განავითარეთ ბიზნესი შთაბეჭდილებების შეთავაზების მეშვეობით
საუზმე ოჯახურ გარემოში, საფეხმავლო ტურები, სხვადასხვა აქტივობა უბნების უკეთ გასაცნობად — ეს იმ ღონისძიებების მხოლოდ მცირე ჩამონათვალია, რომელთა მეშვეობითაც სუპერმასპინძლები ცდილობენ, სტუმრებს დაუვიწყარი შთაბეჭდილებები აჩუქონ. სტატისტიკის მიხედვით, Airbnb მასპინძლების დაახლოებით 30%‑ს* სტუმრებისთვის შეუთავაზებია ტურები ან სხვა მსგავსი აქტივობები, ზოგიერთმა მათგანმა კი ამ საქმიანობას ოფიციალური სახე მისცა და Airbnb შთაბეჭდილებებად გარდაქმნა.
მაგალითად, სუპერმასპინძლები პატრისია რამოსი და ოსკარ ფერნანდესი ერთ‑ერთი პირველები იყვნენ, ვინც კუბაში სტუმრებისთვის Airbnb შთაბეჭდილებების შეთავაზება გადაწყვიტა. წყვილმა, რომელიც ჰავანის უნივერსიტეტში ეკონომიკასაც ასწავლის, სახლში მასპინძლობით დაიწყო. ახლა ისინი სტუმრებს ოთხ Airbnb შთაბეჭდილებას სთავაზობენ: ორდღიან კულტურულ თავგადასავალს ჰავანასა და ქალაქგარეთ; ავთენტური ჰავანის ნახევარდღიან საფეხმავლო ტურს; კუბის ყავის პლანტაციების, ცხოველების ფერმებისა და სოფლის მხარის ერთდღიან ექსკურსიას, ასევე, ორსაათიან საუბარს კუბის ეკონომიკასა და საზოგადოებაზე „კუბა ლიბრეს“ ან სხვა ალკოჰოლური სასმელების თანხლებით. ოსკარის თქმით, ისინი მეგობრებსაც დაეხმარნენ 15 სხვა შთაბეჭდილების ორგანიზებაში.
პატრისიამ და ოსკარმა გაგვიზიარეს, როგორ გადაიყვანეს თავიანთი ბიზნესი სრულიად ახალ დონეზე.
როგორ დაიწყეთ სტუმრებისთვის შთაბეჭდილებების შეთავაზება?
ოსკარი: „როცა სტუმრები ჩამოდიოდნენ, დაახლოებით ორ საათს ვატარებდით მათთან — გვინდოდა, კუბის შესახებ ყველაფერი მოგვეყოლა. ძალიან მოგვწონდა, რადგან ამ ამპლუაშიც ლექტორებად ვგრძნობდით თავს, უბრალოდ, უნივერსიტეტის კედლებს გარეთ“.
პატრისია: „რაღაც მომენტში სტუმრებმა თავიანთ მიმოხილვებში ჩვენი იმპროვიზირებული საუბრების მოხსენიება დაიწყეს. როცა კუბაში Airbnb შთაბეჭდილებები გაეშვა, ბევრი არ გვიფიქრია, ჩვენ ხომ, ფაქტობრივად, ისედაც ვთავაზობდით სტუმრებს შთაბეჭდილებებს დაბინავებისას“.
მოგვიყევით პირველი შთაბეჭდილების შესახებ, რომელსაც სტუმრებს სთავაზობთ: Being Cuban Adventure (ნამდვილი კუბელის თავგადასავალი). რა გამოარჩევს მას?
პატრისია: „კუბის უცხოელი სტუმრები, როგორც წესი, ელიან, რომ თამბაქოზე, რომზე და სალსაზე ვისაუბრებთ, თუმცა მათთვის ოდნავ მეტის გაზიარება გვინდოდა — მაგალითად, როგორც მუშაობს განათლების სისტემა, ჯანდაცვა და ბაზრები, როგორ ცხოვრობენ ადამიანები ასეთი დაბალი ხელფასებით… ქალაქს ფეხით ვათვალიერებინებთ და ტურისტებისთვის უცხო ადგილებში მიგვყავს — მაგალითად, კაფეში „Coppelia“ — ის ნაყინის ნამდვილი სამოთხეა. ხუთი ბურთულა დაახლოებით 25 აშშ ცენტი ღირს. გარეთ 30‑წუთიანი რიგია ხოლმე, ამიტომ სანამ ადამიანები იცდიან, ერთმანეთს ეცნობიან და შეხვედრებსაც კი აქვე ნიშნავენ — აქაურობა ძალიან კარგად წარმოაჩენს კუბურ საზოგადოებას. სტუმრები საზოგადოებრივი ტრანსპორტითაც დაგვყავს — ტურისტები მას ხშირად ერიდებიან. დღის ბოლოს სტუმრები გრძნობენ, რომ დატვირთული დღე ჰქონდათ და უკვე იციან, როგორ ცხოვრობენ კუბელები სინამდვილეში სოციალისტურ სახელმწიფოში“.
ყველაზე მეტად რა მოგწონთ სტუმრებისთვის შთაბეჭდილებების შეთავაზებაში?
ოსკარი: „ცოდნისა და კულტურის გაზიარება — ჩვენ ხომ ყოველ ჯერზე სწორედ ამას ვაკეთებთ. პარალელურად უნივერსიტეტშიც ვმუშაობთ და ჩვენს ახალგაზრდა კოლეგებს თანამასპინძლობას ვთავაზობთ. ამას გარდა, ვთვლით, რომ Airbnb‑ს პლატფორმა სამუშაო ადგილებს ქმნის და ცხოვრების პირობებს აუმჯობესებს. ჩვენ მიერ შეთავაზებული შთაბეჭდილების, Life in the Countryside‑ის (ცხოვრება სოფლად), ფარგლებში, სტუმრები მიგვყავს სოფლად, ოჯახის მეგობრებთან, რომლებიც თევზჭერიდან და თავიანთი ხილისა თუ ყავის გაყიდვიდან მიღებული შემოსავლით ცხოვრობენ. კვირაში დაახლოებით სამჯერ ვსტუმრობთ და ჩვენი მეგობრებიც მეწარმეებად ვაქციეთ“.
რაიმე რჩევა ხომ არ გაქვთ მასპინძლებისთვის, რომლებიც სტუმრებისთვის შთაბეჭდილებების შეთავაზებაზე ფიქრობენ?
პატრისია: „მთავარია, სხვებისთვის საინტერესო ინფორმაციის გაზიარების სურვილი გქონდეთ“.
სტუმარი: „იყავით გახსნილი სტუმრებთან. წარმატებას რომ მიაღწიოთ, აუცილებლად ნამდვილი და გულწრფელი უნდა იყოთ“.
*შედეგი ეფუძნება Airbnb‑ს შიდა კვლევას, რომელშიც 100‑ზე მეტი მასპინძელი მონაწილეობდა.
სტატიაში მოცემული ინფორმაცია, შესაძლოა, შეცვლილიყო მისი გამოქვეყნების შემდეგ.