საცხოვრებელში შეთავაზებული პირობების მითითების შესახებ
Airbnb‑თი მოსარგებლე სტუმრები ერთ‑ერთ ყველაზე დიდ პრიორიტეტს საყოფაცხოვრებო პირობებს ანიჭებენ. საცხოვრებლების ძიებისას მათ შეუძლიათ შედეგების გაფილტვრა და მხოლოდ იმ ვარიანტების გაცნობა, რომლებშიც მათთვის სასურველი საყოფაცხოვრებო პირობებია.
მცირე კომფორტიც კი (მაგალითად, ტელევიზორი ან პირველადი სამედიცინო დახმარების ნაკრები) სტუმრობას უფრო მარტივსა და სასიამოვნოს ხდის. ამიტომ, კარგი იქნება, თუ განცხადების აღწერილობაში მიუთითებთ ყველაფერს, რასაც სტუმრებს ახვედრებთ.
სტუმრობის მსურველები ხშირად ეძებენ საცხოვრებლებს, რომლებშიც არის:
- Wi‑Fi კავშირი
- სამზარეულო
- სარეცხი მანქანა ან საშრობი
- უფასო საპარკინგე ადგილი
- კონდიციონერი
- სამუშაო სივრცე
- საცურაო ან ჰიდრომასაჟიანი აუზი
დაამატეთ ძირითადი და სტუმრებს შორის პოპულარული საყოფაცხოვრებო პირობები მოცემული სიებიდან, ხოლო დამატებითი საყოფაცხოვრებო პირობების მითითებას განცხადების გამოქვეყნების შემდეგ შეძლებთ.
ამას გარდა, უნდა აღნიშნოთ უსაფრთხოების რა საშუალებებია საცხოვრებლის ტერიტორიაზე — მაგალითად, კვამლის დეტექტორი.
გაითვალისწინეთ რამდენიმე მარტივი რჩევა:
1. შეინარჩუნეთ კონკურენტუნარიანობა. განცხადებაში მიუთითეთ თქვენ მიერ შეთავაზებული ყველა საყოფაცხოვრებო პირობა. მაგალითად, მიეცით სტუმრობის მსურველებს საშუალება, თავად გადაწყვიტონ, გარე სასადილო სივრცე მათთვის საპიკნიკე მაგიდით უფრო კომფორტულია, თუ რბილი ავეჯით.
2. შეუქმენით პოტენციურ სტუმრებს სათანადო მოლოდინი. დააზუსტეთ დეტალები განცხადების აღწერილობაში (მაგალითად, თქვენ მიერ შეთავაზებული გრილ‑ბარბექიუ გაზზე მუშაობს თუ ნახშირზე).
3. წარმოიდგინეთ თავი სტუმრის ადგილას. დაფიქრდით, რა გსურთ და გჭირდებათ, როცა თავად ხართ ხოლმე სტუმარი. შემდეგ კი, დროთა განმავლობაში, დაამატეთ შესაბამისი პირობები თუ ნივთები საცხოვრებელში.
„საბაზისო საყოფაცხოვრებო პირობები აუცილებელია“, — ამბობს ჰარი, მასპინძელი ათენიდან (საბერძნეთი) და დასძენს: „ეს მეტი ჯავშნის მიღებაში დაგეხმარებათ. დავრწმუნდი, რომ ორთქლის უთოსა და ფენზე დახარჯული ცოტაოდენი თანხა სრულად ამართლებს თავის ღირებულებას“.