სიბრძნე საქმეში: ინტერვიუ ჩიპ კონლისთან

სიამოვნებით წარმოგიდგენთ ჩიპ კონლის, რომელიც გვიზიარებს თავის მოსაზრებებს ცხოვრებისეული სიბრძნისა და სამუშაოს მიმართების შესახებ; ასევე, იმაზე, თუ რა გავლენა მოახდინეს Airbnb მასპინძელთა გაერთიანების წევრებმა მის კარიერაზე. მასპინძლობის სფეროში მოღვაწე გამოცდილმა მეწარმემ, Airbnb‑ს სტრატეგიულმა მრჩეველმა და მწერალმა ჩიპ კონლიმ მრავალი წელი მიუძღვნა მასპინძლობის ბიზნესს. მისი ახალი წიგნი „სიბრძნე საქმეში: თანამედროვე „მოხუცების“ თაობის აღმოცენება“ სრულიად ცვლის ასაკში შესვლასთან დაკავშირებულ სტერეოტიპს და ამ პროცესს გამოცდილების გაზიარების და ახალი ცოდნის მიღების ფუნქციას უძებნის.

შ: უკვე მრავალი წელია, მასპინძლობის ბიზნესსა და Airbnb მასპინძელთა გაერთიანებაში მოღვაწეობთ. რამ გიბიძგათ, რომ წიგნი დაგეწერათ და საკუთარი გამოცდილება გაგეზიარებინათ?
ჩიპ კონლი: „უპირველეს ყოვლისა, მენატრება მასპინძელთა გაერთიანება. ოთხი წლის მანძილზე კომპანიაში ხელმძღვანელ პოზიციაზე ვმუშაობდი, ხშირად ვმოგზაურობდი და ბევრ რამეს ვიგებდი მასპინძლებისგან. არსებობს ძველი გამონათქვამი: „მეტყველება წმინდა ვერცხლია, ხოლო დუმილი — სიბრძნის ხელოვნება“. ვფიქრობ, ჩვენი მასპინძლები არა მხოლოდ შესანიშნავი მსმენელები არიან, არამედ მნიშვნელოვანი წვლილი შეაქვთ მთლიანად გაერთიანების საქმიანობაში. ბევრი რამ ვისწავლე მათგან და იმედია, ისინი დარწმუნდებიან ამაში, როცა ჩემს ახალ წიგნს გაეცნობიან. აქ იმაზე ვსაუბრობ, რომ ტექნოლოგიების საყოველთაო გავრცელების ხანაში განსაკუთრებული მნიშვნელობა აქვს ცხოვრებისეულ სიბრძნეს“.

შ: მასპინძლობისადმი თქვენეული მიდგომიდან რა რჩევები შეიძლება გაითვალისწინონ სხვა მასპინძლებმა?
კონლი: „უკვე ხუთწელიწად-ნახევარია, Airbnb‑ში ვმუშაობ (ბოლო წელიწად-ნახევარია, კონსულტანტი ვარ) და თითქმის ყველა თანამშრომლებზე ასაკით ორჯერ უფროსი ვარ. ვცდილობდი, მაგალითი ვყოფილიყავი სხვებისთვის, განსაკუთრებით ჩემზე უფროსებისთვის. ბრაიანს და მის თანადამფუძნებლებს უხარიათ, რომ 50 წლის და უფროსი ასაკის მასპინძლები Airbnb სტუმრების უმაღლეს შეფასებებს იმსახურებენ, რაც შეიძლება რამდენიმე მიზეზით აიხსნას: ამ ასაკში ადამიანებს თვითგანვითარებისთვის მეტი დრო აქვთ, ასაკის მატებასთან ერთად ადამიანებს უკეთ ესმით სხვების (რაც გამორჩეული მასპინძლის საუკეთესო თვისებაა) და პენსიაზე გასვლისას შეიძლება მასპინძლობა მათთვის დამატებითი შემოსავლის წყაროდ იქცეს. არ მგონია, რომ ცხოვრებისეული სიბრძნე რომელიმე კონკრეტული ასაკისთვისაა დამახასიათებელი, თუმცა მას განვითარება და გამოყენება სჭირდება“.

შ: იცვლებოდა თუ არა თქვენი შეხედულებები მასპინძლობაზე დროთა განმავლობაში?
კონლი: „20 წელს გადაცილებული ვიყავი, როცა 1987 წელს კომპანია Joie de Vivre Hospitality დავაარსე. ეს იყო აშშ‑ში ბუტიკ-ოტელების ერთ‑ერთი პირველი ოპერატორი. აღმოჩნდა, რომ უმრავლესობას ადგილობრივი კულტურის გარემოში, ინდივიდზე ორიენტირებული დასვენება აინტერესებდა. საგულისხმოა, რომ სარეგისტრაციო დახლის თანამშრომელს სახელი შევუცვალეთ და „პორტიეს“ ნაცვლად „მასპინძელი“ დავარქვით. გამოდის, რომ მასპინძლობის სფეროში უკვე 32 წელია ვმოღვაწეობ. კომპანიაში ჩემი გენერალური დირექტორობის 24 წლის მანძილზე 52 ბუტიკ-ოტელი გავხსენით. ცოტა ხანში სასტუმროების საერთაშორისო ქსელებმაც ჩვენი გზა აირჩიეს. ისინი მეტ დროს უთმობდნენ დიზაინს, რესტორნებს, ბარებს და ადგილობრივ ელემენტებს. როცა საერთაშორისო მასპინძლობისა და სტრატეგიის განყოფილების ხელმძღვანელი გავხდი Airbnb‑ში, მივხვდი, რომ საცხოვრებლის გაზიარების ამ ახალი ტენდენციის ამოსავალი ბუტიკ-ოტელების პრინციპი იყო, ოღონდ უფრო ფართო მასშტაბში. მართლაც, თანამედროვე ტექნოლოგიები Airbnb‑ს ხელს უწყობს, რომ თითოეულ სტუმარზე ინდივიდუალურად იყოს ორიენტირებული და ეს მიდგომა მთელი მსოფლიოს მასშტაბით გაავრცელოს. ხუთწელიწად-ნახევრის წინ ბრაიან ჩესკიმ კომპანიაში მუშაობა შემომთავაზა და მკითხა, შესაძლებელი იყო თუ არა მასპინძლობის ბიზნესის დემოკრატიზება. ვფიქრობ, რომ სწორედ ეს მოახერხა Airbnb‑მ და ჩვენმა შესანიშნავმა გაერთიანებამ“.

შ: რას ურჩევდით ახალბედა, დამწყებ მასპინძელს?
კონლი: „ჩვენს პლატფორმაზე საუკეთესო მასპინძლები ორგანიზებულობით, სტუმართმოყვარეობით და გულითადობით გამოირჩევიან. ეს თვისებები ერთმანეთისგან განსხვავდება, მაგრამ მათი ერთობლიობა წარმატების უპირობო გარანტიაა. სხვათა შორის, წყვილები ხშირად ყველა ამ უნარს აერთიანებენ“.

შ: რა სამომავლო გეგმები გაქვთ, ჩიპ? რის გაკეთება გსურთ შემდეგ სეზონზე?
კონლი: „ვრჩები ბრაიანის და მმართველი გუნდის სტრატეგიულ მრჩევლად. წიგნზე „სიბრძნე საქმეში“ მუშაობისას მივხვდი, შუახნის და უფროსი ასაკის რამდენ ადამიანს სურს საკუთარი ცხოვრებისა და კარიერის გადაფასება, მაგრამ რამდენად მცირეა რესურსები მათი წამოწყების მხარდასაჭერად. სწორედ ამ მიზნით შევქმენი მსოფლიოში პირველი სკოლა შუახნის ადამიანებისთვის, თანამედროვე აკადემია უფროსებისთვის, რომელიც ადამიანებს სთავაზობს სივრცეს და ხელსაწყოებს, რომლებიც ახალი ცხოვრების დაწყებაში დაეხმარება. აკადემიის კამპუსი სანაპიროზე, მექსიკის ქალაქ კაბო‑სან-ლუკასის ჩრდილოეთით (კალიფორნიის ნახევარკუნძულის სამხრეთით), ერთი საათის სავალზე მდებარეობს, რაც იმას ნიშნავს, რომ დავუბრუნდი მასპინძლობის ბიზნესს. ჩვენთან მთელი მსოფლიოდან ჩამოდიან“.

ჩიპის წიგნისა და უფროსებისთვის განკუთვნილი თანამედროვე აკადემიის შესახებ დამატებითი ინფორმაციისთვის ეწვიეთ მის ვებსაიტს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.