საცხოვრებლის ზუსტი მდებარეობის მითითების შესახებ

საცხოვრებლის მდებარეობას ზოგჯერ დიდი მნიშვნელობა აქვს სტუმრებისთვის, როცა ისინი ჯავშნის გაფორმების შესახებ გადაწყვეტილებას იღებენ. ჯავშნის გაფორმების შემდეგ კი მათ ზუსტი მდებარეობა სჭირდებათ, დაუბრკოლებლად რომ დაბინავდნენ.

Airbnb‑ზე განთავსებულ განცხადებაში საცხოვრებლის ზუსტი მდებარეობა უნდა იყოს მითითებული. კარგი იქნება, თუ დაკავშირებულ ინფორმაციას საცხოვრებლის აღწერილობასაც დაურთავთ. „აღწერილობაში ვუთითებ, სად მდებარეობს საცხოვრებელი“, — ამბობს ჯულიეტი, მრჩეველ მასპინძელთა საბჭოს წევრი ნაირობიდან (კენია).

მისამართის დამოუკიდებლად შეცვლას პირველი ჯავშნის მიღების შემდეგ ვეღარ შეძლებთ და გაერთიანების მხარდაჭერის გუნდთან დაკავშირება მოგიწევთ.

როცა საქმე საცხოვრებლის მისამართსა და იქამდე მისასვლელ გზას ეხება, ზედმეტი დეტალები არ არსებობს. მაგალითად, ჯულიეტი სტუმრებს GPS‑კოორდინატებს უზიარებს. ამას გარდა, ის ჭიშკრის ფერისა და მასზე დატანილი წარწერების შესახებაც აწვდის ინფორმაციას სტუმრებს.

ამასთან, ჯულიეტი ცდილობს, ხაზზე იყოს დაბინავების პერიოდში, რომ სტუმრების დახმარება შეძლოს, თუ მათ საცხოვრებლის მიგნება გაუჭირდებათ. „სტუმრებს ჩვენი საკონტაქტო ინფორმაცია აქვთ, ამიტომ გვირეკავენ, როცა რაიმე პრობლემა ექმნებათ“, — ამბობს ის.

საცხოვრებლის აღწერილობაში შეგიძლიათ მიუთითოთ დამატებითი ინფორმაციაც (მაგალითად, უბნისა და საპარკინგე ადგილების შესახებ), რომელიც, რუკასთან ერთად, სტუმრებს სათანადო მოლოდინს შეუქმნის და არჩევანის გაკეთებაში დაეხმარება.

თქვენ თავად წყვეტთ, როგორ აისახოს საცხოვრებლის მდებარეობა ძიების შედეგებში Airbnb‑ზე. ასარჩევად შემდეგი ვარიანტები გაქვთ:

• მიახლოებითი მდებარეობა: განცხადებაში მოცემული რუკა ასახავს საცხოვრებლის მიმდებარე ტერიტორიას, მისი მისამართიდან დაახლოებით 1 კმ‑მდე რადიუსში.
• ზუსტი მდებარეობა: რუკაზე მოცემული ნიშნული ქუჩების უახლოეს კვეთასთან იქნება, თუმცა საცხოვრებლის ზუსტი მისამართი არც ამ შემთხვევაშია მონიშნული. საჭიროებისამებრ, შეგიძლიათ, გადააადგილოთ რუკა, სანამ ნიშნული სწორ მდებარეობაზე არ აღმოჩნდება.

ნებისმიერ შემთხვევაში, ზუსტ მისამართს სტუმრები მხოლოდ ჯავშნის გაფორმების შემდეგ შეიტყობენ. ნაგულისხმევად კი არჩეული იქნება მიახლოებითი მდებარეობა.

თუ სტუმრები ვერ ახერხებენ ხოლმე საცხოვრებლის მარტივად პოვნას, მთავარ შესასვლელთან დაკიდეთ კარგად შესამჩნევი ფირფიტა, რომელზეც მითითებული იქნება ქუჩის სახელი და სახლის ნომერი, ანდა იზრუნეთ საცხოვრებლამდე მისასვლელი გზის განათებაზე.

ზოგიერთ შემთხვევაში, შესაძლოა, არასტანდარტული მიდგომა დაგჭირდეთ. „ჩვენს უბანში თიხატკეპნილი სახლებია და მისამართის პოვნა რთულია“, — ამბობს კეშავი, მრჩეველ მასპინძელთა საბჭოს წევრი ნიუ‑დელიდან (ინდოეთი), და დასძენს: „ქუჩების სტრუქტურა საკმაოდ თავისებურია, ამიტომ გამყოლის დახმარებაა საჭირო“.

უკვე დიდი ხანია, კეშავი ფიქრობს იმაზე, თუ როგორ გაუმარტივოს სტუმრებს საცხოვრებლის დამოუკიდებლად პოვნა. „ალბათ, მანიშნებლებს დავკიდებთ მთავარ ქუჩაზე“, — ამბობს ის.

განცხადებაში მითითებული დეტალები, მდებარეობის ჩათვლით, სტუმრებს სათანადო მოლოდინს უქმნის და ეხმარება, გაერკვნენ, შეესაბამება თუ არა საცხოვრებელი მათ საჭიროებებს. ამგვარად, სტუმრები უფრო მშვიდად გააფორმებენ ჯავშნებს, თქვენ კი თავიდან აიცილებთ უარყოფით მიმოხილვებს.

მაგალითად, შესაძლოა, სტუმრებს სურდეთ, გამოთვალონ მანძილი ტრანსპორტის უახლოეს გაჩერებამდე, ან შეამოწმონ, რომ პლაჟისპირა ვილა ნამდვილად სანაპიროსთანაა. თუ გადაწყვეტთ, რომ ძიების შედეგებში საცხოვრებლის ზუსტი მისამართი აისახოს, შესაძლოა, მეტი სტუმარი დააინტერესოთ.

აქვე უნდა აღინიშნოს, რომ მიახლოებითი მდებარეობის მითითება უმჯობესია, როცა კონფიდენციალურობისა და უსაფრთხოების საკითხები გაღელვებთ. თუ ძიების შედეგებში რუკა საცხოვრებლის მიმდებარე ტერიტორიას ასახავს, თქვენც და სტუმრებიც უფრო მშვიდად იქნებით.