ერთ ღამეზე ფასის დაწესების შესახებ

ერთი ღამის ფასს თავად მასპინძელი აწესებს, მისი შეცვლა კი ნებისმიერ დროს შეუძლია.

თუ ზუსტად არ იცით, რა ფასით დაიწყოთ, გაეცანით ახლომდებარე მსგავსი ვარიანტების საშუალო ფასებს:

1. კალენდრიდან აირჩიეთ კონკრეტული თარიღი ან თარიღთა დიაპაზონი.

2. შეხებით ან დაწკაპუნებით აირჩიეთ ერთი ღამის ფასი. უშუალოდ ფასის ქვემოთ მოცემული იქნება ღილაკი რუკის ხატულათი და ტექსტით „მსგავსი საცხოვრებლების შედარება“.

3. შეეხეთ ან დააწკაპუნეთ აღნიშნულ ღილაკს, რის შემდეგაც გაიხსნება რუკა, რომელზეც მოცემული იქნება თქვენ მიერ განთავსებული საცხოვრებლის მსგავსი ვარიანტების საშუალო ფასები. რუკიდან საშუალება გექნებათ, აირჩიოთ, უკვე დაჯავშნილი საცხოვრებლების ფასები იყოს მითითებული თუ დაუჯავშნელის.

გაითვალისწინეთ, რომ თქვენ მიერ განსაზღვრული ფასი არ არის ის თანხა, რომელსაც სტუმარი ჯამში გადაიხდის. ჯამური ფასისა და მისი დეტალიზაციის გასაცნობად:

1. კალენდრიდან აირჩიეთ ღამეების ნებისმიერი რაოდენობა.

2. ერთი ღამის ფასის ქვემოთ მოცემული იქნება ღილაკი „სტუმრის მიერ ჯამში გადასახდელი“, რომლის მეშვეობითაც შეიტყობთ, ჯამში რამდენის გადახდა მოუწევს სტუმარს, შესაბამისი ჯავშანი რომ გააფორმოს.

3. შეეხეთ ან დააწკაპუნეთ აღნიშნულ ღილაკს, რომ გახსნათ ფასის დეტალიზაცია, რომელშიც მითითებული იქნება ერთი ღამის ფასი, პლატფორმის გადასახადები, ფასდაკლებები ან პრომოაქციები (ასეთის არსებობის შემთხვევაში), ასევე, ოფიციალური მოსაკრებლები და თქვენი შემოსავლის ოდენობა.

თუ ახალბედა მასპინძელი ხართ და ცოტა მიმოხილვა გაქვთ, გირჩევთ, ჯერ შედარებით დაბალი ფასით დაიწყოთ. პრომოაქციის „ახალი განცხადება“ დაწესება, საშუალებას მოგცემთ, 20%‑იანი ფასდაკლება შესთავაზოთ პირველ სამ სტუმარს. სტუმრობის მსურველები, სავარაუდოდ, მზად იქნებიან, გადაიხადონ ოდნავ მეტი თანხა საცხოვრებელში, თუ მას სხვები გამორჩეულად აფასებენ.

განცხადების გამოქვეყნების შემდეგ ფასების დაწესებასთან დაკავშირებული ყველა ხელსაწყო მოცემული იქნება თქვენს კალენდარში. აღნიშნული ხელსაწყოები დაგეხმარებათ, ჩაასწოროთ ფასები კონკრეტულ თარიღებში, დააწესოთ ფასდაკლებები ან პრომოაქციები და არა მხოლოდ.

1. იყავით გამორჩეული
ზოგიერთი სტუმარი მაინცდამაინც თამამად არ ჯავშნის საცხოვრებლებს, რომლებსაც მიმოხილვები არ აქვს. აქედან გამომდინარე, პირველი სტუმრების დასაინტერესებლად, ჯერ იდეალურზე დაბალი ფასით დაიწყეთ, ჯავშნებისა და მიმოხილვების რაოდენობის ზრდის პარალელურად კი ფასებიც ჩაასწორეთ.

2. გაითვალისწინეთ მდებარეობისა და საყოფაცხოვრებო პირობების ფაქტორები
სტუმრები დიდ მნიშვნელობას ანიჭებენ, რამდენად არის ფასი იმ პირობების ადეკვატური, რომლებიც საცხოვრებელში ან, თუნდაც, უბანში დახვდებათ. სწორედ ამიტომ, აუცილებლად აღნიშნეთ ეს დეტალები განცხადებაში.

3. წარმოიდგინეთ თავი სტუმრის ადგილას
გაითვალისწინეთ, რომ თქვენ მიერ დაწესებული ტარიფი არ არის საბოლოო ფასი, რომელსაც სტუმრები გადაიხდიან. მას, შესაძლოა, ემატებოდეს ოფიციალური მოსაკრებლები, ასევე, დასუფთავების, დამატებითი სტუმრების და თქვენ მიერ მოგვიანებით განსაზღვრული სხვა გადასახადები.

განცხადების გამოქვეყნების შემდეგ ფასების კიდევ უფრო მეტად ოპტიმიზაციის საშუალება გექნებათ — მაგალითად, შეძლებთ სხვადასხვა ტარიფის დაწესებას შაბათ‑კვირებისა და დღესასწაულებისთვის.

ოპტიმალური ფასი ცდისა და შეცდომის მეთოდით დგინდება, ამიტომ მუდმივად იფიქრეთ ფასების კორექტირებაზე. გახსოვდეთ, რომ მთავარია, სტუმრები კმაყოფილი დარჩნენ. საბოლოო ჯამში, რაც მეტი დადებითი მიმოხილვა გექნებათ, მით უფრო წარმატებული იქნება თქვენი მასპინძლობის ბიზნესი.