მეტი სადავე „განცხადებების“ ჩანართში
რედაქტორის შენიშვნა: სტატია გამოქვეყნდა 2024 წლის ზაფხულის განახლების ფარგლებში. ინფორმაცია, შესაძლოა, შეცვლილიყო მისი გამოქვეყნების შემდეგ. შეიტყვეთ ჩვენი პროდუქტის უახლესი ვერსიის შესახებ.
როგორც პრაქტიკა აჩვენებს, იმ განცხადებების მასპინძლები, რომლებშიც შედარებით ვრცელი ინფორმაციაა მითითებული, დაახლოებით 20%‑ით მეტ ჯავშანს იღებენ. „განცხადებების“ ჩანართი 2023 წელს წარმოგიდგინეთ და მას რეგულარულად ვაუმჯობესებთ მასპინძლებისგან მიღებული ინფორმაციის საფუძველზე.
2024 წლის ზაფხულის განახლების ფარგლებში, ფოტოტურთან დაკავშირებით შემოგთავაზებთ ახალ ფუნქციას, რომელსაც ბევრი მასპინძელი ითხოვდა — საცხოვრებლის ცალკეული ოთახების ფოტოების მიმდევრობის შეცვლის შესაძლებლობას. მალე კი საშუალება გექნებათ, განაახლოთ არსებული ფოტოტური ხელოვნური ინტელექტის დახმარებით.
გაგაცნობთ „განცხადებების“ ჩანართიდან განცხადების მართვის 5 მარტივ ხერხს — დავიწყოთ გაუმჯობესებული ფოტოტურით.
1. შექმენით ფოტოტური
ფოტოტურის შექმნის შემთხვევაში, სტუმრობის მსურველებს უფრო მკაფიო წარმოდგენა ექნებათ საცხოვრებლის განლაგების შესახებ. ხელოვნური ინტელექტი დაგეხმარებათ საცხოვრებლის ფოტოების ოთახებისა და სივრცეების მიხედვით ავტომატურად დალაგებაში, რის შემდეგაც უკვე ხელით შეძლებთ საჭირო ცვლილებების შეტანას.
ამიერიდან საშუალება გაქვთ, მიმდევრობის შესაცვლელად ჩავლებით გადაანაცვლოთ ნებისმიერი ოთახის ფოტოები, მალე კი შეძლებთ, მომენტალურად განაახლოთ ფოტოტური მინიმუმ სამი ფოტოს დამატებისას. ხელოვნური ინტელექტი ახალ ფოტოებს ადგილს ისე მიაკუთვნებს, რომ თქვენ მიერ ადრე შეტანილი ცვლილებები ხელუხლებელი დარჩება.
2. ჩაასწორეთ საყოფაცხოვრებო პირობები
სტუმრობის მსურველები ხშირად ფილტრავენ ძიების შედეგებს Airbnb‑ზე, რომ კონკრეტული საყოფაცხოვრებო ნივთებისა თუ პირობების მქონე საცხოვრებლები იპოვონ. თქვენი განცხადება ძიების მაქსიმალურად მეტ შედეგში რომ მოხვდეს, აღნიშნეთ მასში ყველაფერი, რაც სტუმრებს დახვდებათ. „განცხადებების“ ჩანართიდან მარტივად შეძლებთ ცალკეული საყოფაცხოვრებო პირობების დამატებასა და მათი ჩამონათვალის რეგულარულ განახლებას.
თქვენთვის ასარჩევად წარმოდგენილი იქნება დაახლოებით 150 საყოფაცხოვრებო პირობა — მათი დალაგება შეგიძლიათ ანბანურად ან კატეგორიების მიხედვით. ამასთან, საყოფაცხოვრებო პირობების სახელით მოძიებასაც შეძლებთ. საჭიროებისამებრ, შეიტანეთ მეტი კონკრეტიკა, მაგალითად, აღნიშნეთ, რომ სამუშაო სივრცეში არის პრინტერი და ერგონომიული სკამი.
3. განაახლეთ საცხოვრებლის აღწერილობა
სტუმრებისთვის მნიშვნელოვანია, რომ დაჯავშნილი საცხოვრებლები შეესაბამებოდეს მათ აღწერილობებს. თქვენ მიერ განთავსებულ საცხოვრებელთან დაკავშირებით ზუსტი და მკაფიო ინფორმაციის მითითებით სტუმრობის მსურველებს სათანადო მოლოდინს შეუქმნით.
აღწერეთ საცხოვრებლის მდებარეობა, დეკორის ელემენტები და მასპინძლობის თქვენეული სტილი. შეეცადეთ, ცხადად წარმოადგენინოთ საცხოვრებლის მაძიებლებს ის, თუ როგორი იქნება თქვენთან სტუმრობა — ღირსშესანიშნაობების, ხმებისა და განცდების ჩათვლით.
4. შეავსეთ დაბინავების გზამკვლევი
სტუმრები მარტივად უნდა აგნებდნენ საცხოვრებელს და მარტივადვე ახერხებდნენ შიგნით მოხვედრას. „განცხადებების“ ჩანართი საშუალებას გაძლევთ, ერთი სივრციდან დაამატოთ ან ჩაასწოროთ დაბინავებასთან დაკავშირებული ინფორმაცია.
აღნიშნული მოიცავს დაბინავების მეთოდსა და დროს, ასევე, საცხოვრებლამდე მისასვლელ გზას, პარკირებასთან დაკავშირებულ რჩევებს, Wi‑Fi ქსელის პაროლს, სტუმრის ცნობარს, საცხოვრებლიდან გასვლის ინსტრუქციასა და სხვა ცნობებს. იქვე შეძლებთ, წინასწარ გაარკვიოთ, როგორ დაინახავენ ამ ინფორმაციას სტუმრები. სტუმრები შესაბამის ცნობებს მიიღებენ ჯავშნის გაფორმების შემდეგ, დაბინავებამდე, ასევე, სტუმრობის დასრულების მოახლოებისას.
5. დაამატეთ გონიერი საკეტი
გონიერი საკეტი არის Wi‑Fi კავშირის მხარდაჭერის მქონე საკეტი, რომლის გამოყენების შემთხვევაშიც კარი იხსნება არა გასაღების, არამედ კოდის მეშვეობით. ის დამოუკიდებლად დაბინავების ერთ‑ერთი ყველაზე მარტივი და ეფექტური მეთოდია.
დაბინავების პროცესი რომ გაამარტივოთ, დააკავშირეთ თქვენს განცხადებას თავსებადი გონიერი საკეტი. სტუმრები ავტომატურად მიიღებენ კარის უნიკალურ კოდს თითოეული ახალი ჯავშნისთვის, თქვენ კი საკეტის მართვას Airbnb‑ს აპის მეშვეობით შეძლებთ.
ზემოაღნიშნული ეხება მასპინძლებს, რომლებიც სტუმრებს საცხოვრებლებს აშშ‑სა და კანადაში სთავაზობენ და რომელთაც August‑ის, Schlage‑სა და Yale‑ს ფირმის თავსებადი საკეტები აქვთ.