პროფესიონალურ დასუფთავებაში დახელოვნება

სტუმრობებს შორის საცხოვრებლის სათანადოდ დასუფთავება 5‑ვარსკვლავიანი მასპინძლობის მნიშვნელოვანი კომპონენტია. სტუმრებისგან 5 ვარსკვლავზე დაბალი შეფასების მიღების ერთ‑ერთი ყველაზე გავრცელებული მიზეზი სწორედ სისუფთავის ნაკლებობაა.

ნუ დაუშვებთ, რომ მტვერმა, ლაქებმა ან უსიამოვნო სუნმა წყალში ჩაყაროს თქვენი მონდომება — დაიხმარეთ რჩევები, რომლებსაც ამ სტატიაში გვიზიარებს პროფესიონალი დამლაგებელი, დაიანა კრუზი. ის თავის მეუღლესთან ერთად Airbnb‑ზე რეგისტრირებულ მასპინძლებთან თანამშრომლობს და ათობით ობიექტს ასუფთავებს აშშ‑ის ფლორიდის შტატის სამხრეთ‑დასავლეთში.

დასუფთავებამ ზედმეტი ძალისხმევის გარეშე რომ ჩაიაროს, სათანადოდ მოემზადეთ ამ პროცესისთვის. მაგალითად, დაიანას საგრძნობლად ეხმარება:

• უნივერსალური შვაბრა მიკროფიბრიანი და ჯაგრისიანი თავებით როგორც იატაკების საწმენდად, ისე რთულად მისადგომი კუთხეებიდან მტვრის მოსაცილებლად
• შვაბრის ორმხრივი სათლი საპნიანი და სუფთა წყლის გასაცალკევებლად
• მტვერსასრუტი სხვადასხვა საწმენდი თავით ხალიჩებისა და ნაპრალებისთვის, მაგალითად, გასაწევი კარის ლიანდაგებისთვის
• საშხაპის წამოსაცმელი შლანგი ხელსაბანის, აბაზანის ან, ზოგიერთ შემთხვევაში, თვით საშხაპის მოსარეცხად
• შუშის უნივერსალური საწმენდი ხელსაწყო ღუმელების ზედაპირებისა და საშხაპის კარებისა თუ გამყოფებისთვის
• არატოქსიკური საწმენდი საშუალებები ლაქების, საპნის ნარჩენებისა და ცხიმის მოსაშორებლად
• არაუხეში ღრუბლები ფოლადის ნაწილებიდან წყლის ჩამჯდარი ლაქების მოსაშორებლად
• საშრობი ბურთები სარეცხიდან ღინღლებისა და თმის მოსაშორებლად
• მრავალჯერადი გამოყენების წებოვანი გორგოლაჭი ქსოვილის ზედაპირიანი ავეჯიდან თმისა და შინაური ცხოველების ბეწვის მოსაშორებლად

რაც უფრო ორგანიზებული იქნებით, მით უფრო ეფექტურად გამოიყენებთ დროს. შეინახეთ საწმენდი საშუალებები ერთ სივრცეში (მაგალითად, გადასატან ყუთში ან ჩაკეტილ კარადაში). ამასთან, მარაგის რეგულარულად შევსებაც არ დაგავიწყდეთ.

დაიანას თქმით, ისინი, ვისაც სტუმრებისგან ხუთი ვარსკვლავის მიღება სურს, მხოლოდ ძირითადით არ უნდა შემოიფარგლონ — აუცილებელია ერთგვარი რუტინის დანერგვა და საკონტროლო სიის შედგენა, რომ არაფერი დაგავიწყდეთ.

დაიანა თავის რუტინას საწოლისა და სხვა თეთრეულის მოხსნით იწყებს. „უმჯობესია, რომ გქონდეთ სუფთა პირსახოცებისა და საწოლის თეთრეულის დამატებითი კომპლექტი იმ შემთხვევისთვის, თუ ახალი სტუმარი იმავე დღეს ბინავდება“, — ამბობს ის და დასძენს: „დიდ, ფუმფულა პირსახოცებს გასაშრობად ერთი საუკუნე სჭირდება, რაც დროს წაგართმევთ“.

ის განსაკუთრებული სიფრთხილით აშორებს ჭუჭყს, ლაქებსა და თმას ისეთ ადგილებიდან, რომლებიც ხშირად უყურადღებოდ რჩება.

• საწოლების ქვეშ: ჩაიხედეთ თითოეული საწოლის ქვეშ და მოაცილეთ იქაურობას მტვერი ან დარჩენილი ნივთები.
• უჯრების შიგნით: გახსენით თითოეული უჯრა და მოაშორეთ ნარჩენები.
• კარადების კარები: გაწმინდეთ მათი წინა მხარეები და კიდეები.
• საყოფაცხოვრებო ტექნიკა: მოაშორეთ ნარჩენი ნამცეცები, ნალექი ან სითხე ტოსტერს, ყავის აპარატს, მიკროტალღურ ღუმელსა და მაცივარს.
• დეკორის ელემენტები: გადაწმინდეთ მტვერი ყველა ზედაპირს, მათ შორის, თაროებს, დარაბებსა და ქოთნის მცენარეებს.
• გარე სივრცეები: მოხვეტეთ შესასვლელები და პატიოები — მოაშორეთ ჭუჭყი, ფოთლები და აბლაბუდები.

როცა დაასრულებთ, შეამოწმეთ თქვენი ნამუშევარი. მაგალითად, დააკვირდით სარეცხსა და თეფშებს მათი საშრობიდან ან ჭურჭლის სარეცხი მანქანიდან გამოღებისას.

2‑3 თვეში ერთხელ ჩაატარეთ საგულდაგულო დასუფთავება და მოაწესრიგეთ ის, რისთვისაც სტუმრების ხშირი ცვლის დროს ვერ იცლით.

სუნების აღქმის საკითხი სუბიექტურია. სტუმრებს, შესაძლოა, ნებისმიერი ძლიერი არომატი არ ესიამოვნოთ. დაიანას თქმით, უსიამოვნო სუნების სადეზინფექციო ხსნარების, არომატიზატორების ან სხვა საშუალებების გამოყენებით შენიღბვა, როგორც წესი, არ ამართლებს.

დაიანა ამბობს, რომ საჭიროა:

• ფანჯრების გაღება, სანამ მუშაობთ (თუ ამინდი ამის საშუალებას იძლევა).
• ჰაერის გამწმენდის ჩართულად დატოვება 2‑3 საათის განმავლობაში, რაც ხელს შეუწყობს შედარებით ძლიერი სუნების განეიტრალებას.
• ზომიერი, უნივერსალური, წყალში გაზავებული სადეზინფექციო საშუალების მისხურება დივნებზე, ფარდებსა და ხალიჩებზე.

„ვცდილობ, ძირითადად მცენარეული, და არა ძლიერი, საწმენდი საშუალებები გამოვიყენო“, — გვიყვება დაიანა და დასძენს: „ისინი უფრო ძვირი ღირს, თუმცა თავის თავს ამართლებს. ბევრი კომპლიმენტი მივიღე საცხოვრებელში სისუფთავის სუნთან დაკავშირებით“.

დამატებით ყურადღებას დიდი შთაბეჭდილების მოხდენა შეუძლია სტუმრებზე. ამ კუთხით დაიანა სამ საბოლოო საკითხზე ზრუნვას გვირჩევს.

• შეავსეთ მარაგი. აღნიშნული მოიცავს ჭურჭლის სარეცხ საშუალებას, საპონს, შხაპის გელს, შამპუნსა და კონდიციონერს. თუ სტუმრებს ერთჯერად ნივთებს ახვედრებთ (მაგალითად, ჭურჭლის სარეცხ ღრუბლებს) გამოცვალეთ ისინი და დაუტოვეთ ახლები თავ‑თავიანთ შეფუთვაში.
• მოაწესრიგეთ სხვადასხვა საოჯახო აქსესუარი. ლამაზად დააწყვეთ დისტანციური მართვის პულტები, დეკორატიული ბალიშები და უჯრებსა თუ კარადებში შენახული ნივთები, მაგალითად, ფენი ან ქვაბები/ტაფები.
• შესძინეთ საცხოვრებელს რამდენიმე დამაგვირგვინებელი შტრიხი. მოკეცეთ ტუალეტის ქაღალდისა და ხელსახოცების კიდეები ისე, როგორც ამას საუკეთესო სასტუმროებში აკეთებენ.

„ნაგვის პარკებსაც კი ლამაზად ვკეცავ“, — გვიზიარებს დაიანა და დასძენს: „სტუმრები ამჩნევენ ამ პატარ‑პატარა დეტალებს და გრძნობენ, რომ მაქსიმუმს აკეთებთ“.

დაფიქრდით, ხომ არ გირჩევნიათ თანამასპინძლის დამატება ან დამლაგებლის დაქირავება, დასუფთავების კუთხით ყველაფერმა ყოველთვის იდეალურად რომ ჩაიაროს. ეს დამატებითი მხარდაჭერა დაგეხმარებათ, უფრო საგულდაგულოდ მოემზადოთ ახალი სტუმრებისთვის და მათი 5‑ვარსკვლავიანი სტუმრობის სხვა ნიუანსებზე იზრუნოთ.

დაიანა კრუზი და თავისი მეუღლე არ არიან გამოსახული ფოტოზე.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.