Airbnb‑ს მომსახურების გადასახადები

Airbnb‑ს შეუფერხებელი მუშაობის უზრუნველსაყოფად და ჩვენ მიერ შემოთავაზებულ სხვადასხვა მომსახურებასთან (მაგალითად, მომხმარებელთა სადღეღამისო მხარდაჭერასთან) დაკავშირებული ხარჯების დასაფარად თითოეული დადასტურებული ჯავშანი მოიცავს მომსახურების გადასახადს.

საცხოვრებლების შემთხვევაში გადასახადის 2 ვარიანტი არსებობს. კერძოდ, შესაძლებელია გადასახადის გაყოფა ან მხოლოდ მასპინძლის მიერ გადახდა.

1. გადასახადის გაყოფა

ეს ვარიანტი ყველაზე ხშირად გამოიყენება და ამ შემთხვევაში გადასახადი იყოფა მასპინძელსა და სტუმარს შორის.

მასპინძელთა მომსახურების გადასახადი

მასპინძელთა უმეტესობას ეკისრება 3%‑იანი გადასახდი, თუმცა ზოგიერთ მათგანს (მათ შორის, მასპინძლებს, რომელთაც იტალიაში აქვთ შეთავაზებული საცხოვრებლები) მეტის გადახდა უწევთ. აღნიშნული გადასახადი გამოითვლება ჯავშნის შუალედური ღირებულების საფუძველზე (რომელიც მოიცავს ღამეების ჯამურ ღირებულებასა და მასპინძლის მიერ დაწესებულ დამატებით გადასახადებს, სტუმართა მომსახურების გადასახადისა და ოფიციალური მოსაკრებლების გაუთვალისწინებლად) და ის ავტომატურად იქვითება მასპინძლის კუთვნილი ანაზღაურებიდან.

მასპინძელთა მომსახურების გადასახადის შემოწმება ჯავშანში

სტუმართა მომსახურების გადასახადი

სტუმართა მომსახურების გადასახადის ოდენობის გარკვევა შესაძლებელია ფასის დეტალიზაციაში, რომელიც მოცემული იქნება ჯავშნის გაფორმებამდე.

სტუმართა მომსახურების გადასახადი, უმეტეს შემთხვევაში, შეადგენს ჯავშნის შუალედური ღირებულების (რომელიც მოიცავს ღამეების ჯამურ ღირებულებასა და მასპინძლის მიერ დაწესებულ დამატებით გადასახადებს, სტუმართა მომსახურების გადასახადისა და ოფიციალური მოსაკრებლების გაუთვალისწინებლად) 14,2%‑ზე ნაკლებს. სტუმართა მომსახურების გადასახადის ოდენობას სხვადასხვა ფაქტორი განაპირობებს. ჯავშნის პარამეტრების მიხედვით, ის, შესაძლოა, აღნიშნულზე მეტი ან ნაკლები იყოს. 28 ან მეტი ღამის ხანგრძლივობის ზოგიერთი ჯავშნისთვის მოქმედებს სტუმართა მომსახურების შემცირებული გადასახადი.

როცა სტუმარი ჯავშნის ღირებულებას იხდის ვალუტაში, რომელიც განსხვავდება მასპინძლის მიერ შესაბამისი განცხადებისთვის განსაზღვრულისგან, გადასახადის ოდენობა იცვლება ჩვენ მიერ გასაწევ მომსახურებათა მოცულობის შესაბამისად. კერძოდ, მულტისავალუტო ჯავშნების შემთხვევაში, სტუმრებისთვის დაკისრებულ მომსახურების გადასახადში გათვალისწინებული იქნება დამატებითი თანხაც, რის შედეგადაც მისი ოდენობა ჯავშნის შუალედური ღირებულების 16,5%‑მდე გაიზრდება.

2. მხოლოდ მასპინძლის მიერ გადახდა

ამ ვარიანტის შემთხვევაში გადასახადი მთლიანად მასპინძლის კუთვნილი ანაზღაურებიდან იქვითება. ის, როგორც წესი, შეადგენს 14‑16%‑ს, თუმცა მასპინძლებს, რომლებსაც გაუქმების უმკაცრესი წესები აქვთ დადგენილი, ზოგჯერ მეტის გადახდა უწევთ, ხოლო 28 ან მეტი ღამის ხანგრძლივობის ჯავშნებისთვის გადასახადი, შესაძლოა, ნაკლები იყოს.

გადასახადის ეს ვარიანტი სავალდებულოა ტრადიციული სასტუმრო ობიექტებისთვის (სასტუმროებისთვის, აპარტამენტებისთვის და ა.შ.), ასევე, პროგრამული უზრუნველყოფის მეშვეობით დაკავშირებული განცხადებების მქონე მასპინძლებისთვის (გამონაკლისია შემთხვევები, როცა მასპინძლის მიერ განთავსებული საცხოვრებლების უმრავლესობა მდებარეობს აშშ‑ში, კანადაში, ბაჰამის კუნძულებზე, მექსიკაში, არგენტინაში, ტაივანში ან ურუგვაიში).

დღგ‑ის დარიცხვა

კონკრეტულ იურისდიქციაში მოქმედი კანონმდებლობის მიხედვით, ზემოაღნიშნულ გადასახადებს, შესაძლოა, დღგ ერიცხებოდეს. შესაბამის შემთხვევებში, მომსახურების გადასახადი მოიცავს დღგ‑საც.

ჩვენ ვიტოვებთ უფლებას, ნებისმიერ დროს შევცვალოთ ჩვენი მომსახურების გადასახადები მომსახურების პირობების შესაბამისად.