მყუდრო და კომფორტული სივრცის მოწყობა

როცა პირველი სტუმრების დასახვედრად ემზადებით, Airbnb‑ზე განთავსებული ნებისმიერი ტიპის საცხოვრებელი შეგიძლიათ მარტივად აქციოთ სტუმრებისთვის უფრო მიმზიდველად და კომფორტულად.

თქვენ მიერ შერჩეული დეკორატიული ნივთები, რომლებიც საცხოვრებელს სიმყუდროვეს შესძენს და მიმზიდველად აქცევს, არ უნდა იყოს მაინცდამაინც გადატვირთული და ძვირადღირებული.

გთავაზობთ რამდენიმე რჩევას დახვეწილი დიზაინის მოსაფიქრებლად:

• ოთახები მორთეთ ელემენტებით, რომლებიც ხაზს უსვამს თქვენს ინდივიდუალობას (მაგალითად, მოგზაურობებიდან ჩამოტანილი სამახსოვრო ნივთებით)
• შეეცადეთ, არ დატოვოთ ბევრი ცარიელი სივრცე, რადგან ეს უფუნქციობისა და უსახურობის განცდას ქმნის
• შეარჩიეთ ფერთა კონკრეტული პალიტრა და ერთმანეთს შეუხამეთ ხელოვნების ნიმუშები, ქსოვილები და სხვა დეტალები
• დაამატეთ ოთახებს ცენტრალური ელემენტი, მაგალითად, დიდი სანათი ან სავარძელი
• მორთეთ საცხოვრებელი მცენარეებით ან ყვავილებით, რომ იქაურობა გამოაცოცხლოთ

როგორც მინიმუმ, სტუმრებს უნდა დაახვედროთ ტუალეტის ქაღალდი, საპონი, თითო პირსახოცი და ბალიში ყოველი სტუმრისთვის, ასევე, თეთრეულის თითო კომპლექტი ყოველი საწოლისთვის.

ამას გარდა, სტუმრებს ძალიან მოსწონთ, როცა საცხოვრებელში ხვდებათ:

• დამატებითი პირსახოცები, საბნები და ბალიშები
• შამპუნი და კონდიციონერი
• ფენი
• საბაზისო პროდუქტები და მოწყობილობები (მაგალითად, ყავა, ჩაი და ჩაიდანი)
• ძირითადი საწმენდი საშუალებები
  

შეიტყვეთ მეტი საყოფაცხოვრებო პირობების შესახებ

საძინებელში სტუმრებს სძინავთ და იქვე ინახავენ ისინი თავიანთ ნივთებს. სწორედ ამიტომ, ამ ოთახში კომფორტი განსაკუთრებით მნიშვნელოვანია. დაფიქრდით, თავად თქვენ რამ შეიძლება გაგრძნობინოთ თავი შინაურულად, როცა სტუმრად იმყოფებით, და ამის მიხედვით იმოქმედეთ.

მაგალითად:

• მოაწყვეთ სივრცე პირადი ნივთებისთვის: გამოათავისუფლეთ კომოდის უჯრები, მოამზადეთ კარადა რამდენიმე საკიდით ან ჩემოდნის დასადები
• დადგით საძინებელში ტუმბო სანათით, სტუმრებმა საწოლის გვერდით სათვალე, ტელეფონი ან წიგნი რომ მოათავსონ
• დაახვედრეთ სტუმრებს ხარისხიანი მატრასი, დამატებითი ბალიშები და რბილი საბნები სხვადასხვა გემოვნებისთვის
• სასიამოვნო გარემოს შესაქმნელად შეიტანეთ საძინებელში მცენარეები, სარკე, წყლის ჭიქა და გრაფინი, უნივერსალური ადაპტერი და ტელეფონის დამტენი

საცხოვრებელში შესვლისთანავე სტუმრებმა მათზე ზრუნვა რომ იგრძნონ, ყურადღება მიაქციეთ რამდენიმე საგულისხმო დეტალს.

1. მოაშორეთ ზედმეტი ნივთები: თუ საცხოვრებელში სტუმრებთან ერთად იქნებით, დაფიქრდით, რომელი ნივთების გატანა აჯობებს საზიარო სივრცეებიდან. გახსოვდეთ, რომ მოწესრიგებული საცხოვრებელი, რომელშიც პირადი ნივთები თვალს ცუდად არ ხვდება, უფრო მიმზიდველად გამოიყურება.

2. მოამზადეთ ინსტრუქცია: აუხსენით სტუმრებს, როგორ გამოიყენონ ყველაფერი, რაც მათ განკარგულებაშია (მაგალითად, კონდიციონერი, ავტოფარეხის კარი ან გაზის ბუხარი). სხვადასხვა ინსტრუქცია შეგიძლიათ სტუმრის ცნობარშიც შეიტანოთ.

3. თავად გაატარეთ ერთი ღამე საცხოვრებელში: ამით უკეთ მიხვდებით, რისი დამატება ან გაუმჯობესებაა საჭირო. დაფიქრდით, რამდენად კომფორტულად და მყუდროდ გრძნობთ თავს. არის საცხოვრებელში ყველაფერი, რაც საჭიროა, თავი შინაურულად რომ იგრძნოთ? თუ რამე კითხვის ნიშნებს გიჩენთ, განაგრძეთ ექსპერიმენტირება, სანამ ყველაფერს თქვენს გემოზე არ მოაწყობთ.

4. იზრუნეთ სისუფთავეზე: სტუმრის დაბინავებამდე და გასვლის შემდეგ აუცილებელია წესრიგის შენარჩუნება და დასუფთავების 5‑ეტაპიანი პროცედურის შესრულება. ეს დამოუკიდებლადაც შეგიძლიათ და პროფესიონალის დახმარებითაც. გაეცანით ჩვენ მიერ მომზადებულ საკონტროლო სიას, რომ არცერთი წვრილმანი არ გამოგრჩეთ, დახარჯული დროის კომპენსაციის მიზნით კი შეგიძლიათ განცხადებას დასუფთავების გადასახადი დაამატოთ.