უკრაინის კრიზისს ოპერატიული მხარდაჭერით ვპასუხობთ

რუსეთის უკრაინაში შეჭრის მომდევნო კვირას, მომღერალი და მასპინძელი რაფალი მიხვდა, რამდენად აისახებოდა შექმნილი ვითარება მის მშობლიურ ვროცლავზე, რომელიც პოლონეთის სამხრეთ‑დასავლეთ ნაწილში მდებარეობს. მის უბანში, უკრაინის კულტურის ცენტრის მოპირდაპირე მხარეს, შეწირული ნივთებით სავსე ყუთები გროვდებოდა, ქუჩებსა და მაღაზიებში კი მას უკრაინული ლაპარაკი ესმოდა…

მალევე, რაფალის მიერ Airbnb‑ზე განთავსებული საცხოვრებელი სამმა უკრაინელმა ოჯახმა დაჯავშნა თითო‑თითო თვით. რაფალი ღელავდა, რომ ომს გამოქცეული ადამიანებისთვის საცხოვრებლის თანხის გამორთმევა მოუწევდა, ამიტომაც Airbnb‑ს მხარდაჭერის გუნდს დაუკავშირდა. გუნდის წევრისგან მან შეიტყო, რომ Airbnb.org‑ზე რეგისტრაციის შემთხვევაში შეიძლებოდა, ამ სტუმრობებისთვის დაფინანსება მიეღო.

გაეროს ადამიანის უფლებათა საბჭოს თანახმად, 2022 წლის თებერვალს უკრაინაში ჯარების შეჭრიდან ექვსი თვის განმავლობაში, ქვეყანა თითქმის 7-მა მილიონმა ადამიანმა დატოვა. მილიონობით ოჯახი ევროპის სხვადასხვა ქალაქში მხოლოდ რამდენიმე ჩემოდნით ჩავიდა — ისე, რომ გაურკვეველი იყო, როდის შეძლებდა თავის ქვეყანაში დაბრუნებას.

კრიზისის საპასუხოდ, Airbnb.org‑მა თხოვნით მიმართა პარტნიორ არასამთავრობო ორგანიზაციებსა და მასპინძლების საერთაშორისო გაერთიანებას. მიზანი იყო, დროებითი საცხოვრებელი გვეპოვა უკრაინიდან იძულებით გადაადგილებული 100 000‑მდე ადამიანისთვის.

დასახულ მიზანს უკვე მივაღწიეთ, რაც იმ მასპინძლების, Airbnb.org‑ის დონორებისა და ჰუმანიტარული ჯგუფების დამსახურებაა, რომლებიც მსოფლიოს სხვადასხვა კუთხიდან ადამიანებს ადგილზე ეხმარებოდნენ.

მრავალი ადამიანი, რომელიც Airbnb.org‑ის მიმართვას გამოეხმაურა, რაფალის მსგავსად, დიდი ხანია, რაც Airbnb‑ს მეშვეობით მასპინძლობს. ახლა ისინი რთულ ვითარებაში აღმოჩენილ ადამიანებს საცხოვრებლებს Airbnb.org‑ის მეშვეობით, ფასდაკლებით სთავაზობენ. მათთან ერთად კი ინიციატივას — ბერლინში მცხოვრები ამერიკელი მეცნიერის, მერის, მსგავსად — 40 000 ახალბედა მასპინძელი შემოუერთდა, რომ უფასოდ ან ფასდაკლებით შეეთავაზებინა საცხოვრებელი ლტოლვილი სტუმრებისთვის.

რაფალი ამბობს, რომ უკრაინაში შეჭრამ პოლონეთში ყველა გააოგნა, თუმცა განცვიფრებული დარჩა, თუ რამდენად ოპერატიულად აღმოუჩინეს დახმარება მისმა მეგობრებმა და მეზობლებმა უკრაინიდან ომს გამოქცეულ ადამიანებს. ხალხმა ვროცლავის რკინიგზის სადგურზე უკრაინის საზღვართან საჭმელი და საჭირო პროდუქტის მარაგი მიიტანა.

მან, კოლეგებთან ერთად, საქველმოქმედო მუსიკალური გამოსვლები დაიწყო, მაგრამ, ამავე დროს, ცდილობდა, უფრო ოპერატიული დახმარება გაეწია იძულებით გადაადგილებული პირებისთვის. „ყველაზე დიდი საშინელებაა, როცა არ გაქვს საცხოვრებელი, ღამის გასათევი, დასაძინებელი ადგილი — ადგილი, სადაც დაბრუნდები“, — ამბობს ის.

რაფალი Airbnb.org-ის მეშვეობით ისევ სთავაზობს საცხოვრებელს კრიზისის შედეგად დაზარალებულ სტუმრებს. ადამიანების დასახმარებლად ის, ასევე, პოლონურ ენაზე თარგმნიდა Airbnb.org-ის ვებინარებს.

ბერლინში, ვროცლავის ჩრდილო-დასავლეთით, დაახლოებით 350 კილომეტრში (215 მილში), მერიმ უკრაინაში შეჭრის შესახებ ინფორმაცია ახალი ამბების მეშვეობით გაიგო. როცა ინტერნეტში Airbnb.org-ის განცხადება ნახა, მაშინვე უსასყიდლოდ შესთავაზა თავისი ბინა იძულებით გადაადგილებულ პირებს.

მას Airbnb.org-ის ერთ-ერთი პარტნიორის, ლტოლვილთა, თავშესაფრისა და მიგრაციის ორგანიზაციის (ORAM) წარმომადგენელმა მიმართა. როგორც საინფორმაციო საშუალებები იტყობინებოდნენ, ლგბტქ+ ადამიანების მიმართ უკრაინასა და მეზობელ ქვეყნებში უარყოფით დამოკიდებულებას კონფლიქტის დროს იძულებითი გადაადგილება დაემატა, რამაც კიდევ უფრო დაამძიმა ლგბტქ+ პირების მდგომარეობა. ORAM-ის წარმომადგენელმა მერის ჰკითხა, უმასპინძლებდა თუ არა ორ ტრანსგენდერ ადამიანს.

მერი სიამოვნებით დათანხმდა. „ვიცოდი, რომ ჩემი ბინა უსაფრთხო იყო მათთვის“, — ამბობს ის.

მერის პირველი სტუმრების წასვლიდან ცოტა ხანში მასთან დიმა ჩავიდა ორი კვირით. 20 წელს გადაცილებული გეი მამაკაცი დიმა კიევში ცხოვრობდა, როცა რუსეთმა მისი ქალაქის დაბომბვა დაიწყო. საზოგადოებრივი ორგანიზაცია Safebow დიმას და მის კატას, სახელად ფიჩს, პოლონეთიდან ბერლინში გადასვლაში დაეხმარა. იქ კი ლტოლვილთა, თავშესაფრისა და მიგრაციის ორგანიზაციის (ORAM) მეშვეობით, მან საცხოვრებელი იპოვა და სოციალური მომსახურების სააგენტოში დარეგისტრირდა.

უამრავი დაბრკოლების გადალახვის შემდეგ მერის ბინაში მოხვედრა დიმასთვის ნამდვილი შვება იყო. „პირველ დღეებში ძალიან ვღელავდი“, — იგონებს დიმა. „არც კი ვიცი, რა უფრო მნიშვნელოვანი იყო ჩემთვის: უსაფრთხო ადგილას ცხოვრება თუ ის დიდი მხარდაჭერა, რომელსაც ვგრძნობდი“.

დიმას სტუმრობის პირველ კვირას მერი ქალაქიდან იყო გასული. ბერლინში რომ დაბრუნდა, მათ შესანიშნავად გაუგეს ერთმანეთს. საათობით ისხდნენ სამზარეულოს მაგიდასთან, ერთად მიირთმევდნენ საჭმელს და ლუდს სვამდნენ. მათ სხვა ბინაში დიმას გადასვლის შემდეგაც შეინარჩუნეს ურთიერთობა.

„ეს უდიდესი სტიმული იყო ჩემთვის აქ ახალი ცხოვრების დასაწყებად“, — ამბობს დიმა.

მერის თქმით, მასპინძლობა მარტივი აღმოჩნდა. „განსაკუთრებული არაფერი გამიკეთებია“, — აღნიშნავს ის. „უბრალოდ, გავრისკე. ალბათ, უმნიშვნელოდ შევწუხდი“.

ის ამ შეგრძნებას სტუმრების მიერ მოთხრობილ ისტორიებს ადარებს: „გამუდმებით იმაზე ვფიქრობ, თუ რა იქნებოდა, სრულიად უცხო ქვეყანაში იძულებით რომ აღმოვჩენილიყავი, საკუთარი ოჯახისგან შორს. წარმოუდგენლად რთულია“.

მერი არ ელოდა, რომ სტუმრებს დაუმეგობრდებოდა. ის აღაფრთოვანა ერთიანობის შეგრძნებამ, რაც მათთან ურთიერთობისას ჩამოყალიბდა.

„ჩვენი ძალისხმევის შედეგები ყოველთვის თვალსაჩინო არ არის“ , — ამბობს ის. „ამგვარად კი ნამდვილად შემიძლია თუნდაც ერთი ადამიანის ცხოვრების შეცვლა“.