განცხადების ეფექტური გვერდის შექმნის ხერხები

განცხადების გვერდი არის პირველი, რისი მეშვეობითაც შეგიძლიათ სტუმრობის მსურველთა ყურადღების მიპყრობა. შეეცადეთ, გადმოსცეთ ინფორმაცია საცხოვრებლის შესახებ სათაურის, აღწერილობის, ფოტოებისა და საყოფაცხოვრებო პირობების ჩამონათვალის მეშვეობით.

მასპინძლები თავად წყვეტენ, როდის და როგორ უმასპინძლონ სტუმრებს. ყურადღებით აირჩიეთ კალენდრისა და დაჯავშნის პარამეტრები, რომ ისინი თქვენს ხელმისაწვდომობას ემთხვეოდეს და არ მოგიწიოთ ჯავშნების უმიზეზოდ გაუქმება.

შეგახსენებთ რამდენიმე სასარგებლო ფუნქციას:

• კალენდრის პარამეტრები: რეგულარულად განაახლეთ კალენდარი, მაგალითად, იმ თარიღების დაბლოკვის გზით, როცა მასპინძლობას ვერ მოახერხებთ, ან სტუმრობის მინიმალური და მაქსიმალური ხანგრძლივობების განსაზღვრით.

• დაჯავშნის მოთხოვნა: ეს ფუნქცია საშუალებას გაძლევთ, ჯერ გაეცნოთ დაჯავშნის მოთხოვნებს, შემდეგ კი, თქვენი შეხედულებისამებრ, დააკმაყოფილოთ ისინი. მთავარია, სტუმრობის მსურველებს 24 საათის განმავლობაში გამოეხმაუროთ.

• მომენტალური დაჯავშნა: სტუმრობის მსურველები ხშირად ეძებენ საცხოვრებლებს, რომელთა დაჯავშნაც შესაძლებელია მომენტალურად. ამ შემთხვევაში, თქვენი მხრიდან წინასწარი დასტური საჭირო აღარ იქნება. ამასთან, სტუმრებისთვის საცხოვრებლის მომენტალურად დაჯავშნის საშუალების მიცემა წინასწარგანწყობებისგან თავისუფალი მასპინძლობისკენ გადადგმული მნიშვნელოვანი ნაბიჯია, რადგან ამით ადამიანებს მიანიშნებთ, რომ მზად ხართ უმასპინძლოთ ყველას, ვინც თქვენ მიერ განსაზღვრულ კრიტერიუმებს აკმაყოფილებს.

აღნიშნეთ ყველა მნიშვნელოვანი დეტალი, რომ თქვენი განცხადება გამოირჩეოდეს სხვების ფონზე, სტუმრობის მსურველებს კი სათანადო მოლოდინი ექმნებოდეთ.

• შეადგინეთ დეტალური აღწერილობა: სათაურსა და აღწერილობაში შეეცადეთ, აღნიშნოთ სტუმრებისთვის სასარგებლო ინფორმაცია საცხოვრებელთან დაკავშირებით. ვთქვათ, მასპინძელს, რომელიც სტუმრებს სთავაზობს პატარა საცხოვრებელს ზღვასთან, განცხადების სათაურად შეუძლია აირჩიოს „მყუდრო სახლი პლაჟთან“. გამოიყენეთ ინკლუზიური ლექსიკა, რითაც ხაზს გაუსვამთ იმას, რომ საცხოვრებლის კარი ღიაა ნებისმიერი წარმომავლობის ადამიანებისთვის.

• ჩამოთვალეთ საყოფაცხოვრებო პირობები: პოპულარულ საყოფაცხოვრებო პირობებში შედის Wi‑Fi კავშირი, დამოუკიდებლად დაბინავების შესაძლებლობა, სივრცე ლეპტოპით მუშაობისთვის, უფასო საპარკინგე ადგილი და შინაურ ცხოველებთან ერთად სტუმრობის საშუალება, ამიტომ მიუთითეთ ყველაფერი, რისი შეთავაზებაც შეგიძლიათ.

• გააზიარეთ სახლის წესები: ისინი სტუმრობის მსურველებს სათანადო მოლოდინს შეუქმნის როგორც ზოგადად სტუმრობის, ისე მასპინძლობის თქვენეული სტილის შესახებ. სახლის წესებში შეგიძლიათ სხვადასხვა მნიშვნელოვანი ინფორმაციის აღნიშვნა — მაგალითად, მოწევის აკრძალვის შესახებ.

საცხოვრებლის ფოტოები წარმოაჩენს თქვენს ინდივიდუალურობასა და სტილს. ხშირად განაახლეთ ისინი, რომ მათზე ასახული იყოს საცხოვრებლის მიმდინარე მდგომარეობა.

• წარმოაჩინეთ ყველაფერი, რაც ხელმისაწვდომია სტუმრებისთვის: ატვირთეთ თითოეული ოთახის სხვადასხვა რაკურსით გადაღებული რამდენიმე ფოტო. ხელოვნური ინტელექტი დაგეხმარებათ ფოტოების ოთახების მიხედვით დალაგებაში, რომ სტუმრობის მსურველებს საცხოვრებლის ვირტუალური ტური მოუმზადოთ.

• დააკონკრეტეთ ინფორმაცია თითოეულ ოთახთან დაკავშირებით: აღნიშნული გულისხმობს ცნობებს საძილე პირობების, პირადი სივრცის, ასევე, საყოფაცხოვრებო თუ ადაპტირებული პირობების შესახებ. საგულისხმო ინფორმაციის აღნიშვნა შეგიძლიათ ფოტოებისთვის დართული წარწერების მეშვეობით.

• აირჩიეთ გარეკანის ფოტო: სტუმრობის მსურველთა საძიებო შედეგებში პირველი სწორედ განცხადების სათაური და გარეკანის ფოტო ჩანს. „როცა Airbnb‑ზე საცხოვრებელს ვეძებ, პირდაპირ ფოტოებზე გადავდივარ. დაფიქრდით, რას სთავაზობთ სტუმრებს განსხვავებულს“, — ამბობს კანდიდა, მასპინძელი ჯოშუა‑ტრიდან (კალიფორნია, აშშ).

მასპინძლობის დაწყების შემდეგ შეეცადეთ, რეგულარულად განაახლოთ განცხადება. აღწერილობა და ფოტოები უნდა გადმოსცემდეს იმას, რაც სტუმრებს რეალურად დახვდებათ, პარალელურად კი ხაზს უსვამდეს საცხოვრებლის გამორჩეულ მახასიათებლებს.

სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.