ზედმეტი ნივთების მოშორება სტუმრების კომფორტისთვის

სტუმრებს მოსწონთ სუფთა და კარგად ორგანიზებული სივრცეები. სწორედ ამიტომ, გადავწყვიტეთ, გაგიზიაროთ სხვა მასპინძლების რჩევები საცხოვრებლიდან ზედმეტი ნივთების მოცილებასთან დაკავშირებით როგორც ცალკე ოთახების, ისე მთლიანად შეთავაზებული საცხოვრებლების შემთხვევაში.

„როგორც ვამჩნევ, რაც ნაკლები ნივთია ამა თუ იმ სივრცეში, მით უფრო სუფთად და მოწესრიგებულად გამოიყურება ის“, — ამბობს კეთი, მასპინძელი ოლბანიდან (ავსტრალია). სტუმრები დიდ ყურადღებას აქცევენ სისუფთავეს. Airbnb‑ს მონაცემების მიხედვით, უარყოფითი მიმოხილვების ერთ‑ერთი უმთავრესი მიზეზი სწორედ სისუფთავის ნაკლებობაა.

„ბრტყელ ზედაპირებზე ნივთების რაოდენობის საგრძნობლად შემცირება მნიშვნელოვანია“, — ამბობენ ჯეი და ლინი, სუპერმასპინძლები ბლანკოდან (ტეხასი, აშშ), და დასძენენ: „ეს არა მხოლოდ დასუფთავების პროცესს გაგიმარტივებთ, არამედ სტუმრებსაც მეტი ადგილი გამოუთავისუფლდებათ თავიანთი ნივთებისთვის, ხოლო საცხოვრებლიდან გასვლისას არაფერი დაავიწყდებათ, რადგან იქაურობისთვის თვალის სწრაფად შევლების საშუალება ექნებათ“.

სტუმრებს სჭირდებათ სივრცე თავიანთი ტანსაცმლის, პირადი ჰიგიენის საგნებისა და სხვა ნივთების შესანახად, ამისთვის კი, შესაძლოა, უჯრებიდან და კარადებიდან არასაჭირო ნივთების გადმოწყობა მოგიწიოთ. „თუ რამე ერთი‑ორი წლის განმავლობაში არ მცმია, ან არ გამომიყენებია, მას ვემშვიდობები“, — ამბობს სარა, მასპინძელი საიულიტიდან (მექსიკა).

ზოგიერთ შემთხვევაში, რეკომენდებულია გაცილებით მეტი სივრცის გამოთავისუფლება სტუმრებისთვის, განსაკუთრებით, თუ ისინი გრძელი ვადით რჩებიან. მაგალითად, ჯესიკა, მასპინძელი სეულიდან (სამხრეთი კორეა), ამბობს: „დარწმუნებული ვარ, სტუმრებს თავადაც ექნებათ წიგნები, სუვენირები, საოჯახო სურათები და სხვა დანარჩენი, რის შენახვასაც ტუმბოზე, სამუშაო მაგიდასთან ან თაროზე მოისურვებენ“.

მოიფიქრეთ, როგორ ჯობს საყოფაცხოვრებო ნივთების დემონსტრირება ისე, რომ სტუმრებმა ისინი ადვილად იპოვონ. მაგალითად, შანტალს, მასპინძელს ივინიაკ‑ლა‑ტურიდან (საფრანგეთი), საგანგებოდ სტუმრებისთვის გამოყოფილი აქვს კარადა. „იქ ყველაფერია“, — ამბობს ის და დასძენს: „წყლის პატარა ბოთლებიდან ტუალეტის ქაღალდამდე. ყველაფერი თაროებისა და კატეგორიების მიხედვით მაქვს დახარისხებული, ცალ‑ცალკე კალათებში“.

ორგანიზების დასრულების შემდეგ არ დაგავიწყდეთ საწოლის თეთრეულისა და სხვა საჭირო ნივთების ინვენტარიზაცია, პარალელურად კი გადაყარეთ ან სხვას მიეცით ყველაფერი, რაც არასახარბიელო ფორმაშია.

„პირადად მე არ მომწონს, როცა სამზარეულოში ისეთი ნივთები მხვდება, რომლებიც ძველმანების ბაზრობაზე შეძენილს ან სხვა ოჯახიდან მოტანილს ჰგავს“, — ამბობს ალექსანდრა, მასპინძელი ლინკოლნიდან (კალიფორნია, აშშ).

სამზარეულოსა და სააბაზანოებში დაახვედრეთ სტუმრებს მხოლოდ ის, რაც მათ ნამდვილად სჭირდებათ, დანარჩენი კი მოაშორეთ. სტუმრების უმეტესობას, რა თქმა უნდა, სიამოვნებს, როცა საცხოვრებელში ბოთლის გასახსნელი ან თმის კონდიციონერი ხვდება, თუმცა არ არის საჭირო, ისინი სამ‑სამი სახით იყოს წარმოდგენილი.

წინა სტუმრების მიერ დატოვებული სურსათის გადაყრა, შესაძლოა, არაეკონომიურად მოგეჩვენოთ, თუმცა მისი შენახვა კარგი აზრი ნამდვილად არ არის. მიშელი, მასპინძელი ჩიკაგოდან (აშშ), ამბობს, რომ ის მხოლოდ იმ საჭმელ და სასმელ პროდუქტებს ინახავს, რომლებიც გაუხსნელ შეფუთვაშია, მაგალითად, ბოთლის წყალს, გაზიან სასმელებსა და ერთჯერადი გამოყენების საკაზმებს.

„ყველაფერს, რაც ოთახშია, გარკვეული დანიშნულება უნდა ჰქონდეს“, — ამბობს კელი, მასპინძელი ოსტინიდან (ტეხასი, აშშ), და დასძენს: „ეს სულაც არ ნიშნავს, რომ ოთახი არ უნდა იყოს მომხიბვლელი, მყუდრო და თბილი“.

მართალია, „ფუნქციურსა“ და „მყუდროს“ შორის სწორი ბალანსის დაჭერა კონკრეტულ საცხოვრებელზე იქნება დამოკიდებული, თუმცა შეგიძლიათ დაიხმაროთ რამდენიმე რჩევა ამ კუთხით:

• იყავით ზომიერი პერსონალური შტრიხების შეტანისას: ნუ დაახვედრებთ სტუმრებს თქვენს საოჯახო ფოტოებს, ტანსაცმელს, ფეხსაცმელსა თუ ბავშვების შემოქმედებას.
• ცოტაოდენი ინდივიდუალობა მისასალმებელია: ჩარჩოში ჩასმული ადგილობრივი ხელოვნების ნიმუში, თავისებური ავეჯი ან უნიკალური სარკე, რომელიც გამოარჩევს საცხოვრებელს.
• იზრუნეთ დეკორატიულ ნივთებზე: მცენარეები და ბალიშები შინაურულ გარემოს შექმნის — მთავარია, ისინი ზომიერად გამოიყენოთ და სათანადოდ დააწყოთ.