რას გულისხმობს „მნიშვნელოვნად შემაფერხებელი გარემოებების დებულება“?

მასპინძლებისა და სტუმრების უსაფრთხოების დაცვა ჩვენი უმთავრესი პრიორიტეტია. სწორედ ამიტომ, ჩვენთან მოქმედებს გარკვეული წესები, რომლებიც ემსახურება თქვენი და სტუმრების დაცვას, როცა მასპინძლობას ვერ ახერხებთ სტიქიური უბედურების, საზოგადოებრივი ჯანდაცვის სფეროში კრიზისული ვითარების ან სხვა მასშტაბური შემთხვევის გამო. 

აღნიშნული წესების ნაკრებს ადრე „საპატიო მიზეზების დებულება“ ეწოდებოდა. ყველაფერში მარტივად რომ გაერკვეთ, წესებში მალე ცვლილებები შევა, მათ ნაკრებს კი სახელი შეეცვლება. 

„მნიშვნელოვნად შემაფერხებელი გარემოებების განახლებულ დებულებას“ დაექვემდებარება ყველა სტუმრობა და შთაბეჭდილება, რომელიც დაგეგმილია 2024 წლის 6 ივნისს ან მის შემდგომ პერიოდში, ჯავშნის გაფორმების თარიღის მიუხედავად.*

დებულება განმარტავს, როგორ აგვარებს Airbnb ჯავშნების გაუქმებასა და თანხის დაბრუნებასთან დაკავშირებულ საკითხებს, როდესაც სტუმრობა ფერხდება მასშტაბური ინციდენტების გამო. 

დებულებით გათვალისწინებულია ჯავშნის გაფორმების შემდეგ წარმოქმნილი და ჯავშანში მითითებულ მდებარეობაზე გავრცელებული შემდეგი გარემოებები (შეფერხებები ან სამართლებრივი აკრძალვები, რომელთა შესახებაც ჯავშნის გაფორმებისას ცნობილი არ იყო):

• ოფიციალურად გამოცხადებული საგანგებო სიტუაციები ჯანდაცვის სფეროში და ეპიდემიები. აღნიშნული მოიცავს სამთავრობო უწყებების მიერ გამოცხადებულ ეპიდემიებს, პანდემიებსა და ჯანდაცვის სფეროში საგანგებო მდგომარეობებს. არ იგულისხმება დაავადებები, რომლებიც ენდემურია ან გავრცელებულია ამა თუ იმ ტერიტორიაზე. „მნიშვნელოვნად შემაფერხებელი გარემოებების დებულება“ არ ვრცელდება COVID‑19‑ზე.
• ოფიციალური სამოგზაურო შეზღუდვები. აღნიშნული მოიცავს სამთავრობო უწყების მიერ დაწესებულ სავალდებულო შეზღუდვებს, მაგალითად, ბრძანებას ევაკუაციის შესახებ. არ იგულისხმება რეკომენდაციები მოგზაურთათვის და არც სამთავრობო უწყებების სხვა მსგავსი მითითებები.
• სამხედრო მოქმედებები და სხვა დაპირისპირებები. აღნიშნული მოიცავს საომარ მოქმედებებს, დაპირისპირებებს, შეიარაღებულ თავდასხმებს, სამოქალაქო ომებს, ტერაქტებს, აფეთქებებს, საავიაციო იერიშებს, აჯანყებებს, სახალხო მღელვარებასა და ამბოხს.
• ძირითადი კომუნალური ქსელების მუშაობის მასობრივი შეწყვეტა. აღნიშნული მოიცავს ძირითადი კომუნალური ქსელების (მაგ., ელექტროენერგიის, წყლის და ა.შ.) მუშაობის ხანგრძლივ შეწყვეტას ადგილობრივთა დიდი ნაწილისთვის.
• სტიქიური უბედურებები. აღნიშნული მოიცავს სტიქიურ უბედურებებსა და სხვა მძიმე მეტეოროლოგიურ მოვლენებს. ამა თუ იმ ტერიტორიისთვის დამახასიათებელ, პროგნოზირებად მეტეოროლოგიურ თუ ბუნებრივ პირობებს მხოლოდ იმ შემთხვევაში მიენიჭება მნიშვნელობა, თუ ისინი განაპირობებს დებულებით გათვალისწინებულ სხვა შემაფერხებელ გარემოებას. მაგალითად, მექსიკაში ქარიშხლების სეზონზე მომხდარი ქარიშხალი გათვალისწინებული იქნება მხოლოდ იმ შემთხვევაში, თუ სავალდებულო ევაკუაციის ბრძანება გაიცემა.

თუ კონკრეტული გარემოება გათვალისწინებულია:

• მასპინძლებს შეეძლებათ ჯავშნის გაუქმება უსასყიდლოდ, უარყოფითი შედეგების გარეშე. განცხადების კალენდარში დაიბლოკება გაუქმებული თარიღები.
• სტუმრებს შეეძლებათ ჯავშნის გაუქმება და თანხის დაბრუნება ან სამოგზაურო ბონუსის მიღება მასპინძლის მიერ დადგენილი გაუქმების წესების მიუხედავად. თუ სტუმარი გააუქმებს ჯავშანს, განცხადების კალენდარში შესაბამისი თარიღები დაბლოკილი არ დარჩება.
• სტუმრის ან მასპინძლის მხრიდან ჯავშნის გაუქმების შემთხვევაში, მასპინძელი არ მიიღებს ანაზღაურებას.
• სტუმრებსა და მასპინძლებს შეუძლიათ დარჩენილი ღამეების გაუქმება იმ შემთხვევაშიც კი, თუ სტუმრები უკვე დაბინავდნენ.

თუ კონკრეტული გარემოება გათვალისწინებული არ არის:

• სტუმრის მხრიდან გაუქმება დაექვემდებარება განცხადებაში დადგენილ გაუქმების წესებს.
• მასპინძლის მხრიდან გაუქმება დაექვემდებარება მასპინძლების მხრიდან გაუქმების წესებს, რომლებიც, შესაძლოა, ითვალისწინებდეს გადასახადებსა და სხვა უარყოფით შედეგებს. 
• ნებისმიერ შემთხვევაში, სტუმრებსა და მასპინძლებს თავადაც შეუძლიათ თანხის დაბრუნებაზე შეთანხმება დებულების გათვალისწინების გარეშე. 

დებულებას სტუმრებისა და მასპინძლებისგან მიღებული გამოხმაურების პასუხად ვაახლებთ და ვუცვლით სახელს. მაგალითად, ზოგიერთმა მასპინძელმა არ იცოდა, როგორ გაერკვია, ითვალისწინებდა თუ არა დებულება მოგზაურობისთვის ხელისშემშლელ, პროგნოზირებულ მეტეოროლოგიურ პირობებს. 

გაგაცნობთ ძირითად სიახლეებს: 

• დებულებით გათვალისწინებული იქნება მხოლოდ ის მოვლენები, რომლებიც ჯავშანში მითითებულ მდებარეობაზე განვითარდება. აღარ იქნება გათვალისწინებული ფაქტორები, რომლებიც ხელს შეუშლის სტუმარს, მოხვდეს ჯავშანში მითითებულ მისამართზე. 
• ჯავშანში მითითებულ მდებარეობაზე პროგნოზირებული მეტეოროლოგიური პირობები ცალსახად გათვალისწინებული იქნება მხოლოდ იმ შემთხვევაში, თუ ისინი განაპირობებს დებულებით გათვალისწინებულ სხვა გარემოებას, მაგალითად, მოგზაურობის შეზღუდვას მთავრობის მიერ ან კომუნალურ მომსახურებათა მასშტაბურ შეწყვეტას. 

მასპინძლების მხრიდან გაუქმების წესები „მნიშვნელოვნად შემაფერხებელი გარემოებების დებულებისგან“ დამოუკიდებლად მოქმედებს. მასპინძლების მხრიდან გაუქმების წესების თანახმად, Airbnb არ დააკისრებს მასპინძელს გაუქმების გადასახადებსა და, ზოგიერთ შემთხვევაში, სხვა სანქციებს, თუ ის გააუქმებს ჯავშანს კონკრეტული საფუძვლიანი მიზეზით, რომელიც მის კონტროლს არ ექვემდებარება (მაგ., მილის გახეთქვის შემთხვევაში). მასპინძლების მხრიდან გაუქმების წესების თანახმად, მასპინძლებმა არ უნდა გააუქმონ დადასტურებული ჯავშნები. 

როგორც წესები, ისე დებულება მასპინძელს ავალდებულებს, გააუქმოს ჯავშანი, თუ სივრცე საცხოვრებლად გამოუსადეგარია ან არ შეესაბამება ჯავშნის პირობებს. მაგალითად, თუ დიდი ქარიშხლის შემდეგ გამოუსადეგარი გახდება განცხადებაში მითითებული აუზი, საჭირო იქნება ჯავშნის გაუქმება ან სტუმრებთან შეთანხმება მათ დაბინავებამდე.

*თუ Airbnb სხვა ინფორმაციას არ მიაწვდის კონკრეტულ მომხმარებლებს.

დებულება არ ზღუდავს სტუმრებისა და მასპინძლების უფლებებს, რომლებსაც ითვალისწინებს ადგილობრივი კანონმდებლობა და რეგულაციები. არც ამ დებულების ფარგლებში Airbnb‑ს მიერ მიღებული გადაწყვეტილებები იმოქმედებს მათ კანონისმიერ უფლებებზე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.