეთ, მათი სტუმრობა დაუვიწყარი რომ ყოფილიყო. ახლა კი შეიტყვეთ, როგორ მოიქცეთ, აკრეფილი ტემპი რომ არ დაკარგოთ.

გარკვეული ცვლილებების შემოთავაზება იმ სტუმრებსაც შეუძლიათ, რომლებმაც 5 ვარსკვლავით შეგაფასეს. იხელმძღვანელეთ სტუმრებისგან მიღებული გამოხმაურებით და დაფიქრდით, სხვა რით გააუმჯობესოთ ის, რასაც მათ სთავაზობთ.

• განაახლეთ საცხოვრებლის ფოტოები. თუ, რომელიმე სტუმარი, მაგალითად, პატიოთი მოიხიბლა და ამის შესახებ მიმოხილვაშიც აღნიშნა, წარმოაჩინეთ ის ფოტოებში. თუკი საცხოვრებელს სადღესასწაულოდ რთავთ ხოლმე, ცვალეთ ფოტოები იმის მიხედვით, თუ რომელი სეზონისთვის ფორმდება ყველაზე ხშირად ჯავშნები მოცემულ მომენტში.
• ყურადღება მიაქციეთ საყოფაცხოვრებო პირობებს. დაფიქრდით, სტუმრებს შორის პოპულარული რომელი საყოფაცხოვრებო პირობების მოწყობა თუ გაუმჯობესება შეგიძლიათ (მაგალითად, შესაძლებელია მინისეიფის ჩანაცვლება გონიერი საკეტით). საყოფაცხოვრებო პირობები, რომლებსაც სტუმრები ყველაზე ხშირად ეძებენ, მოიცავს დამოუკიდებლად დაბინავების შესაძლებლობას, Wi‑Fi ქსელს, სარეცხ მანქანას, საშრობს, სტანდარტულ ან საკაბელო ტელევიზიასა და ბარბექიუსთვის გამოყოფილ ტერიტორიას.*
• არ დაგავიწყდეთ პერსონალური შტრიხები. დაახვედრეთ სტუმრებს მისასალმებელი წერილი ან პატარა სიურპრიზი, მაგალითად, იმ რეგიონის რუკა, რომლის მონახულებასაც აპირებენ ისინი.
• იზრუნეთ დამატებით კომფორტზე. შესძინეთ საცხოვრებელს კომფორტის პატარ‑პატარა ელემენტები, მაგალითად, პლუშის ბალიშები, ან მოაწყვეთ მყუდრო საკითხავი თუ სათამაშო კუთხეები.

როცა ცვლილებებს შეიტანთ, დარწმუნდით, რომ საცხოვრებლის აღწერილობა, ფოტოები და საყოფაცხოვრებო პირობების ჩამონათვალი განცხადებაში ზუსტად შეესაბამება იმას, რაც სტუმრებს რეალურად დახვდებათ მოცემულ მომენტში.

Airbnb‑ს მეშვეობით მასპინძლობა ნიშნავს, რომ მთელი მსოფლიოდან გეწვევიან ადამიანები. თითოეულმა მათგანმა თავი სასურველ სტუმრად რომ იგრძნოს, შეეცადეთ, ყოველთვის იყოთ თანმიმდევრული და წინასწარგანწყობების გარეშე.

• დასვით შეკითხვები. დაგეგმეთ, რომ დაბინავებამდე რამდენიმე დღით ადრე სტუმრებს ავტომატურად გაეგზავნოს შეტყობინება შეკითხვით იმის შესახებ, დამატებით რამე ხომ არ სჭირდებათ კომფორტული სტუმრობისთვის. ამით სტუმრებს აგრძნობინებთ, რომ მათ საჭიროებებსა და კომფორტზე ზრუნავთ.
• გამოიყენეთ გენდერულად ნეიტრალური ლექსიკა. საჭიროებისამებრ, Airbnb‑ზე თქვენს პროფილში ნაცვალსახელების მითითება შეგიძლიათ. ამით სტუმრებს არა მხოლოდ აცნობებთ იმას, თუ როგორ მოგმართონ, არამედ იმაზეც მიანიშნებთ, რომ ნებისმიერი იდენტობის მქონე ადამიანებს მიესალმებით. სტუმრებთან მიმოწერისას წინასწარ ნურაფერს დაასკვნით, მაგალითად, მათ გენდერთან ან პირად ცხოვრებასთან დაკავშირებით — ჯერ დარწმუნდით, რომ თქვენი ვარაუდი სწორია.
• წარმოაჩინეთ ადაპტირებული პირობები. თუ საცხოვრებელში არის შშმ პირთათვის ადაპტირებული საპარკინგე ადგილი, ანდა უსაფეხურო შესასვლელი / კარის ღიობები / საშხაპე ან სხვა ადაპტირებული პირობები, გაეცანით სახელმძღვანელო მითითებებს ადაპტირებულ პირობებთან დაკავშირებით, შემდეგ კი ატვირთეთ მკაფიო ფოტოები თქვენი განცხადების „ადაპტირებულობის“ სექციაში, რომ სტუმრობის კიდევ უფრო მეტ მსურველს დაეხმაროთ იმის გარკვევაში, თუ რამდენად შესაფერისია მათთვის თქვენ მიერ განთავსებული საცხოვრებელი.
• გაააქტიურეთ მომენტალური დაჯავშნა. მიეცით სტუმრებს საშუალება, წინასწარი დასტურის ლოდინის გარეშე დაჯავშნონ თქვენ მიერ განთავსებული საცხოვრებელი. ამით მათ აგრძნობინებთ, რომ სტუმრობისთვის საკმარისია მხოლოდ თქვენ მიერ დადგენილი კრიტერიუმების დაკმაყოფილება.
• მიეცით სტუმრებს დამოუკიდებლად დაბინავების შესაძლებლობა. სტუმრების თქმით, როცა მათ დამოუკიდებლად დაბინავების საშუალება აქვთ, ისინი ნაკლებად ღელავენ იმაზე, რომ მათი იდენტობა, შესაძლოა, მიკერძოებული დამოკიდებულების საფუძველი გახდეს.

ინკლუზიური მასპინძლობა ნიშნავს ნებისმიერი სტუმრის მიმართ ერთი სტანდარტით მიდგომას ყველა ეტაპზე — ჯავშნის გაფორმების მომენტიდან სტუმრობის მიმოხილვამდე. თუ ამ კუთხით დამატებითი ინფორმაციის მიღება გსურთ, გაეცანით ჩვენს სასწავლო სერიას წინასწარგანწყობების გარეშე მასპინძლობის შესახებ.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.

*ეფუძნება Airbnb‑ს მონაცემებს 2024 წლის 1 იანვრიდან 30 ივნისამდე პერიოდში საერთაშორისო მასშტაბით ყველაზე ხშირად მოძიებული საყოფაცხოვრებო პირობების შესახებ.